കരുവാരക്കുണ്ട് (മലപ്പുറം): കാട്ടാനകൾ കൂട്ടത്തോടെ നാട്ടിലിറങ്ങി വാഹനങ്ങൾ ആക്രമിച്ചു. തുവ്വൂർ ഇരിങ്ങാട്ടിരി ഭാഗങ്ങളിലായാണ് മൂന്ന് മോഴയാനകൾ ജനവാസ മേഖലയിലിറങ്ങിയത്. റോഡിലിറങ്ങി പരാക്രമം കാണിച്ച ആനകൾ വാഹനങ്ങൾക്ക് നേരെയും ആളുകൾക്ക് നേരെയും പാഞ്ഞടുത്തു. കരുവാരക്കുണ്ട് പറയിൻകുന്ന് വനമേഖലയിൽ നിന്ന് എത്തിയ കാട്ടാനകളെ തുരത്തി ഓടിക്കാൻ ശ്രമിക്കുന്നതിനിടെ റോഡിൽ ഉണ്ടായിരുന്ന പാൽ കൊണ്ട് പോകുന്ന വാനിന്റെ നേരെ ആക്രമണം നടത്തി.

വാഹനത്തിന്റെ ഗ്ലാസുകൾ തകർത്തു. മുൻഭാഗം ഭാഗികമായി കേടുപാടുകൾ വരുത്തി. ഡ്രൈവർക്ക് പരിക്കുണ്ട്. ആക്രമണം നേരിട്ട വാനിന്റെ പിറകിൽ ഉണ്ടായിരുന്ന വാഹനത്തിനും കേടുപാടുണ്ട്. വീടുകൾക്ക് സമീപവും പൊതുയിടങ്ങളിലുമായി ഭീതി പടർത്തി ഓടുന്നതിനിടെ നിരവധി കൃഷിയിടങ്ങളും നശിപ്പിച്ചിട്ടുണ്ട്. ആനയെ കണ്ടു ഭയന്ന് ഓടിയ പലർക്കും വീണ് പരിക്കേറ്റിട്ടുണ്ട്. അക്കരക്കുളത്ത് ജനവാസ മേഖലയിലൂടെ പോകുന്നതിനിടെ കാട്ടാന കിണറ്റിൽ വീണു. ഫോറസ്റ്റ് ഉദ്യോഗസ്ഥരും പൊലിസും നാട്ടുകാരും ചേർന്ന് ആനകളെ കാട്ടിലേക്ക് തുരത്താൻ ശ്രമിക്കുന്നുണ്ട്. പ്രദേശത്ത് ജാഗ്രത നിർദ്ദേശം നൽകിയിട്ടുണ്ട്.