പുതുച്ചേരിയിലെ ജിപ്മർ (ജവഹർലാൽ ഇൻസ്റ്റിറ്റ്യൂട്ട് ഓഫ് പോസ്റ്റ് ഗ്രാജ്വേറ്റ് മെഡിക്കൽ എജ്യുക്കേഷൻ ആൻഡ് റിസർച്) ബി.എസ്.സി നഴ്‌സിങ്, ബി.എസ്.സി അലൈഡ് ഹെൽത്ത് സയൻസസ് പ്രോഗ്രാമുകളുടെ പ്രവേശനത്തിന് അപേക്ഷ ക്ഷണിച്ചു. 

പ്രോഗ്രാമുകൾ

ബി.എസ്.സി നഴ്‌സിങ്: 94 സീറ്റുകൾ (പെൺകുട്ടികൾ - 85, ആൺകുട്ടികൾ 9). 24 ആഴ്ച ദൈർഘ്യമുള്ള പെയ്ഡ് ഇന്റേൺഷിപ്പടക്കം നാല് വർഷ പ്രോഗ്രാം.

ബി.എസ്.സി അലൈഡ് ഹെൽത്ത് സയൻസസ് പ്രോഗ്രാമുകൾ: ആകെ 87 സീറ്റുകൾ. ആറ് മാസം / ഒരു വർഷത്തെ നിർബന്ധിത ഇന്റേൺഷിപ്പടക്കം  നാല് വർഷ പ്രോഗ്രാമുകൾ

(ബാച്ച്‌ലർ ഓഫ് മെഡിക്കൽ ലബോറട്ടറി സയൻസസ് -37 സീറ്റുകൾ. അനസ്‌തേഷ്യാ ടെക്‌നോളജി, ബാച്‌ലർ ഓഫ് ഓപ്‌റ്റോമെട്രി, കാർഡിയാക് ലബോറട്ടറി ടെക്‌നോളജി, ഡയാലിസിസ് തെറാപ്പി ടെക്‌നോളജി, മെഡിക്കൽ ലബോറട്ടറി ടെക്‌നോളജി ഇൻ ബ്ലഡ് ബാങ്കിങ്, മെഡിക്കൽ റേഡിയോളജി ആൻഡ് ഇമേജിങ് ടെക്‌നോളജി, ന്യൂറോ ടെക്‌നോളജി, ന്യൂക്ലിയാർ മെഡിസിൻ ടെക്‌നോളജി, പെർഫ്യൂഷൻ ടെക്‌നോളജി, റേഡിയോതെറാപ്പി ടെക്‌നോളജി എന്നിവ 5 സീറ്റുകൾ വീതം).

യോഗ്യത

നീറ്റ് യു.ജി. (നാഷനൽ എലിജിബിലിറ്റി കം എൻട്രൻസ് ടെസ്റ്റ്- അണ്ടർ ഗ്രാജ്വേറ്റ്) 2025 ൽ  യോഗ്യത നേടണം. 
ഫിസിക്‌സ്, കെമിസ്ട്രി, ബയോളജി/ബോട്ടണി ആൻഡ് സുവോളജി, ഇംഗ്ലിഷ് വിഷയങ്ങളിൽ  മൊത്തത്തിൽ 50 ശതമാനം മാർക്ക് നേടി പ്ലസ്ടു പരീക്ഷ ജയിച്ചിരിക്കണം. (പട്ടിക, ഒ.ബി.സി. വിഭാഗക്കാർക്ക് 40 ശതമാനവും ജനറൽ യു.ആർ, ഇ.ഡബ്ല്യു.എസ് വിഭാഗത്തിലെ  ഭിന്നശേഷിക്കാർക്ക് 45 ശതമാനവും മതി). 2025 ഡിസംബർ 31ന് 17 വയസ് പൂർത്തിയാകണം. ഉയർന്ന പ്രായപരിധിയില്ല.

രജിസ്‌ട്രേഷൻ 22 വരെ 

www.jipmer.edu.in വഴി സെപ്റ്റംബർ  22-ന് വൈകീട്ട് നാലിനകം രജിസ്റ്റർ ചെയ്യാം. നീറ്റ്  റാങ്ക് അടിസ്ഥാനമാക്കി, കൗൺസലിങ്ങിന് അർഹത നേടുന്നവരുടെ ലിസ്റ്റ് ഒക്ടോബർ എട്ടിനകം പ്രസിദ്ധീകരിക്കും. 
ജിപ്മറിൽ നടത്തുന്ന കൗൺസലിങ് പ്രക്രിയയുടെ വിശദാംശങ്ങൾക്കായി ഇടക്കിടെ വെബ്‌സൈറ്റ് സന്ദർശിക്കണം.  
ഒക്ടോബർ 27ന് ക്ലാസുകൾ ആരംഭിക്കും. 1200 രൂപ ട്യൂഷൻ ഫീസടക്കം 11410 രൂപയാണ് പ്രവേശന സമയത്ത് അടക്കേണ്ടത്. ലഭിച്ച സീറ്റ് വേണ്ടെന്ന് വയ്ക്കുകയാണെങ്കിൽ പിഴ അടക്കേണ്ടി വരും. വിശദാംശങ്ങൾ പ്രോസ്പക്ടസിലുണ്ട്. വെബ്‌സൈറ്റ്: www.jipmer.edu.in. ഇമെയിൽ: [email protected]. ഫോൺ :0413 2298288.