ആലുവ: ആലുവയിൽ യുവാവ് ആത്മഹത്യ ചെയ്തു. എടയപ്പുറം സ്വദേശി യാഫിസാണ് മരിച്ചത്. ഗ്രാഫിക്സ് ഡിസൈനറായ യാഫിസിനെ വീട്ടിലാണ് മരിച്ച നിലയിൽ കണ്ടെത്തിയത്. മരണത്തിന് പിന്നിൽ ഓൺലൈൻ ഷെയർ ട്രേഡിങ് തട്ടിപ്പ് ആണെന്നാണ് വിവരം.

ഓൺലൈൻ ഷെയർ ട്രേഡിങ് തട്ടിപ്പിൽ പണം നഷ്ടമായതിന്റെ മനോവിഷമത്തിലാണ് ജീവനൊടുക്കിയതെന്നാണ് വിവരം. യാഫിസിന് തട്ടിപ്പിൽ 1.45 ലക്ഷം രൂപ നഷ്ടമായിരുന്നു. തട്ടിപ്പിൽ തന്റെയും പിതാവിന്റെയും പണം നഷ്ടമായെന്ന് കാണിച്ച് പൊലിസിന് പരാതി നൽകിയിട്ടുണ്ടെന്നും ആത്മഹത്യാക്കുറിപ്പിൽ പറയുന്നതായി പൊലിസ് അറിയിച്ചു. സംഭവത്തിൽ വിശദ അന്വേഷണത്തിനായി കേസ് കേസ് റൂറൽ സൈബർ പൊലിസിന് കൈമാറി.