കോഴിക്കോട്: കോഴിക്കോട് ചെങ്ങോട്ടു കാവ് സ്വദേശി റിയാസിന്റെ കുടുംബത്തിന്റെ ജപ്തി ഭീഷണിയിലുള്ള വീട് ബാങ്ക് ജീവനക്കാരെത്തി പൂട്ടിപ്പോയതിനാല്‍ സ്‌കൂള്‍ വരാന്തയിലേക്ക് താമസം മാറ്റിയ കുടുംബത്തിന് താത്കാലിക ഭവനം നല്‍കി മുസ്‌ലിം ലീഗ്. ചെങ്ങോട്ടുകാവ് സ്വദേശി റിയാസിനും കുടുംബത്തിനുമാണ് ദുരവസ്ഥ നേരിടേണ്ടി വന്നത്.

പതിനൊന്നും പതിനാറും വയസുള്ള രണ്ടു കുട്ടികളടങ്ങുന്ന കുടുംബത്തെ താത്കാലികമായി പുനരധിവസിപ്പിച്ചു. ഇന്നലെ രാവിലെ പതിനൊന്ന് മണിയോടെയാണ് ബാങ്ക് ജീവനക്കാര്‍ പൊലിസുമായി ചെങ്ങോട്ടുകാവിലെ റിയാസിന്റെ വീട്ടിലേക്കെത്തിയത്. വീട്ടിലുണ്ടായിരുന്ന കുട്ടികളെയടക്കം ബലം പ്രയോഗിച്ച് വീട്ടില്‍ നിന്നിറക്കിയ ശേഷം ഗേറ്റ് താഴിട്ടു പൂട്ടുകയായിരുന്നു ജീവനക്കാര്‍.

ALSO READ: കണ്ണൂരിൽ മകനുമായി പുഴയിൽ ചാടി യുവതി മരിച്ച സംഭവം: ഭർതൃവീട്ടുകാരുടെ പീഡനമെന്ന് ആരോപണം; മൂന്ന് വയസ്സുകാരനായ മകനായി തിരച്ചിൽ

 തുടര്‍ന്നാണ് കുടുംബം തൊട്ടടുത്ത സ്‌കൂള്‍ വരാന്തയില്‍ പോയി അഭയം തേടിയത്. സംഭവം ശ്രദ്ധയില്‍ പെട്ട മുസ്‌ലിം ലീഗ് വിഷയത്തില്‍ ഇടപെടുകയും മുസ്‌ലിം ലീഗ് നഗരസഭ കൗണ്‍സിലര്‍ സാദിഖിന്റെ നേതൃത്വത്തില്‍ കുടുംബത്തെ തത്കാലം ഒരു വീട്ടിലേക്ക് മാറ്റുകയും ചെയ്തു.

സ്വകാര്യ ബാങ്കില്‍ നിന്നു ലോണെടുത്ത 44 ലക്ഷം രൂപയില്‍ 32 ലക്ഷം റിയാസ് തിരിച്ചടച്ചിരുന്നു. പ്രവാസിയായ റിയാസിന് കോവിഡ് പ്രതിസന്ധിയില്‍ ഖത്തറിലെ ജോലി നഷ്ടമായതോടെയാണ് തിരിച്ചടവ് മുടങ്ങിപ്പോയത്. തിരിച്ചടവിന് സാവകാശം ആവശ്യപ്പെട്ടെങ്കിലും ബാങ്കധികൃതര്‍ നല്‍കിയില്ലെന്നാണ് റിയാസ് ആരോപിക്കുന്നത്.