ന്യൂയോർക്ക്: ഗസ്സയിൽ പട്ടിണി മരണം രൂക്ഷമാകുന്നതിനിടെ, അടിയന്തര വെടിനിർത്തൽ വേണമെന്ന് ആവശ്യപ്പെട്ട് യു.എന്നിൽ ഇന്ത്യ. വെടിനിർത്തലല്ലാതെ മറ്റൊരു പരിഹാരമില്ല. വെടിനിർത്തൽ മാത്രം മതിയാകില്ലെന്നും ഇന്ത്യയുടെ യു.എന്നിലെ സ്ഥിരം അംബാസഡർ പർവതനേനി ഹാരിഷ് പറഞ്ഞു.  ഗസ്സയിലെ മനുഷ്യസഹായം സംബന്ധിച്ച തുറന്ന ചർച്ചയിലാണ് ഇന്ത്യയുടെ നിലപാട്. ഇതു രണ്ടാം തവണയാണ് യു.എന്നിൽ ഇന്ത്യ വെടിനിർത്തൽ ആവശ്യപ്പെടുന്നത്.
 
നേരത്തെ പലതവണ ഗസ്സ വിഷയത്തിൽ ഇന്ത്യ വോട്ടെടുപ്പിൽനിന്ന് വിട്ടുനിൽക്കുകയായിരുന്നു. 2023 ഡിസംബറിൽ യു.എൻ പൊതുസഭയിൽ ഇസ്റാഈൽ ഉടൻ വെടിനിർത്തണമെന്ന പ്രമേയത്തെ ഇന്ത്യ പിന്താങ്ങിയിരുന്നു. അന്താരാഷ്ട്ര നിയമപ്രകാരം ഗസ്സയിലെ സിവിലിയൻമാരെ സംരക്ഷിക്കണമെന്നും ഹമാസ് തടവിലാക്കിയവരെ വിട്ടയക്കണമെന്നുമായിരുന്നു അന്ന് ഇന്ത്യ പറഞ്ഞത്. ഗസ്സയിൽ പട്ടിണിയും ഭക്ഷ്യക്ഷാമവും രൂക്ഷമാണെന്ന് ഹരീഷ് പിന്നീട് പി.ടി.ഐയോട് പറഞ്ഞു. ഭക്ഷണവും ഇന്ധനവും വിദ്യാഭ്യാസത്തിനുള്ള സൗകര്യങ്ങളും ഗസ്സയിലില്ലെന്നും അദ്ദേഹം കൂട്ടിച്ചേർത്തു.

അതേസമയം, ഗസ്സയിൽ ഇന്നലെ അവശ്യ വസ്തുക്കളുടെ സഹായം തേടിയെത്തിയ 19 പേർ ഉൾപ്പെടെ കുറഞ്ഞത് 62 പേർ കൊല്ലപ്പെട്ടതായി ആശുപത്രി വൃത്തങ്ങളെ ഉദ്ദരിച്ച് അൽ ജസീറ റിപ്പോർട്ട് ചെയ്തു. പോഷകാഹാരക്കുറവ് മൂലം രണ്ട് പേർ മരിച്ചതായും ആശുപത്രി വൃത്തങ്ങൾ അറിയിച്ചു. 2023 ഒക്ടോബറിൽ ഇസ്രായേൽ ആക്രമണം ആരംഭിച്ചതിനുശേഷം കുറഞ്ഞത് 115 പലസ്തീനികൾ ഈ പ്രദേശത്ത് പട്ടിണി കിടന്ന് മരിച്ചതായി ഗസ്സ ആരോഗ്യ മന്ത്രാലയം അറിയിച്ചു.