തിരുവനന്തപുരം: രാജ്യത്തിന്റെ തെക്കൻ തീരദേശ സുരക്ഷ ശക്തിപ്പെടുത്തുന്നതിന്റെ ഭാഗമായി ഇന്ത്യൻ നാവികസേനയുടെ അതിവേഗ ആക്രമണ യുദ്ധക്കപ്പലായ ഐഎൻഎസ് കബ്ര വിഴിഞ്ഞം തുറമുഖത്ത് എത്തി. കൊച്ചിയിൽ നിന്നും എത്തിയ കപ്പൽ വിഴിഞ്ഞം മാരിടൈം ബോർഡിന്റെ പുതിയ വാർഫിൽ അടുത്തിട്ടുണ്ട്. തെക്കൻ തീരപ്രദേശത്തെ നിരീക്ഷണവും സുരക്ഷാ പരിശോധനകളും ശക്തമാക്കുന്നതിന്റെ ഭാഗമായാണ് ഈ സന്ദർശനം.

നാവികസേനയുടെ അതിവേഗ ആക്രമണ പരമ്പരയിൽപ്പെട്ട പ്രമുഖ കപ്പലാണ് ഐഎൻഎസ് കബ്ര. ആൻഡമാൻ നിക്കോബാർ ദ്വീപ് സമൂഹത്തിലെ ഒരു ദ്വീപിന്റെ പേരാണ് ഈ കപ്പലിന് നൽകിയിട്ടുള്ളത്. നേരത്തെ പലതവണ വിഴിഞ്ഞം തുറമുഖത്ത് പട്രോളിങിന്റെ ഭാഗമായി എത്തിയിട്ടുണ്ട്. കപ്പലിന്റെ സന്ദർശനം തീരദേശ സുരക്ഷയ്ക്ക് കൂടുതൽ ശക്തി പകരുന്നതിന്റെ ഭാഗമാണെന്ന് നാവികസേനാ വൃത്തങ്ങൾ അറിയിച്ചു.

വിഴിഞ്ഞം തുറമുഖത്ത് കപ്പലിനെ തുറമുഖ ചുമതലയുള്ള എസ്. വിനുലാൽ, അസിസ്റ്റന്റ് പോർട്ട് കൺസർവേറ്റർ എം.എസ്. അജീഷ് എന്നിവർ ചേർന്ന് സ്വീകരിച്ചു. നാല് ഓഫിസർമാരും 42 നാവികരും അടങ്ങുന്ന സംഘമാണ് ഐഎൻഎസ് കബ്രയിലുള്ളത്. അത്യാധുനിക സാങ്കേതികവിദ്യകളും ആയുധ സംവിധാനങ്ങളും ഉൾക്കൊള്ളുന്ന കപ്പൽ തീരദേശ പട്രോളിങിനും അടിയന്തര സാഹചര്യങ്ങളിൽ വേഗത്തിലുള്ള പ്രതികരണത്തിനും പ്രാപ്തമാണ്.

വിഴിഞ്ഞം തുറമുഖത്തെ പട്രോളിങ് ദൗത്യം പൂർത്തിയാക്കിയ ശേഷം ഐഎൻഎസ് കബ്ര നാളെ (സെപ്റ്റംബർ 12,) വൈകിട്ടോടെ കൊച്ചിയിലേക്ക് മടങ്ങും. തെക്കൻ തീരപ്രദേശത്തെ സുരക്ഷ ഉറപ്പാക്കുന്നതിനും അന്താരാഷ്ട്ര ജലപാതകളിലെ നിരീക്ഷണം ശക്തമാക്കുന്നതിനും ഇത്തരം പട്രോളിങ് ദൗത്യങ്ങൾ നിർണായകമാണെന്ന് നാവികസേനാ വൃത്തങ്ങൾ വ്യക്തമാക്കി.

വിഴിഞ്ഞം തുറമുഖം, രാജ്യത്തെ ഏറ്റവും പ്രധാനപ്പെട്ട തന്ത്രപരമായ തുറമുഖങ്ങളിലൊന്നായി മാറിക്കൊണ്ടിരിക്കുന്ന സാഹചര്യത്തിൽ, ഐഎൻഎസ് കബ്രയുടെ സന്ദർശനം തുറമുഖത്തിന്റെ സുരക്ഷാ പ്രാധാന്യം വർധിപ്പിക്കുന്നതാണ്. കഴിഞ്ഞ കുറച്ച് വർഷങ്ങളായി വിഴിഞ്ഞം തുറമുഖം വാണിജ്യ, സുരക്ഷാ മേഖലകളിൽ വലിയ മുന്നേറ്റം നടത്തിയിട്ടുണ്ട്. ഇന്ത്യൻ നാവികസേനയുടെ ഇത്തരം ദൗത്യങ്ങൾ തീരദേശ സുരക്ഷയ്ക്ക് പുറമെ, തുറമുഖത്തിന്റെ പ്രവർത്തനക്ഷമത വർധിപ്പിക്കുന്നതിനും സഹായിക്കുന്നു.

The Indian Navy's fast attack warship INS Kabra arrived at Vizhinjam port to bolster coastal security and surveillance in the southern region. Deployed from Kochi, the vessel, part of the Navy’s elite Car Nicobar-class, docked at Vizhinjam’s new wharf for routine patrolling. Led by four officers and 42 sailors, the ship will return to Kochi by tomorrow evening after completing its mission.