ന്യൂഡല്‍ഹി: ഉപരാഷ്ട്രപതി ജഗദീപ് ധന്‍കര്‍(74)ന്റെ രാജിക്ക് പിന്നാലെ അടുത്തതാരെന്ന ഊഹാപോഹം പൊടിപൊടിക്കുകയാണ്. അക്കൂട്ടത്തില്‍ കോണ്‍ഗ്രസ് എം.പി ശശി തരൂരിന്റെ പേരാണ് ഏറ്റവും കൂടുതല്‍ ഉയര്‍ന്ന് കേള്‍ക്കുന്നത്. നിലവില്‍ കോണ്‍ഗ്രസുമായി വലിയ സ്വരച്ചേര്‍ച്ചയിലല്ലാത്ത തരൂര്‍ പരിഗണിക്കുന്നവരുടെ പട്ടികയില്‍ ഉണ്ടെന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. പാര്‍ലമെന്റിന്റെ വര്‍ഷകാല സമ്മേളനത്തില്‍ തന്നെ പുതിയ ഉപരാഷ്ട്രപതിയെ തെരഞ്ഞെടുക്കാന്‍ എന്‍.ഡി.എ ചര്‍ച്ച ആരംഭിച്ചതായാണ് റിപ്പോര്‍ട്ട്. തരൂരിന് പുറമേ കേരള മുന്‍ ഗവര്‍ണര്‍ ആരിഫ് മുഹമ്മദ് ഖാന്‍, ഗോവ മുന്‍ ഗവര്‍ണര്‍ പി.എസ് ശ്രീധരന്‍ പിള്ള തുടങ്ങിയവരും പരിഗണനയിലുണ്ടെന്നാണ് സൂചന. 

 തീര്‍ത്തും അപ്രതീക്ഷിതമായിരുന്നു ധന്‍കരുടെ രാജി. ആരോഗ്യപ്രശ്നങ്ങളെ തുടര്‍ന്നാണ് രാജിയെന്ന് രാഷ്ട്രപതി ദ്രൗപദി മുര്‍മുവിന് അയച്ച രാജിക്കത്തില്‍ അദ്ദേഹം വ്യക്തമാക്കുന്നത്. ഭരണഘടനയുടെ അനുച്ഛേദം 67(എ) പ്രകാരമാണ് തന്റെ രാജിയെന്നും രാജ്യത്തിന്റെ ശ്രദ്ധേയമായ സാമ്പത്തിക മുന്നേറ്റത്തിനും വികസനത്തിലും സാക്ഷിയാകാന്‍ സാധിച്ചതില്‍ സംതൃപ്തിയുണ്ടെന്നും ധന്‍കര്‍ പറഞ്ഞു. രാഷ്ട്രപതി, പ്രധാനമന്ത്രി, കേന്ദ്ര മന്ത്രിമാര്‍ തുടങ്ങിയവര്‍ക്ക് രാജിക്കത്തില്‍ അദ്ദേഹം നന്ദി അറിയിച്ചു.

2022 ഓഗസ്റ്റ് ആറിന് ഉപരാഷ്ട്രപതിയായി അധികാരമേറ്റ ധന്‍ഖറിന് രണ്ട് വര്‍ഷം ഇനിയും ബാക്കിയുണ്ട്. ഇന്നലെ പാര്‍ലമെന്റിന്റെ വര്‍ഷകാല സമ്മേളനത്തിന് തുടക്കമിട്ട് രാജ്യസഭ നിയന്ത്രിച്ച ശേഷമായിരുന്നു രാജിപ്രഖ്യാപനം. രാജി രാഷ്ട്രപതി ദ്രൗപദി മുര്‍മു സ്വീകരിച്ചാല്‍ രാജ്യസഭാ ഉപാധ്യക്ഷന്‍ ഹരിവന്‍ഷ് നാരായണിന്റെ അധ്യക്ഷതയില്‍ രാജ്യസഭ വര്‍ഷകാല സമ്മേളനം പുര്‍ത്തിയാക്കുമെന്നാണ് സൂചന. ലോക്‌സഭയിലെയും രാജ്യസഭയിലെയും എം.പിമാര്‍ വോട്ടു ചെയ്താണ് ഉപരാഷ്ട്രപതിയെ തെരഞ്ഞെടുക്കുക.

 1951 മെയ് 18ന് രാജസ്ഥാനിലെ കിതാന ഗ്രാമത്തില്‍ ജനിച്ച ധന്‍കര്‍ കോളജ് വിദ്യാഭ്യാസത്തിനുശേഷം 1979ല്‍ എല്‍.എല്‍.ബി പാസായി. തുടര്‍ന്ന് അഭിഭാഷകനായി. ഹൈക്കോടതി അഭിഭാഷകനായ ധന്‍കര്‍ സുപ്രിം കോടതിയിലും നിരവധി കേസുകളില്‍ ഹാജരായി. 2019 ജൂലൈ 30ന് പശ്ചിമ ബംഗാള്‍ ഗവര്‍ണറായി. അതോടെ മുഖ്യമന്ത്രി മമത ബാനര്‍ജിയും ഗവര്‍ണറും തമ്മിലെ ശീതസമരത്തിനു തുടക്കമായി. 2022ല്‍ ആണ് ഉപരാഷ്ട്രപതിയായി നിയമിതനായത്. രാഷ്ട്രീയ ജീവിതത്തിന്റെ തുടക്കത്തില്‍ ജനതാദളിലും കോണ്‍ഗ്രസിലും പ്രവര്‍ത്തിച്ച ധന്‍കര്‍ 2003ല്‍ ആണ് ബി.ജെ.പിയില്‍ ചേര്‍ന്നത്. 

എം.എല്‍.എയായും എം.പിയായും പ്രവര്‍ത്തിച്ച് അനുഭവസമ്പത്തു നേടിയ അദ്ദേഹം 1990ല്‍ ചന്ദ്രശേഖര്‍ മന്ത്രിസഭയില്‍ പാര്‍ലമെന്ററികാര്യ സഹമന്ത്രിയുമായി. ഉപരാഷ്ട്രപതിയായ ശേഷം സുപ്രിം കോടതിയുടെ വിവിധ ഉത്തരവുകള്‍ക്കെതിരേയുള്ള അദ്ദേഹത്തിന്റെ പ്രസ്താവന വിവാദമായി. ജഡ്ജിമാരെ നിയമിക്കുന്നതില്‍ നിയന്ത്രണം കൊണ്ടുവരാനുള്ള മോദി സര്‍ക്കാറിന്റെ ശ്രമത്തിനെതിരേ സുപ്രിംകോടതി വിധി പുറപ്പെടുവിച്ചപ്പോള്‍ ധന്‍കര്‍ വിമര്‍ശനമുയര്‍ത്തി. നിയമസഭ പാസാക്കിയ ബില്ലുകള്‍ വച്ചുതാമസിപ്പിച്ച തമിഴ്‌നാട് ഗവര്‍ണര്‍ ആര്‍.എന്‍ രവിക്കെതിരേ സുപ്രിംകോടതി വിധി പുറപ്പെടുവിച്ചപ്പോഴും ധന്‍കര്‍ എതിര്‍ ശബ്ദമുയര്‍ത്തി. പാര്‍ലമെന്റിനു മേല്‍ സുപ്രിം കോടതിക്ക് അധികാരമില്ലെന്നായിരുന്നു അദ്ദേഹത്തിന്റെ നിലപാട്. കഴിഞ്ഞ ആറിന് അദ്ദേഹം കേരളത്തിലെത്തിയിരുന്നു. സുതേഷ് ധന്‍കറാണ് ഭാര്യ. മകള്‍: കാംന.

Jagdeep Dhankhar has resigned as Vice President citing health reasons. With two years left in office, speculation is rife about his successor. Congress MP Shashi Tharoor, along with Arif Mohammed Khan and P.S. Sreedharan Pillai, are reportedly being considered. The NDA is likely to finalize a candidate before the Monsoon Session concludes.