2025 ഫിഫ ക്ലബ് ലോകകപ്പിലെ ഏറ്റവും മികച്ച ഗോളിനുള്ള അവാർഡ് സ്വന്തമാക്കി ബ്രസീലിയൻ താരം ലൂക്കാസ് റിബെയ്‌റോ കോസ്റ്റ. ആഫ്രിക്കൻ ക്ലബായ മാമെലോഡി സൺഡൗൺസ് ടീമിന്റെ താരമാണ് ലൂക്കാസ്. ക്ലബ് ലോകകപ്പിൽ ഗ്രൂപ്പ് ഘട്ടത്തിൽ ജർമൻ ക്ലബായ ബൊറൂസിയ ഡോർട്ട്മുണ്ടിനെതിരെയാണ് താരം ഗോൾ നേടിയത്. കോസ്റ്റ അതിശയകരമായ ഒരു സോളോ ഗോൾ നേടുകയായിരുന്നു. എന്നാൽ ആവേശം നിറഞ്ഞ മത്സരത്തിൽ 4-3 എന്ന സ്കോർ ലൈനിൽ അഫ്രിക്കൻ ടീം പരാജയപ്പെടുകയായിരുന്നു. 

ടൂർണമെന്റിൽ മികച്ച ഗോളുകൾ നേടിയ ഒരുപാട് താരങ്ങളുണ്ടായിട്ടും ഇവരെയെല്ലാം മറികടന്നുകൊണ്ടാണ് ബ്രസീലിയൻ താരം ഈ നേട്ടം സ്വന്തമാക്കിയത്. ടൂർണമെന്റിൽ ഇന്റർ മയാമിക്കായി ഒരു തകർപ്പൻ ഫ്രീ കിക്ക് ഗോൾ ലയണൽ മെസി നേടിയിരുന്നു.

ALSO READ: അവർ നാല് പേരുമാണ് ക്രിക്കറ്റിലെ ഇതിഹാസങ്ങൾ: ബ്രെയാൻ ലാറ

പോർച്ചുഗൽ ക്ലബ് പോർട്ടോക്കെതിരെയായിരുന്നു മെസിയുടെ ഫ്രീ കിക്ക് ഗോൾ പിറന്നത്. മത്സരത്തിൽ ഒന്നിനെതിരെ രണ്ട് ഗോളുകൾക്കായിരുന്നു ഇന്റർ മയാമി വിജയിച്ചത്. ഒരു ഗോളിന് പിന്നിൽ നിന്ന ശേഷം രണ്ട് ഗോൾ തിരിച്ചടിച്ചാണ് ഇന്റർ മയാമി വിജയിച്ചത്. ഫ്രീകിക്ക് ​ഗോളാക്കി മാറ്റി മെസിയാണ് മയാമിക്ക് വിജയം നേടിക്കൊടുത്തത്.  

 

സെമി ഫൈനലിൽ ചെൽസിയുടെ ബ്രസീലിയൻ താരം ജാവോ പെഡ്രോയും മികച്ചൊരു ഗോൾ സ്കോർ ചെയ്തിരുന്നു. ഫ്ലുമിനെൻസിനെതിരെയായിരുന്നു താരത്തിന്റെ മനോഹരമായ ഗോൾ പിറന്നത്. മത്സരത്തിൽ ഇരട്ട ഗോൾ നേടിയാണ് പെഡ്രോ തിളങ്ങിയത്. എതിരില്ലാത്ത രണ്ട് ഗോളുകൾക്കായിരുന്നു ചെൽസിയുടെ വിജയം. എന്നാൽ ഇവരെയെല്ലാം മറികടന്നുകൊണ്ട് കോസ്റ്റയുടെ ഗോളിനാണ് ഏറ്റവും കൂടുതൽ വോട്ടുകൾ ലഭിച്ചത്. ഗോൾ റിപ്പോർട്ട് ചെയ്‌തതനുസരിച്ച് 40000ത്തിലധികം ആളുകളാണ് ബ്രസീലിയൻ താരത്തിന്റെ ഗോളിന് വോട്ട് രേഖപ്പെടുത്തിയത്. 

2025 ഫിഫ ക്ലബ് വേൾഡ് കപ്പ് കിരീടം സ്വന്തമാക്കിയത് ഇംഗ്ലീഷ് വമ്പന്മാരായ ചെൽസിയാണ്. ഫൈനൽ പോരാട്ടത്തിൽ നിലവിലെ യുവേഫ ചാമ്പ്യൻസ് ലീഗ് ജേതാക്കളായ പാരീസ് സെയ്ന്റ് ജെർമെയ്നെ എതിരില്ലാത്ത മൂന്ന് ഗോളുകൾക്ക് തകർത്താണ് ചെൽസി കിരീടം ചൂടിയത്. ചെൽസിയുടെ രണ്ടാം ഫിഫ ക്ലബ്ബ് ലോകകപ്പ് കിരീടമാണിത്. ഇതിനുമുമ്പ് 2021ലാണ് ചെൽസി ക്ലബ്ബ് ലോകകപ്പ് നേടിയത്.

 

ഇതോടെ ഫിഫ ക്ലബ്ബ് ലോകകപ്പ് രണ്ട് തവണ നേടുന്ന ചരിത്രത്തിലെ ആദ്യ ഇംഗ്ലീഷ് ക്ലബ്ബായി മാറാനും ചെൽസിക്ക് സാധിച്ചു. നിലവിൽ ഫുട്ബോളിലെ എല്ലാ മേജർ കിരീടങ്ങളും സ്വന്തമാക്കിയ ടീം ചെൽസി മാത്രമാണ്. ഫിഫ ക്ലബ് വേൾഡ് കപ്പിന് പുറമെ ഇംഗ്ലീഷ് പ്രീമിയർ ലീഗ്, യുവേഫ ചാമ്പ്യൻസ് ലീഗ്, യുവേഫ യൂറോപ്പ ലീഗ്, ഇഎഫ്എൽ കപ്പ്, യുവേഫ കോൺഫറൻസ് ലീഗ്, എഫ്എ കപ്പ് എന്നീ കിരീടങ്ങളാണ് ചെൽസി സ്വന്തമാക്കിയിട്ടുള്ളത്. 

Brazilian player Lucas Ribeiro Costa has won the award for the best goal at the 2025 FIFA Club World Cup Lucas is a player for the African club Mamelodi Sundowns team