ചേലക്കര: കേരള പൊലിസിലെ ഇരട്ട സഹോദരന്മാർക്ക് തമ്മിൽ തല്ലിയതിന് സസ്‌പെൻഷൻ. ഗ്രേഡ് എസ്.ഐമാരും ഇരട്ടകളുമായ ദിലീപ് കുമാറിനെയും പ്രദീപ് കുമാറിനെയുമാണ് സസ്‌പെൻഡ് ചെയ്തത്. തൃശൂർ സിറ്റി പൊലിസ് കമ്മീഷണർ ഇളങ്കോ ഇരുവർക്കെതിരെയും നടപടി എടുത്തത്. പൊലിസിന് അവമതിപ്പുണ്ടാക്കിയതിനാണ് കമ്മീഷണർ സസ്പെൻസ് ചെയ്തത്. ഇരുവർക്കതിരെയും വകുപ്പ് നടപടിക്കും കമ്മീഷണർ ശുപാർശ ചെയ്തു. 

തൃശൂർ വടക്കാഞ്ചേരി പൊലിസ് സ്റ്റേഷനിലെ ഗ്രേഡ് എസ്.ഐയായ ദിലീപ് കുമാറും പഴയന്നൂർ പൊലിസ് സ്റ്റേഷനിലെ ഗ്രേഡ് എസ്.ഐയായ പ്രദീപ് കുമാറും തമ്മിൽ ഇന്നലെയാണ് തമ്മിൽ തള്ളിയത്. ചേലക്കരയിലെ ഇരുവരുടെയും വീടിന് മുന്നിൽ വച്ചായിരുന്നു പൊലിസിൽ അപൂർവമായ ഇരട്ടകൾ തമ്മിലുണ്ടായ തർക്കം കയ്യാങ്കളിയിലേക്ക് എത്തിയത്. തർക്കം ഒടുവിൽ പ്രദീപ് കുമാറിന്റെ കൈ ഒടിയുന്നതിലേക്ക് എത്തി. വീടിനടുത്ത് ചപ്പുചവറുകൾ ഇട്ടതുമായി ബന്ധപ്പെട്ട കാര്യമാണ് അക്രമത്തിലേക്ക് എത്തിയത്. 

ALSO READ: സുരേഷ് ഗോപിയുടെ പുലിപ്പല്ല് മാല: പരാതിക്കാരനായ യൂത്ത് കോൺഗ്രസ് നേതാവിന്റെ മൊഴി ഇന്ന് രേഖപ്പെടുത്തും

സംഭവത്തിന് പിന്നാലെ ഇരുവരും ചേലക്കര താലൂക്ക് ആശുപത്രിയിൽ ചികിത്സ തേടി. സസ്‌പെൻഷനും വകുപ്പ് തല അന്വേഷണത്തിനും പുറമെ ഇരുവർക്കുമെതിരെ കേസെടുക്കാനും നിദേശം നൽകിയിട്ടുണ്ട്. സംഭവം നടന്നത് ചേലക്കരയിലായതിനാൽ ചേലക്കര പൊലിസിനാണ് കേസെടുക്കാൻ നിർദേശം നൽകിയത്. 

അതേസമയം, ഇരട്ടകളായ പൊലിസ് സഹോദരങ്ങൾ തർക്കം ഉണ്ടാകുന്നത് ആദ്യത്തെ സംഭവമല്ലെന്നാണ് വിവരം. നേരത്തെ അതിർത്തി, സ്വത്ത് വിഷയങ്ങളിൽ ഇരുവരും തമ്മിൽ തർക്കം നിലനിന്നിരുന്നു. ചേലക്കരയിലെ സ്പെഷ്യൽ ബ്രാഞ്ച് ഉദ്യോഗസ്ഥനായിരുന്ന ദിലീപ് കുമാറിനെ അടുത്തിടെയാണ് വടക്കാഞ്ചേരിക്ക് സ്ഥലം മാറ്റിയത്.