കൊച്ചി: ആര്‍എസ്എസ് കൊച്ചിയില്‍ നടത്തിയ പരിപാടിയില്‍ കേരളത്തിലെ നാല് സര്‍വകലാശാല വിസിമാര്‍ പങ്കെടുത്തു. ജ്ഞാനസഭയെന്ന പേരില്‍ നടത്തിയ പരിപാടിയില്‍ വിദ്യാഭ്യാസത്തിലൂടെ വികസിത ഭാരതം ചര്‍ച്ചയിലാണ് വിസിമാര്‍ പങ്കെടുക്കുന്നത്. കേരള യൂണിവേഴ്‌സിറ്റി, കണ്ണൂര്‍, കാലിക്കറ്റ്, കുഫോസ് വിസിമാരാണ് പരിപാടിക്കെത്തിയത്. 

ആര്‍എസ്എസ് തലവന്‍ മോഹന്‍ ഭാഗവത്, ഗവര്‍ണര്‍ രാജേന്ദ്ര ആര്‍ലേക്കര്‍ എന്നിവര്‍ സമ്മേളനത്തില്‍ പങ്കെടുത്തു. 
നാല് ദിവസത്തേക്കാണ് സമ്മേളനം നടക്കുന്നത്. ദേശീയ വിദ്യാഭ്യാസ നയം നടപ്പിലാക്കുകയെന്ന ആവശ്യം ഉന്നയിച്ചാണ് സമ്മേളനം.കേരളത്തിലെ അഞ്ച് വിസിമാര്‍ക്കാണ് പരിപാടിക്ക് ക്ഷണം ലഭിച്ചത്. വിസിമാര്‍ ആര്‍എസ്എസ് പരിപാടിയില്‍ പങ്കെടുത്തതിനെതിരെ പ്രതിഷേധം ശക്തമാവുകയാണ്. 

ആര്‍എസ്എസ് ജ്ഞാനസഭയില്‍ വിസിമാര്‍ പങ്കെടുക്കുന്നത് അപമാനകരമാണെന്ന നിലപാടാണ് സിപിഎമ്മിനുള്ളത്. വ്യക്തിപരമായി പരിപാടിയില്‍ പങ്കെടുക്കുന്നത് വിസിമാര്‍ക്ക് തീരുമാനിക്കാമെന്ന ഉന്നത വിദ്യാഭ്യാസ മന്ത്രി ആര്‍ ബിന്ദുവിന്റെ നിലപാടിനെ തള്ളിയാണ് എംവി ഗോവിന്ദന്‍ ഇക്കാര്യം പറഞ്ഞത്. സംഭവത്തില്‍ പ്രതിഷേധവുമായി കെഎസ്‌യുവും രംഗത്തെത്തിയിട്ടുണ്ട്.

ALSO READ: മതപരിവർത്തനം നടത്താതെയുള്ള മിശ്ര വിവാഹങ്ങൾ നിയമവിരുദ്ധമാണെന്ന് അലഹബാദ് ഹൈക്കോടതി