മധ്യപ്രദേശ്: ഓടിക്കൊണ്ടിരിക്കുന്ന ഓട്ടോയിലേക്ക് കുതിര ഇടിച്ച് കയറി അപകടം. മധ്യപ്രദേശിലെ ജബൽപൂരിനടുത്ത് നാഗരത് ചൗക്കിലാണ് അപകടമുണ്ടായത്. നഗരത്തിൽ അലഞ്ഞ് തിരിഞ്ഞ് നടന്നിരുന്ന കുതിരകൾ തമ്മിൽ ഏറ്റുമുട്ടിയതാണ് സംഭവത്തിന് തുടക്കം. പരസ്പരം പോരടിക്കുന്നതിനിടെ കുതറി ഓടിയ കുതിരകളിൽ ഒന്ന്, യാത്രക്കാരുമായി കടന്നു പോവുകയായിരുന്ന ഇ-റിക്ഷയിലേക്ക് ചാടുകയായിരുന്നു, മറ്റൊന്ന് സമീപത്തെ ഷോറൂമിലേക്ക് ഇരച്ചുകയറി വസ്തുവകകൾക്ക് നാശനഷ്ടവും വരുത്തി. അപകടത്തിൽ ഓട്ടോറിക്ഷയിലെ രണ്ട് യാത്രക്കാർക്കും ഡ്രൈവർക്കും പരുക്കേറ്റു. സമീപത്തുണ്ടായിരുന്നവർ ഓടിയെത്തി പരുക്കേറ്റവരെ വാഹനത്തിൽ നിന്ന് പുറത്തെടുത്ത്  ആംബുലൻസിൽ ആശുപത്രിയിലേക്ക് മാറ്റി കുതിരയ്ക്കും പരുക്കേറ്റതായാണ് റിപ്പോർട്ട്. 

പക്ഷേ, കയറിയ ആവേശത്തിൽ എത്തിയ കുതിരയ്ക്ക് ഇറങ്ങാൻ അത്ര എളുപ്പമായിരുന്നില്ല. മണിക്കൂറുകളോളം ഓട്ടോയിൽ കുടുങ്ങിക്കിടന്ന കുതിരയെ പുറത്തെടുക്കാൻ നാട്ടുകാർക്ക് പതിനെട്ടടവും പയറ്റേണ്ടി വന്നു. പരിശ്രമത്തിനൊടുവിൽ  നാട്ടുകാർ കുതിരയെ വാഹനത്തിൽ നിന്ന് രക്ഷപ്പെടുത്തി.

 

 

കഴിഞ്ഞ രണ്ട്-മൂന്ന് ദിവസങ്ങളായി നാഗരത് ചൗക്കിൽ ഈ കുതിരകൾ തമ്മിൽ ഏറ്റുമുട്ടിയിരുന്നത് കണ്ടതായി പ്രദേശവാസികൾ പറയുന്നു. നഗരസഭയെ വിവരം അറിയിച്ചിരുന്നെങ്കിലും യാതൊരു നടപടിയും സ്വീകരിച്ചില്ലെന്ന് നാട്ടുകാർ ആരോപിച്ചു. കുതിരകളുടെ ഉടമകൾക്കെതിരെ കർശന നടപടി എടുക്കണമെന്നും ആവശ്യപ്പെട്ടു.  അതേസമയം ഓട്ടോറിക്ഷയ്ക്കുള്ളിൽ കുടുങ്ങിയ കുതിരയുടെ വീഡിയോ സോഷ്യൽ മീഡിയയിൽ വൈറലായി. 

An auto-rickshaw carrying passengers was involved in an accident when a horse collided with it, resulting in injuries to both the passengers and the driver