കോഴിക്കോട്: താമരശ്ശേരി ചുരത്തിൽ നിന്നും പൊലിസിനെ കണ്ട് കൊക്കയിലേക്ക് ചാടിയ യുവാവിനെ ഇതുവരെയും കണ്ടെത്താനായില്ല. മലപ്പുറം നന്നമ്പ്ര സ്വദേശിയായ ഷഫീക്കാണ് കഴിഞ്ഞ ദിവസം വാഹന പരിശോധനയ്ക്കിടെ പൊലിസിനെ കണ്ട് താമരശ്ശേരി ചുരത്തിലെ ഒമ്പതാം വളവിൽ നിന്നും കൊക്കയിലേക്ക് ചാടിയത്. പൊലിസും ഫയർ ഫോഴ്‌സും ചേർന്ന് ഇയാൾക്ക് വേണ്ടി തിരച്ചിൽ തുടരുകയാണ്. സന്നദ്ധ പ്രവർത്തകരും തിരച്ചിൽ ഉണ്ട്.

ഒൻപതാം വളവിന് മുകളിൽ പതിവ് വാഹന പരിശോധന നടത്തുകയായിരുന്നു പൊലിസ് സംഘം. ഇതുകണ്ട യുവാവ് തന്റെ കാറുപേക്ഷിച്ച് താഴേക്ക് എടുത്തി ചാടിയെന്നാണ് റിപ്പോർട്ട്. ഇയാളുടെ കാറിൽ നിന്ന് പിന്നീട് പൊലിസ് ലഹരി വസ്തുക്കൾ കണ്ടെത്തിയിരുന്നു. മൂന്ന് പാക്കറ്റ് എംഡിഎംഎയാണ് കണ്ടെത്തിയത്. കാറിനകത്ത് കൂടുതൽ മയക്കുമരുന്ന് ഉണ്ടോ എന്ന സംശയം പൊലിസിന് ഉണ്ട്. രഹസ്യ അറകളുണ്ടാക്കി എംഡിഎംഎ സൂക്ഷിക്കാൻ സാധ്യതയുള്ളതിനാൽ കാർ വെട്ടിപ്പൊളിച്ച് പരിശോധിക്കാനാണ് പൊലിസിന്റെ തീരുമാനം.

അതേസമയം, ഷഫീക്ക് ഉപയോഗിച്ചിരുന്നത് ഇയാളുടെ കാർ അല്ലെന്ന് പൊലിസ് അറിയിച്ചു. ഇയാളുടെ ബന്ധുവിന്റെ കാറാണ് ഇയാളുടെ കൈവശം ഉണ്ടായിരുന്നത്. ഇതിൽ നിന്നാണ് ലഹരി വസ്തുക്കൾ കണ്ടത്തിയത്. വാഹനത്തിന്റെ ഉടമയെ പൊലിസ് തിരിച്ചറിഞ്ഞിട്ടുണ്ട്.