കൊച്ചി: സി.എം.ആർ.എൽ-എക്‌സാലോജിക് ഇടപാടുമായി ബന്ധപ്പെട്ട കോർപ്പറേറ്റ് തട്ടിപ്പിൽ മുഖ്യമന്ത്രിയുടെ മകൾ ടി. വീണ വിജയനടക്കം 13 പേർക്ക് കേരള ഹൈക്കോടതി നോട്ടിസ് അയച്ചു. ബി.ജെ.പി നേതാവ് ഷോൺ ജോർജ് സമർപ്പിച്ച ഹരജിയിന്മേൽ ജസ്റ്റിസ് സി.എസ്. ഡയസിന്റെ നേതൃത്വത്തിലുള്ള ബെഞ്ചിന്റേതാണ് നടപടി.  എസ്.എഫ്.ഐ.ഒ അന്വേഷണം പരിമിതമായിരുന്നുവെന്നും ഫണ്ടുകളുടെ യഥാർത്ഥ ഉറവിടവും ഉദ്ദേശ്യവും വെളിപ്പെടുത്താൻ വിശദമായ അന്വേഷണം ആവശ്യമാണെന്നും ഷോൺ ജോർജ് സമർപ്പിച്ച ഹരജിയിൽ പറയുന്നു.
അഴിമതി, കള്ളപ്പണ വെളുപ്പിക്കൽ തുടങ്ങിയ ഗുരുതരമായ കുറ്റകൃത്യങ്ങൾ അന്വേഷിക്കാൻ സി.ബി.ഐ, ഇ.ഡി ഏജൻസികൾക്ക് നിർദേശം നൽകണമെന്നാണ് ഹരജിയിലെ ആവശ്യം. കേസ് നാല് ആഴ്ചയ്ക്ക് ശേഷം വീണ്ടും വാദം കേൾക്കാനായി മാറ്റിവച്ചു. 

എസ്.എഫ്.ഐ.ഒ അന്വേഷണം കമ്പനി നിയമപ്രകാരം മാത്രം നടത്തിയതിനാൽ, കള്ളപ്പണ വെളുപ്പിക്കൽ നിരോധന നിയമം (പി.എം.എൽ.എ), അഴിമതി നിരോധന നിയമം, ജനപ്രാതിനിധ്യ നിയമം എന്നിവ പ്രകാരം സി.ബി.ഐ, ഇ.ഡി തുടങ്ങിയ ഏജൻസികൾ വിശദമായ അന്വേഷണം നടത്തണമെന്നാണ് ഷോൺ ജോർജിന്റെ ഹരജിയിലെ പ്രധാന ആവശ്യം. നോട്ടിസ് ലഭിച്ച 13 കക്ഷികളിൽ വീണ വിജയന് പുറമേ സി.എം.ആർ.എല്ലിന്റെ മാനേജിംഗ് ഡയറക്ടർ ശശിധരൻ കർത്ത, ഉദ്യോഗസ്ഥരായ പി. സുരേഷ് കുമാർ, കെ.എസ്. സുരേഷ് കുമാർ, ശരൺ എസ്. കർത്ത, കെ.എ. സഗേഷ് കുമാർ, മുരളീകൃഷ്ണൻ എ.കെ., കമ്പനികളായ നിപുൻ ഇന്റർനാഷണൽ, സസ്ജ ഇന്ത്യ, എക്‌സാലോജിക് സൊല്യൂഷൻസ്, വീണ തൈക്കണ്ടി പ്രൈവറ്റ് ലിമിറ്റഡ്, അനിൽ ആനന്ദ് പണിക്കർ എന്നിവർ ഉൾപ്പെടുന്നു.

ALSO READ: ക്ഷേത്ര പരിസരത്ത് ഇസ്‌ലാമിക സാഹിത്യം വിതരണം ചെയ്ത സംഭവം: മുസ്‌ലിം യുവാക്കൾക്കെതിരായ കേസ് റദ്ദാക്കി കർണാടക ഹൈക്കോടതി; മത സാഹിത്യ പ്രചാരണം മതപരിവർത്തനമല്ലെന്ന് കോടതി

കൊച്ചിൻ മിനറൽസ് ആൻഡ് റൂട്ടൈൽ ലിമിറ്റഡ് (സി.എം.ആർ.എൽ), എക്‌സാലോജിക് സൊല്യൂഷൻസ് പ്രൈവറ്റ് ലിമിറ്റഡ് എന്നിവയുമായി ബന്ധപ്പെട്ട് വ്യാജ സാമ്പത്തിക ഇടപാടുകളും കള്ളപ്പണ വെളുപ്പിക്കലും നടത്തിയെന്നാണ് ആരോപണം. സീരിയസ് ഫ്രോഡ് ഇൻവെസ്റ്റിഗേഷൻ ഓഫീസിന്റെ (എസ്.എഫ്.ഐ.ഒ) അന്വേഷണ റിപ്പോർട്ടിൽ, വീണ വിജയന്റെ എക്‌സാലോജിക് സൊല്യൂഷൻസിന് യാതൊരു സേവനവും നൽകാതെ 2.7 കോടി രൂപ സമ്പാദിച്ചതായും കണ്ടെത്തി. ഈ തുക നിപുൻ ഇന്റർനാഷണൽ, സസ്ജ ഇന്ത്യ തുടങ്ങിയ ഷെൽ കമ്പനികൾ വഴിയാണ് കൈമാറിയതെന്നും റിപ്പോർട്ടിൽ പറയുന്നു. എസ്.എഫ്.ഐ.ഒ റിപ്പോർട്ട് കമ്പനി നിയമത്തിലെ സെക്ഷൻ 447 (വഞ്ചന), സെക്ഷൻ 448 (തെറ്റായ പ്രസ്താവന), സെക്ഷൻ 129 (സാമ്പത്തിക പ്രസ്താവന), സെക്ഷൻ 134 (ബോർഡിന്റെ റിപ്പോർട്ട്) എന്നിവയുടെ ലംഘനങ്ങൾ ചൂണ്ടിക്കാട്ടുന്നു. വ്യാജ ഇടപാടുകൾ മറയ്ക്കാൻ സി.എം.ആർ.എൽ കമ്പനി ചെലവുകളായി തെറ്റായി രേഖപ്പെടുത്തിയതായും റിപ്പോർട്ടിൽ ആരോപിക്കുന്നു.

മുതിർന്ന അഭിഭാഷകൻ ഷിനു ജെ. പിള്ളയുടെ നേതൃത്വത്തിലുള്ള അഭിഭാഷക സംഘവും അഭിഭാഷകരായ മരിയ രാജൻ, എസ്. സുജ, ആൻ മരിയ ജോൺ, ഫെലിക്‌സ് സാംസൺ വർഗീസ് എന്നിവരും ഷോൺ ജോർജിന് വേണ്ടി കോടതിയിൽ ഹാജരായി.

The Kerala High Court has issued a setback to Veena Vijayan, ordering a CBI probe into the Exalogic case. Notices were sent to Veena and 12 others following a petition by a BJP leader