കൊച്ചി: റാഗിങ്ങിൻ്റെ പേരിലുള്ള  ക്രൂരതകൾ ഇനിയും ആവർത്തിക്കുന്നത് തടയാൻ സംസ്ഥാന സർക്കാർ ഒരുങ്ങുന്നത് സമഗ്ര നിയമഭേദഗതിക്ക്. റാഗിങ് നിരോധന നിയമ  ഭേദഗതിയുടെ കരടിൽ,  പരാതി ലഭിച്ചാലുടൻ കേസെടുക്കണം എന്നതുൾപ്പെടെയുള്ള വ്യവസ്ഥകളാണ് നിഷ്കർഷിക്കുന്നത്. എല്ലാ വിദ്യാഭ്യാസ സ്ഥാപനങ്ങളിലും റാഗിങ്  വിരുദ്ധ സമിതികളും സ്‌ക്വാഡുകളും മെന്ററിങ്  സെല്ലുകളും കൂടാതെ, സംസ്ഥാനത്തെ എല്ലാ പൊലിസ്  സ്റ്റേഷനുകളിലും റാഗിങ്  വിരുദ്ധ സെല്ലുകളും സ്ഥാപിക്കാൻ നിർദേശിച്ചിട്ടുണ്ട്. റാഗിങ്ങിനെ കുറിച്ച് വിവരം ലഭിച്ചാൽ 24 മണിക്കൂറിനുള്ളിൽ സ്ഥാപന മേധാവി, പ്രഥമദൃഷ്ട്യാ കേസ് ഫയൽ ചെയ്ത് എഫ്‌.ഐ.ആർ രജിസ്റ്റർ ചെയ്യുന്നതിനും തുടർനടപടികൾ സ്വീകരിക്കുന്നതിനും നടപടിയെടുക്കണമെന്നും കരടിലുണ്ട്. റാഗിങ്  ആരോപിക്കപ്പെട്ട വിദ്യാർഥിയെ ഉടൻ തന്നെ സസ്‌പെൻഡ് ചെയ്യണമെന്നും നിർദേശിക്കുന്നുണ്ട്.

സ്ഥാപന മേധാവിയുടെ നേതൃത്വത്തിലുള്ള റാഗിങ്  വിരുദ്ധ സമിതിയിൽ അധ്യാപകർ, അനധ്യാപക ജീവനക്കാർ, സീനിയർ വിദ്യാർഥികൾ, രക്ഷിതാക്കൾ, പൊലിസ്,  ഭരണകൂടം, പ്രാദേശിക മാധ്യമങ്ങൾ, എൻ.ജി.ഒകൾ എന്നിവരുടെ പ്രതിനിധികളും ഉണ്ടാകും. റാഗിങ് നിരോധന നിയമം കർശനമായി നടപ്പാക്കാൻ സംസ്ഥാന സർക്കാരിനോട് ഹൈക്കോടതി  നിർദേശിച്ചിരുന്നു. ഇതേത്തുടർന്നാണ് നിയമഭേദഗതിയുടെ കരട് തയാറാക്കി  യൂനിവേഴ്‌സിറ്റി ഗ്രാന്റ്‌സ് കമ്മിഷനും (യു.ജി.സി) സംസ്ഥാന ലീഗൽ സർവിസസ് അതോറിറ്റിക്കും അയച്ചത്. ആൻ്റി റാഗിങ് സ്ക്വാഡുകൾക്ക്  ഹോസ്റ്റലുകളിലും റാഗിങ്ങിന് സാധ്യതയുള്ള മറ്റ് ഇടങ്ങളിലും മിന്നൽ പരിശോധന നടത്താമെന്നും കരട് നിയമത്തിൽ പറയുന്നുണ്ട്.  റാഗിങ് തുടച്ചുമാറ്റുന്നതിനായി സംസ്ഥാനതലത്തിൽ മോണിറ്ററിങ് സെൽ രൂപീകരിക്കും. നോഡൽ ഓഫിസറായിരിക്കും കാര്യങ്ങൾ നിയന്ത്രിക്കുക. 

ALSO READ: എട്ടാം ക്ലാസ് വിദ്യാര്‍ഥി ഷോക്കേറ്റ് മരിച്ച സംഭവം; അധ്യാപകര്‍ക്കെതിരെ നടപടി; പ്രധാനാധ്യാപികയെ സസ്‌പെന്‍ഡ് ചെയ്യും 

റാഗിങ്ങിന് ഇരയായ വിദ്യാർഥിയുടെ വിവരങ്ങൾ മാധ്യമങ്ങൾ പ്രസിദ്ധീകരിക്കരുതെന്നും നിർദേശത്തിലുണ്ട്. എന്നാൽ റാഗിങ് നടത്തുന്നവർക്ക് കർശന ശിക്ഷയും നിഷ്കർഷിക്കുന്നുണ്ട്. സസ്പെൻഷൻ, പുറത്താക്കൽ,ഫലം തടഞ്ഞുവയ്ക്കൽ, പ്രവേശനം റദ്ദാക്കൽ എന്നീ ശിക്ഷകൾ ലഭിക്കും. വ്യവസ്ഥകൾ പാലിക്കാത്ത സ്ഥാപനങ്ങൾക്കെതിരേയും നടപടിയുണ്ടാകും. ഇത്തരം സ്ഥാപനങ്ങളുടെ  സ്കോളർഷിപ്പുകളും മറ്റും പിൻവലിക്കുന്നതിനൊപ്പം  അംഗീകാരവും റദ്ദാക്കും.