തിരുവനന്തപുരം: കേരളത്തിന്റെ വിപ്ലവനേതാവ് വി.എസ്. അച്യുതാനന്ദന് തലസ്ഥാനത്ത് നിന്ന് ആലപ്പുഴയിലെ വിപ്ലവ മണ്ണിലേക്ക് തിരിച്ചുവരവില്ലാത്ത യാത്ര. സെക്രട്ടേറിയേറ്റ് പരിസരത്ത് മുദ്രാവാക്യങ്ങളോടെ ജനലക്ഷങ്ങൾ ഒത്തുചേർന്നാണ് തങ്ങളുടെ പ്രിയനേതാവിനെ യാത്രയാക്കിയത്. റോഡിന്റെ ഇരുവശങ്ങളിലും നിരവധി പേർ വിഎസിന്റെ അന്ത്യദർശനത്തിനായി കാത്തുനിന്നു.

വിഎസിന്റെ ഭൗതികശരീരം ആലപ്പുഴയിലെ വേലിക്കകത്തെ വീട്ടിലേക്കാണ് വിലാപയാത്രയായി കൊണ്ടുപോകുന്നത്. വീട്ടിൽ പൊതുദർശനത്തിന് ശേഷം, നാളെ രാവിലെ ആലപ്പുഴ ജില്ലാ കമ്മിറ്റി ഓഫീസിൽ വീണ്ടും പൊതുദർശനം നടക്കും. വൈകിട്ടോടെ വലിയ ചുടുകാട്ടിൽ സംസ്കാരം നടത്തും. സമരഭൂമിയിൽ വിഎസ് അന്ത്യവിശ്രമം കൊള്ളും.

 ഹൃദയാഘാതത്തെ തുടർന്ന് തിരുവനന്തപുരം എസ്‌യുടി ആശുപത്രിയിലെ തീവ്രപരിചരണ വിഭാഗത്തിൽ പ്രവേശിപ്പിക്കപ്പെട്ട വിഎസിന് പിന്നീട് ആരോഗ്യനില മെച്ചപ്പെടുത്താനായില്ല. വെന്റിലേറ്റർ സഹായത്തോടെ ചികിത്സ തുടർന്നെങ്കിലും, 101-ാം വയസ്സിൽ അദ്ദേഹം വിടവാങ്ങി.

കേരളത്തിന്റെ ഏറ്റവും ജനകീയ മുഖ്യമന്ത്രിയും പ്രതിപക്ഷനേതാവുമായിരുന്ന വിഎസ്, സിപിഐഎമ്മിന്റെ പൊളിറ്റ് ബ്യൂറോ അംഗം, സംസ്ഥാന സെക്രട്ടറി തുടങ്ങിയ നിർണായക പദവികളിൽ പ്രവർത്തിച്ചു. അവിഭക്ത കമ്മ്യൂണിസ്റ്റ് പാർട്ടിയുടെ നാഷണൽ കൗൺസിലിൽ നിന്ന് സിപിഐഎം രൂപീകരിക്കുന്നതിൽ മുൻനിരയിൽ നിന്ന അവസാന നേതാവായിരുന്നു അദ്ദേഹം. തിരുവിതാംകൂറിലെയും ഐക്യകേരളത്തിലെയും തൊഴിലാളി വർഗ പോരാട്ടങ്ങളുടെ ഒരു യുഗം വിഎസിന്റെ വിയോഗത്തോടെ അവസാനിച്ചിരിക്കുന്നു.

Red Salute to veteran leader V.S. Achuthanandan as his final journey from Thiruvananthapuram to his hometown in Alappuzha begins. Thousands lined the roadsides to pay their last respects, chanting slogans and bidding farewell. His mortal remains will be kept for public homage before the cremation at Alappuzha's Valiyachudukad on Tuesday evening.