ഗസ്സ സിറ്റി: ഫലസ്തീനിലെ ഏക കത്തോലിക്ക ദേവാലയവും ബോംബിട്ട് തകര്‍ത്ത് ഇസ്‌റാഈല്‍. ഗസ്സയിലെ ഹോളി ഫാമിലി ചര്‍ച്ചിന് നേരെയുണ്ടായ ആക്രമണത്തില്‍ രണ്ടു സ്ത്രീകള്‍ ഉള്‍പ്പെടെ മൂന്നുപേര്‍ കൊല്ലപ്പെടുകയും വികാരി ഉള്‍പ്പെടെ നിരവധി പേര്‍ക്ക് പരുക്കേല്‍ക്കുകയും ചെയ്തതായി ജറൂസലമിലെ ലാറ്റിന്‍ പാട്രിയാര്‍ക്കേറ്റ് അറിയിച്ചു.

ആറുപേര്‍ക്ക് ഗുരുതര പരുക്കേറ്റതായി ഇറ്റാലിയന്‍ ന്യൂസ് ഏജന്‍സി വ്യക്തമാക്കി. ഫലസ്തീനിലെ ഇസ്‌റാഈലി ആക്രമണങ്ങളെക്കുറിച്ച് അന്തരിച്ച പോപ് ഫ്രാന്‍സിസ് മാര്‍പ്പാപ്പയെ അറിയിച്ചുകൊണ്ടിരുന്ന ഇടവക വികാരിയായ ഫാദര്‍ ഗബ്രിയേലെ റോമനെല്ലിയുടെ കാലിനും പരുക്കേറ്റു.

ആക്രമണത്തെ ലിയോ മാര്‍പാപ്പ അപലപിച്ചു. സംഭവത്തില്‍ കടുത്ത ദുഃഖം രേഖപ്പെടുത്തിയ അദ്ദേഹം ഉടന്‍ ഗസ്സയില്‍ വെടിനിര്‍ത്തല്‍ പ്രഖ്യാപിക്കണമെന്ന് ആവശ്യപ്പെട്ടു. അംഗീകരിക്കാനാവാത്ത നടപടിയാണെന്ന് ആക്രമണത്തെ അപലപിച്ച് ഇറ്റാലിയന്‍ പ്രധാനമന്ത്രി ജോര്‍ജിയ മെലോനി പറഞ്ഞു. മാസങ്ങളായി ഫലസ്തീനിലെ സാധാരണ ജനതയ്ക്കു നേരെ ഇസ്‌റാഈല്‍ നടത്തുന്ന ആക്രമണങ്ങള്‍ അംഗീകരിക്കാനാവില്ല. ഒന്നുകൊണ്ടും അതിനെ ന്യായീകരിക്കാനാവില്ലെന്നും മെലോണി പ്രസ്താവനയില്‍ പറഞ്ഞു. ആക്രമണത്തെ ഫ്രാന്‍സും ഹമാസും അപലപിച്ചു.
അതേസമയം, ആക്രമണത്തില്‍ ഇസ്‌റാഈല്‍ വിദേശകാര്യ മന്ത്രി ഖേദം പ്രകടിപ്പിച്ചു. സംഭവത്തെക്കുറിച്ച് അന്വേഷിക്കുന്നതായി സൈന്യം വ്യക്തമാക്കി. 2023 ഒക്ടോബര്‍ ഏഴിന് ശേഷം ഇസ്‌റാഈല്‍ ഗസ്സയില്‍ നടത്തിയ ആക്രമണങ്ങളില്‍ നേരത്തെയും ക്രിസ്ത്യന്‍ പള്ളികള്‍ തകര്‍ക്കപ്പെട്ടിരുന്നു. സെന്റ് പോര്‍ഫറസ് ഗ്രീക്ക് ഓര്‍ത്തഡോക്‌സ് ചര്‍ച്ചിനു നേരെയുണ്ടായ ആക്രമണത്തില്‍ 18 പേര്‍ കൊല്ലപ്പെട്ടിരുന്നു. ജബലിയയിലെ ബൈസന്റൈന്‍ ചര്‍ച്ചും സെന്റ് ഹിലാരിയന്‍ മൊണാസ്റ്ററിയും തകര്‍ക്കപ്പെട്ടിരുന്നു.

As we previously reported, Israeli forces bombed Gaza’s only Catholic church on Thursday, killing three people and wounding at least 10 others.