ജബൽപൂർ (മധ്യപ്രദേശ്): "ഓടും കുതിര, ചാടും കുതിര, വെള്ളം കണ്ടാൽ നിൽക്കും കുതിര..."- ഈ കടങ്കഥയ്ക്ക് ജബൽപൂരിൽ ഒരു പുതിയ തിരക്കഥ! ഓടിക്കൊണ്ടിരുന്ന ഓട്ടോറിക്ഷയിൽ അബദ്ധത്തിൽ അകപ്പെട്ട ഒരു കുതിരയാണ് ഇപ്പോൾ നഗരത്തിലെ താരം. പക്ഷേ, കയറിയ ആവേശത്തിൽ എത്തിയ കുതിരയ്ക്ക് ഇറങ്ങാൻ അത്ര എളുപ്പമായിരുന്നില്ല. മണിക്കൂറുകളോളം ഓട്ടോയിൽ കുടുങ്ങിക്കിടന്ന കുതിരയെ പുറത്തെടുക്കാൻ നാട്ടുകാർക്ക് പതിനെട്ടടവും പയറ്റേണ്ടി വന്നു.

സംഭവം നടന്നത് ജബൽപൂരിലെ നാഗർത്ത് ചൗക്കിന് സമീപം. രണ്ട് തെരുവ് കുതിരകൾ തമ്മിൽ വഴക്കുണ്ടായതാണ് കഥയുടെ തുടക്കം. പരസ്പരം ഏറ്റുമുട്ടിയ കുതിരകൾ ആദ്യം ഒരു ഷോറൂം തകർത്തു. തുടർന്ന്, ഒരു കുതിര ഓടിക്കൊണ്ടിരുന്ന ഓട്ടോറിക്ഷയിലേക്ക് ആവേശത്തിൽ ചാടിക്കയറുകയായിരുന്നു എന്ന് ദൃക്സാക്ഷികൾ പറയുന്നു.

പക്ഷേ, ഈ ‘ചാട്ടം’ അത്ര ലളിതമായിരുന്നില്ല. ഓട്ടോയിൽ ഉണ്ടായിരുന്ന രണ്ട് യാത്രക്കാർക്ക് പരിക്കേറ്റു. അവരെ ഉടൻ ആംബുലൻസിൽ ആശുപത്രിയിലേക്ക് മാറ്റി. ശേഷം, കുതിരയെ പുറത്തെടുക്കാനുള്ള ശ്രമമായി നാട്ടുകാരുടെ ഊഴം. മണിക്കൂറുകളോളം പരിശ്രമിച്ചിട്ടും കുതിര ‘അനങ്ങാൻ’ തയ്യാറായില്ല. ഒടുവിൽ വലിയ പാടുപെട്ടാണ് കക്ഷിയെ ഓട്ടോയിൽ നിന്ന് ‘മോചിപ്പിച്ചത്’.

നഗരത്തിൽ അലഞ്ഞുതിരിയുന്ന തെരുവ് മൃഗങ്ങളുടെ ശല്യം ജനജീവിതത്തെ ദുസ്സഹമാക്കുന്നുവെന്നാണ് നാട്ടുകാരുടെ പരാതി. തെരുവ് കുതിരകൾ വലിയ ഭീഷണിയായി മാറുന്നതായും ഇവയെ പിടികൂടി പ്രശ്നത്തിന് പരിഹാരം കാണണമെന്നും നാട്ടുകാർ ആവശ്യപ്പെടുന്നു.

സംഭവത്തിന്റെ വീഡിയോ ദൃശ്യങ്ങൾ സോഷ്യൽ മീഡിയയിൽ വൈറലാണ്. രസകരമായ കമന്റുകൾക്കൊപ്പം ഗൗരവമായ അഭിപ്രായങ്ങളും വീഡിയോയ്ക്ക് താഴെ നിരവധി. "ഒരു കുതിരയുടെ ഓട്ടോ സവാരി" എന്ന് തമാശയായി ചിലർ കമന്റ് ചെയ്തപ്പോൾ, തെരുവ് മൃഗങ്ങളുടെ ശല്യത്തെക്കുറിച്ച് ഗൗരവമായ ചർച്ചകളും സോഷ്യൽ മീഡിയയിൽ സജീവമാണ്.

In a bizarre incident in Jabalpur, a street horse jumped into a moving auto-rickshaw after a fight with another horse, injuring two passengers. Locals demand stricter stray animal control.