ദോഹ: അമേരിക്കയുമായുള്ള സുരക്ഷാ പങ്കാളിത്തം പുനഃപരിശോധിക്കുന്നുവെന്ന യുഎസ് മാധ്യമ റിപ്പോർട്ടുകൾ നിഷേധിച്ച് ഖത്തർ. പ്രമുഖ മാധ്യമമായ ആക്സിയോസ് ഉന്നയിച്ച അവകാശവാദങ്ങൾ പൂർണമായും തെറ്റാണെന്ന് വിശേഷിപ്പിച്ച ഖത്തർ, ഇത് ഇരുരാജ്യങ്ങൾക്കുമിടയിൽ വിള്ളൽ വീഴ്ത്താനുള്ള ശ്രമം ആണെന്ന് കുറ്റപ്പെടുത്തുകയും ചെയ്തു.

ഖത്തറിന്റെ അന്താരാഷ്ട്ര മാധ്യമ ഓഫീസ് പുറത്തിറക്കിയ പ്രസ്താവനയിൽ യുഎസുമായുള്ള സുരക്ഷാ പങ്കാളിത്തം പുനഃപരിശോധിക്കുന്നുവെന്ന വാർത്തകളെ തള്ളിക്കളഞ്ഞു. 

ALSO READ: ഞങ്ങളുടെ മണ്ണില്‍ വെച്ച് ഹമാസ് അംഗങ്ങളെ ലക്ഷ്യം വെച്ചാല്‍ നിങ്ങളെ കാത്തിരിക്കുന്നത് വിനാശകരമായ പ്രത്യാഘാതങ്ങള്‍; കടുത്ത മുന്നറിയിപ്പുമായി ഈജിപത്

"മേഖലയിലെ അസ്ഥിരതയിൽ നിന്ന് ലാഭം കൊയ്യാനും സമാധാനത്തെ എതിർക്കാനും ശ്രമിക്കുന്നവരാണ് ഈ വ്യാജ പ്രചാരണത്തിന് പിന്നിൽ," പ്രസ്താവനയിൽ ആരോപിച്ചു. ഖത്തർ-യുഎസ് സുരക്ഷാ, പ്രതിരോധ സഹകരണം എക്കാലത്തേക്കാളും ശക്തമാണ് എന്നും അത് വളർന്നുകൊണ്ടിരിക്കുന്നുവെന്നും പ്രസ്താവനയിൽ വ്യക്തമാക്കി. "ഇരു രാജ്യങ്ങളും വർഷങ്ങളായി പരസ്പരം പിന്തുണച്ചിട്ടുണ്ട്. ആഗോള സമാധാനവും സ്ഥിരതയും പ്രോത്സാഹിപ്പിക്കാൻ ഞങ്ങൾ ഒന്നിച്ച് പ്രവർത്തിക്കും," പ്രസ്താവനയിൽ പറയുന്നു.

ദോഹയിലെ ഇസ്റാഈൽ ആക്രമണത്തിന്റെ പശ്ചാത്തലത്തിലാണ് ആക്സിയോസ് അടക്കമുള്ള മാധ്യമങ്ങൾ വാർത്ത പ്രചരിപ്പിച്ചത്. ചൊവ്വാഴ്ച പ്രാദേശിക സമയം വൈകീട്ട് 3.50ന് ദോഹയിലെ ഹമാസ് നേതാക്കൾ തങ്ങിയ കെട്ടിടത്തിന് ഇസ്‌റാഈൽ ആക്രമണമുണ്ടായത്. 12 തവണയാണ് ഇസ്റാഈൽ ആക്രമണം നടത്തിയത്. ആക്രമണത്തിൽ അഞ്ച് ഹമാസ് പ്രതിനിധികളും ഖത്തർ സുരക്ഷ ഉദ്യോഗസ്ഥനും കൊല്ലപ്പെട്ടിരുന്നു. അതേസമയം, ഇസ്റാഈൽ ലക്ഷ്യമിട്ട ഹമാസിന്റെ മുൻനിര നേതാക്കൾ അദ്ഭുതകരമായി രക്ഷപ്പെട്ടു. ആക്രമണത്തിൽ നിരവധി സുരക്ഷ ഉദ്യോഗസ്ഥർക്ക് പരുക്കേൽക്കുകയും ചെയ്തിരുന്നു.

Qatar has dismissed Axios reports suggesting a review of its security partnership with the US, calling them "completely false." The nation emphasizes its robust and growing defense cooperation with the US, aimed at promoting global peace and stability.