ബെംഗളൂരു: ജാംഖണ്ഡിയിലെ രാമതീർത്ഥ് ക്ഷേത്രത്തിനു സമീപം ഇസ്‌ലാമിക സാഹിത്യം വിതരണം ചെയ്തതിന് മുസ്‌ലിം യുവാക്കൾക്കെതിരെ രജിസ്റ്റർ ചെയ്ത കേസ് കർണാടക ഹൈക്കോടതി റദ്ദാക്കി. മുസ്തഫ, അലിസാബ്, സുലൈമാൻ എന്നിവർക്കെതിരെ 2022-ലെ കർണാടക മതസ്വാതന്ത്ര്യ അവകാശ സംരക്ഷണ നിയമപ്രകാരം രജിസ്റ്റർ ചെയ്ത പ്രഥമ വിവര റിപ്പോർട്ട് (എഫ്ഐആർ) ജസ്റ്റിസ് വെങ്കിടേഷ് നായിക് ടി. റദ്ദാക്കുകയായിരുന്നു. ഇസ്‌ലാമിന്റെ സന്ദേശം പ്രചരിപ്പിക്കുക മാത്രമാണ് തങ്ങൾ ചെയ്തതെന്നും, ആരെയും മതപരിവർത്തനത്തിന് പ്രേരിപ്പിച്ചിട്ടില്ലെന്നും വ്യക്തമാക്കിയ ഹരജിക്കാരുടെ വാദം കോടതി അംഗീകരിച്ചു. നിയമപരമായി അസാധുവായ ഈ എഫ്ഐആർ രജിസ്റ്റർ ചെയ്യുന്നത് ദുഷിപ്പാണ്. ആരോപണങ്ങൾ നിയമത്തിലെ കുറ്റകൃത്യത്തിന്റെ അവശ്യ ഘടകങ്ങൾ നിറവേറ്റുന്നില്ല, കോടതി വിധിച്ചു. മത സാഹിത്യങ്ങൾ പ്രചരിപ്പിക്കുന്നത് ഒരു മതത്തിന്റെ അവകാശമാണെന്നും, അത് മതപരിവർത്തനത്തിനുള്ള ശ്രമമായി കണക്കാക്കാൻ കഴിയില്ലെന്നും കോടതി വ്യക്തമാക്കി.

2025 മെയ് 4-ന് ജാംഖണ്ഡിയിലെ രാമതീർത്ഥ് ക്ഷേത്രപരിസരത്ത്  ഇസ്‌ലാമിക സാഹിത്യം വിതരണം ചെയ്യുകയും വിശ്വാസികളുമായി സംവദിക്കുകയും ചെയ്തതിനാണ് മുസ്തഫ, അലിസാബ്, സുലൈമാൻ എന്നിവർക്കെതിരെ പരാതി ഉയർന്നത്. പരാതിക്കാരനായ രമേശ് മല്ലപ്പ നവി, യുവാക്കൾ ഹിന്ദുമതത്തെ അവഹേളിച്ചതായും, "അള്ളാഹു അല്ലാതെ മറ്റു ദൈവങ്ങൾ കാഫിറുകളാണ്" എന്ന് പറഞ്ഞതായും ആരോപിച്ചിരുന്നു. എന്നാൽ, ഈ ആരോപണങ്ങൾ മുഖവിലയ്ക്കെടുത്താലും, 2022-ലെ മതസ്വാതന്ത്ര്യ നിയമത്തിലെ സെക്ഷൻ 3-ന്റെ ലംഘനം തെളിയിക്കുന്നതിന് ആവശ്യമായ ഘടകങ്ങൾ ഇല്ലെന്ന് കോടതി വ്യക്തമാക്കി.

ALSO READ: സംസ്ഥാനത്തെ അതിദരിദ്ര കുടുംബങ്ങളിലുള്ള 12,326 കടക്കെണിയിൽ: ജപ്തി ഭീഷണി നേരിടുന്നവരെ കണ്ടെത്താൻ നിർദേശം

ഹരജിക്കാർ ആരെയും മതപരിവർത്തനത്തിന് ശ്രമിച്ചതായോ, മറ്റൊരു മതത്തിലേക്ക് മാറ്റിയതായോ യാതൊരു തെളിവുമില്ല," ജസ്റ്റിസ് വെങ്കിടേഷ് നായിക് ടി. വിധിയിൽ ചൂണ്ടിക്കാട്ടി. മതപരിവർത്തനം വഞ്ചന, ബലപ്രയോഗം, അനാവശ്യ സ്വാധീനം, അല്ലെങ്കിൽ വിവാഹ വാഗ്ദാനം തുടങ്ങിയ മാർഗങ്ങളിലൂടെ നടത്തുമ്പോൾ മാത്രമാണ് നിയമം ലംഘിക്കപ്പെടുന്നതെന്ന് കോടതി വ്യക്തമാക്കി. ഈ കേസിൽ, പരാതി ഒരു മൂന്നാം കക്ഷിയാണ് നൽകിയതെന്നും, നിയമപ്രകാരം മതം മാറിയ വ്യക്തിയോ അവരുടെ കുടുംബാംഗങ്ങളോ മാത്രമേ പരാതി നൽകാൻ അർഹരുള്ളൂവെന്നും കോടതി നിരീക്ഷിച്ചു. ഹരജിക്കാർക്ക് വേണ്ടി അഭിഭാഷകരായ ഇഫ്തേഖർ ഷാപുരിയും അൻവരലി നദാഫും ഹാജരായി. സംസ്ഥാനത്തെ പ്രതിനിധീകരിച്ചത് അഭിഭാഷകൻ അഭിഷേക് മാലിപാട്ടീലാണ്

ALSO READ: ധർമസ്ഥല വെളിപ്പെടുത്തൽ: സർക്കാർ രൂപീകരിച്ച പ്രത്യേക അന്വേഷണ സംഘത്തിൽ നിന്ന് ഐപിഎസ് ഉദ്യോ​ഗസ്ഥ പിന്മാറി

The Karnataka High Court has quashed a case against Muslim youths accused of distributing Islamic literature near a temple, ruling that sharing religious literature is a right and does not constitute an attempt at religious conversion