രാജസ്ഥാൻ റോയൽസ് യുവതാരം വൈഭവ് സൂര്യവംശിയെ കണ്ടെത്തിയത് എങ്ങനെയാണെന്ന് തുറന്നു പറഞ്ഞിരിക്കുകയാണ് ശ്രീലങ്കൻ ഇതിഹാസം കുമാർ സംഗക്കാര. രാജസ്ഥാൻ റോയൽസിന്റെ ക്രിക്കറ്റ് അനലിസ്റ്റ് വിദഗ്ധരിൽ നിന്നും വൈഭവിനെക്കുറിച്ച് ലഭിച്ച ഒരു സന്ദേശത്തിന് ശേഷമാണ് രാജസ്ഥാൻ വൈഭവിനെ സ്വന്തമാക്കിയതെന്നാണ് സംഗക്കാര പറഞ്ഞത്. സ്‌കൈ സ്പോർട്സിന് നൽകിയ അഭിമുഖത്തിലാണ് സംഗക്കാര ഇക്കാര്യം പറഞ്ഞത്. 

വൈഭവ് സൂര്യവംശി വളരെ പ്രത്യേക കഴിവുള്ള ഒരു കളിക്കാരനാണെന്ന് ഇതിനകം തന്നെ തെളിയിച്ചിരുന്നു. രാജസ്ഥാൻ റോയൽസിന്റെ അനലിസ്റ്റ് വിദഗ്ധരിൽ ഒരാൾ ഒരു സന്ദേശം അയച്ചു, 'നമ്മൾ കാണേണ്ട, ട്രയൽസിന് പോകേണ്ട, ടീമിൽ എത്തിക്കാൻ നോക്കേണ്ട വളരെ പ്രത്യേക കഴിവുള്ള ഒരു കളിക്കാരനുണ്ട്' എന്നായിരുന്നു ആ സന്ദേശം" സംഗക്കാര പറഞ്ഞു.

കഴിഞ്ഞ ലേലത്തിൽ 1.10 കോടി രൂപക്കായിരുന്നു ഈ 14കാരനെ രാജസ്ഥാൻ തങ്ങളുടെ തട്ടകത്തിലെത്തിച്ചത്. ഇതോടെ ഐപിഎൽ ലേലത്തിൽ ടീമിൽ ഇടം നേടുന്ന ഏറ്റവും പ്രായം കുറഞ്ഞ താരമായും വൈഭവ് മാറിയിരുന്നു. ലഖ്‌നൗ സൂപ്പർ ജയന്റസിനെതിരെയുള്ള മത്സരത്തിലാണ് വൈഭവ് ഈ സീസണിൽ അരങ്ങേറ്റം കുറിച്ചത്. ഐപിഎല്ലിൽ അരങ്ങേറ്റം കുറിക്കുന്ന ഏറ്റവും പ്രായം കുറഞ്ഞ താരമായും വൈഭവ് മാറിയിരുന്നു. തന്റെ 14ാം വയസിലാണ് താരം ഈ ചരിത്രനേട്ടം തന്റെ പേരിലാക്കി മാറ്റിയത്.

2025 ഐപിഎല്ലിൽ രാജസ്ഥാനായി മിന്നും പ്രകടനമാണ് വൈഭവ് നടത്തിയിരുന്നത്. 2025 ഐപിഎൽ സീസണിൽ സൂപ്പർ സ്ട്രൈക്കർ അവാർഡ് സ്വന്തമാക്കിയത് വൈഭവ് സൂര്യവംശിയായിരുന്നു. രാജസ്ഥനായി ഏഴ് മത്സരങ്ങളിൽ നിന്നും ഒരു സെഞ്ച്വറിയും ഒരു അർദ്ധ സെഞ്ച്വറിയും ഉൾപ്പെടെ 252 റൺസാണ് നേടിയത്.

ഇംഗ്ലണ്ടിനെതിരായ അണ്ടർ 19 ഏകദിന പരമ്പരയിൽ മിന്നും പ്രകടനമാണ് യുവതാരം വൈഭവ് സൂര്യവംശി നടത്തിയത്. അഞ്ചു മത്സരങ്ങളുടെ പരമ്പരയിൽ 355 റൺസാണ് വൈഭവ് നേടിയത്. ഒരു സെഞ്ച്വറിയും അർദ്ധ സെഞ്ച്വറിയും ആണ് താരം പരമ്പരയിൽ നേടിയത്. 71 എന്ന മികച്ച ആവറേജിലും 174.01 സ്ട്രൈക്ക് റേറ്റിലും ആണ് വൈഭവ് സൂര്യവംശി ബാറ്റ് വീശിയത്. 

ഇംഗ്ലണ്ടിനെതിരെ 73 പന്തിൽ 143 റൺസ് നേടിയാണ് വൈഭവ് തിളങ്ങിയത്. 13 കൂറ്റൻ സിക്സുകളും 10 ഫോറുകളും ആണ് താരം അടിച്ചെടുത്തത്. 52 പന്തിൽ നിന്നുമാണ് താരം സെഞ്ച്വറി പൂർത്തിയാക്കിയത്. ഇതോടെ അണ്ടർ 19 ഏകദിനത്തിൽ സെഞ്ച്വറി നേടുന്ന ഏറ്റവും പ്രായം കുറഞ്ഞ താരമായി മാറാനും വൈഭവിന് സാധിച്ചു.

Sri Lankan legend Kumar Sangakkara has opened up about how he discovered Rajasthan Royals youngster Vaibhav Suryavanshi