മുംബൈ: 10.58 കിലോമീറ്റർ ദൂരത്തിൽ 236 ക്യാമറകൾ സ്ഥാപിച്ച് സുരക്ഷയൊരുക്കിയിരിക്കുകയാണ് ബ്രിഹൻമുംബൈ മുനിസിപ്പൽ കോർപ്പറേഷൻ (ബിഎംസി). മുംബൈ കോസ്റ്റൽ റോഡിലാണ് സ്മാർട്ട് സിസിടിവി നിരീക്ഷണ സംവിധാനം സ്ഥാപിച്ചത്. സുരക്ഷ മെച്ചപ്പെടുത്തുന്നതിനും തത്സമയം ഗതാഗതം നിരീക്ഷിക്കുന്നതിനുമായാണ് ആകെ 236 ക്യാമറകൾ സ്ഥാപിച്ചത്. പ്രിൻസസ് സ്ട്രീറ്റ് ഫ്ലൈഓവറിന് സമീപമുള്ള ഷമൽദാസ് ഗാന്ധി മാർഗ് മുതൽ ബാന്ദ്ര-വോർലി സീ ലിങ്കിന്റെ വോർലി അവസാനം വരെയുള്ള 10.58 കിലോമീറ്റർ റോഡിലാണ് ഈ സംവിധാനം പ്രവർത്തിക്കുന്നത്. ഈ റോഡിൽ 3.4 കിലോമീറ്റർ ദൈർഘ്യമുള്ള ഒരു ഇരട്ട തുരങ്കം ഉൾപ്പെടുന്നുണ്ട്.

നിരവധി വാഹന തകരാറുകളും അപകടങ്ങളും ഈ റോഡിൽ റിപ്പോർട്ട് ചെയ്തതിനെ തുടർന്നാണ് ക്യാമറകൾ സ്ഥാപിച്ചത്. ഫെബ്രുവരി മുതൽ നാല് അപകടങ്ങളും 38 വാഹന തകരാറുകളും ഉണ്ടായിട്ടുണ്ട്. ഈ സംഭവങ്ങൾ തുരങ്ക പാതയുടെ സുരക്ഷയെയും കുറിച്ചുള്ള ആശങ്കകൾ ഉയർത്തിയിരുന്നു. ഇത് പരിഹരിക്കുന്നതിനായി, അപകടങ്ങളോ തെറ്റായ വഴിയിലൂടെ വാഹനമോടിക്കുകയോ ചെയ്താൽ കൺട്രോൾ റൂമിലേക്ക് തൽക്ഷണ സന്ദേശം അയയ്ക്കുന്ന നൂതന ക്യാമറകളാണ് ബിഎംസി സ്ഥാപിച്ചത്.

ആകെ 10.58 കിലോമീറ്റർ റോഡിൽ 3.4 കിലോമീറ്റർ ദൈർഘ്യമുള്ള ഒരു ഇരട്ട തുരങ്കം ഉണ്ട്. ചില സ്ഥലങ്ങളിൽ, നാല് വരി പാതകൾ രണ്ടായി  ചുരുങ്ങുന്നു. ഇത് ഗതാഗത തടസ്സങ്ങൾക്ക് കാരണമാകുന്നുണ്ട്. വാഹനങ്ങളുടെ തകരാറുകളും അമിത വേഗതയും, പ്രത്യേകിച്ച് ആഡംബര കാറുകളുടെ വേഗതയും പല അപകടങ്ങൾക്കും റോഡ് ബ്ലോക്കിനും കാരണമായി.

ALSO READ: ഹെൻലി പാസ്പോർട്ട് ഇൻഡക്സിൽ കുതിച്ചുയർന്ന് ഇന്ത്യൻ പാസ്‌പോർട്ട്; ഒമ്പത് സ്ഥാനം മെച്ചപ്പെടുത്തി

ഇത് നേരിടുന്നതിനായി, ഇരട്ട തുരങ്കങ്ങൾക്കുള്ളിൽ 154 ക്യാമറകൾ സ്ഥാപിച്ചു. വീഡിയോ ഇൻസിഡന്റ് ഡിറ്റക്ഷൻ സിസ്റ്റം എന്ന സിസ്റ്റത്തിന്റെ ഭാഗമായാണ് ക്യാമറകൾ സ്ഥാപിച്ചത്. പദ്ധതയുടെ ഭാഗമായി ഓരോ 50 മീറ്ററിലും ക്യാമറകൾ സ്ഥാപിച്ചു. അപകടങ്ങൾ, സ്തംഭിച്ച വാഹനങ്ങൾ, തെറ്റായ ദിശയിൽ ഓടുന്ന വാഹനങ്ങൾ എന്നിവ ഈ ക്യാമറകൾ കണ്ടെത്തുന്നു. തുരങ്കത്തിന്റെ പ്രവേശന, എക്സിറ്റ് പോയിന്റുകളിൽ ഓട്ടോമാറ്റിക് ട്രാഫിക് കൗണ്ടിംഗ് ക്യാമറകളും സ്ഥാപിച്ചിട്ടുണ്ട്. റോഡ് ഉപയോഗിക്കുന്ന വാഹനങ്ങളുടെ എണ്ണം, തരം തുടങ്ങിയ വിവരങ്ങൾ ഈ ക്യാമറകൾ ശേഖരിക്കുന്നു.

ഏഴ് ഓട്ടോമാറ്റിക് നമ്പർ പ്ലേറ്റ് തിരിച്ചറിയൽ ക്യാമറകൾ റോഡരികിൽ സ്ഥാപിച്ചിട്ടുണ്ട്. വേഗത പരിധി കവിയുന്ന വാഹനങ്ങൾ തിരിച്ചറിയാൻ ഈ ക്യാമറകൾ സഹായിക്കുന്നു. അമിതവേഗതയിൽ വാഹനമോടിക്കുന്നവർക്കെതിരെ നടപടിയെടുക്കാനും ഇത് സഹായിക്കുന്നു. ക്യാമറകളിൽ നിന്നുള്ള എല്ലാ ഡാറ്റയും തത്സമയം ബിഎംസിയ്ക്കും മുംബൈ ട്രാഫിക് പൊലിസിനും ലഭിക്കും. റോഡിലെ ഓട്ടം, വേഗത, ശബ്ദം എന്നിവ നിയന്ത്രിക്കാൻ ക്യാമറകൾ സഹായിക്കുമെന്നാണ് ബിഎംസിയുടെ പ്രതീക്ഷ.