കെ. ഷിന്റുലാൽ 

കോഴിക്കോട്: ഗോവിന്ദച്ചാമി ജയിൽചാടിയതുൾപ്പെടെ സംസ്ഥാനത്തെ ജയിൽസംവിധാനത്തിലുണ്ടായിട്ടുള്ള വീഴ്ചകളിൽ  സർക്കാരിനെ തിരുത്താൻ പഠനവുമായി ഭരണാനുകൂല സംഘടനയായ കെ.ജെ.എസ്.ഒ.എ. പഠനം നേരത്തെ ആരംഭിച്ചിരുന്നെങ്കിലും നിലവിലെ സാഹചര്യത്തിൽ പരമാവധി വേഗത്തിൽ പൂർത്തിയാക്കി റിപ്പോർട്ട് തയാറാക്കാനാണ് തീരുമാനം. 

ദക്ഷിണമേഖല, മധ്യമേഖല,  ഉത്തരമേഖല എന്നിങ്ങനെ തിരിച്ചുകൊണ്ട് തയാറാക്കുന്ന പഠന റിപ്പോർട്ടുകൾ സംസ്ഥാന കമ്മിറ്റിയ്ക്ക് സമർപ്പിക്കുകയും തുടർന്ന് സർക്കാരിന് കൈമാറുകയും ചെയ്യും. ജയിലുകളിലെ സുരക്ഷാവീഴ്ചയുമായി ബന്ധപ്പെട്ട് പലപ്പോഴും സർക്കാർ രൂക്ഷ വിമർശനത്തിനിരയാവാറുണ്ട്. കൂടാതെ ജോലി സമ്മർദമുൾപ്പെടെയുള്ള ഘടകങ്ങൾ കാരണം ജയിലുകളിലെ ജീവനക്കാരും പ്രതിസന്ധിയിലാണ്. ഈ സാഹചര്യത്തിലാണ് പഠനം നടത്താൻ ജയിൽ ജീവനക്കാരുടെ സർക്കാർ അനുകൂല സംഘടന തന്നെ നേരിട്ടെത്തിയത്. 

2030 വരെ സംസ്ഥാനത്തെ ജയിലുകളിൽ നടപ്പാക്കേണ്ടതും അടിയന്തരശ്രദ്ധ ചെലുത്തേണ്ടതുമായ വിഷയങ്ങൾ സംബന്ധിച്ച് സർക്കാരിനെ അറിയിക്കാനായി 'വിഷൻ 30' എന്ന പേരിൽ പദ്ധതി നടപ്പാക്കുന്നുണ്ട്. ഇതിന്റെ തുടർച്ചയായാണ് മേഖലാതലത്തിൽ പഠനം നടത്തിവരുന്നത്. ജയിൽവകുപ്പിനെ കുറിച്ച് പഠിച്ചിട്ടുള്ള ജസ്റ്റിസ് മുള്ള കമ്മിഷൻ, ഡോ. അലക്‌സാണ്ടർ ജേക്കബ് കമ്മിഷൻ റിപ്പോർട്ടുകളിലും സംസ്ഥാന സർക്കാരിന്റെ 2010 ലെ പി ആൻഡ് ആർ.ഡി റിപ്പോർട്ടിലും ജയിൽവകുപ്പിൽ തടവുകാരുടെ എണ്ണത്തിനനുസരിച്ച് ജീവനക്കാരുടെ തസ്തിക ആവശ്യമാണെന്ന് ചൂണ്ടിക്കാണിച്ചിരുന്നു. 

2016ലെ മോഡേൺ പ്രിസൺ മാനുവൽ പ്രകാരം ഓരോ ആറ് തടവുകാർക്കും ഓരോ എട്ട് മണിക്കൂർ ഷിഫ്റ്റിലും ഒരു ഉദ്യോഗസ്ഥൻ എന്ന നിലയിൽ മൂന്ന് ഗാർഡിങ് ഉദ്യോഗസ്ഥരുടെ തസ്തികകൾ ആവശ്യമുണ്ടെന്ന് നിഷ്‌കർഷിച്ചിരുന്നു. എന്നാൽ, ഇത്തരം കാര്യങ്ങളൊന്നും നടപ്പാക്കിയിട്ടില്ല. 

'സിസ്റ്റം മാറിയില്ലെങ്കിൽ വീഴ്ച തുടരും' 

സംസ്ഥാനത്തെ പല ജയിലുകളിലും അംഗീകൃത പാർപ്പിട ശേഷിയേക്കാൾ രണ്ടും മൂന്നും ഇരട്ടിയിലധികം അന്തേവാസികളെയാണ് പാർപ്പിച്ചിരിക്കുന്നത്. അന്തേവാസികളുടെ എണ്ണത്തിന് ആനുപാതികമായി പുതിയ ജയിൽ സ്ഥാപനങ്ങൾ ആരംഭിക്കുകയും നിലവിലെ ജയിലുകളിൽ ആവശ്യമായ അധിക തസ്തികകൾ സൃഷ്ടിക്കലുമാണ് പരിഹാരമാർഗമെന്നാണ് കെ.ജെ.എസ്.ഒ.എയുടെ വിലയിരുത്തൽ. മാറുന്ന കാലത്തിനനുസരിച്ചുള്ള മാറ്റങ്ങൾ ജയിൽ വകുപ്പിലും ഉണ്ടാകണം. 

ജയിൽ വകുപ്പിൽ നടപ്പാക്കിയിട്ടുള്ള ആധുനികവൽക്കരണവും പുതിയ വ്യാവസായിക യൂനിറ്റുകളുടെ ആരംഭവും ജീവനക്കാരുടെ ജോലിഭാരം ഇരട്ടിയലധികമാക്കിയതായാണ് സംഘടന പറയുന്നത്. സുരക്ഷാചുമതല നിർവഹിക്കേണ്ട ജീവനക്കാരിൽ നിന്നാണ് ഇത്തരത്തിലുള്ള വിവിധ വ്യാവസായിക യുനിറ്റുകളിലേക്ക് ഉദ്യോഗസ്ഥരെ കണ്ടെത്തുന്നത്. ഗാർഡിങ് ഡ്യൂട്ടിക്ക് പുറമേ വിവിധ വിഡിയോ കോൺഫറൻസിങ്, ആശുപത്രി -കോടതി എക്‌സ്‌കോർട്ടുകൾ, തപാൽ, ട്രഷറി, വെൽഫെയർ പ്രവൃത്തികൾ മുതലായവ നിർവഹിക്കണം.  ജയിലുകളിലെ പശ്ചാത്തല സൗകര്യങ്ങൾ മെച്ചപ്പെടുത്തുകയും ജീവനക്കാരുടെ സേവന വേതന വ്യവസ്ഥകൾ കാലാനുസൃതമായി പരിഷ്‌കരിക്കുകയും ചെയ്താൽ മാത്രമേ പ്രശ്നങ്ങൾക്ക് പരിഹാരമുണ്ടാകൂവെന്നാണ് കെ.ജെ.എസ്.ഒ.എയുടെ വിലയിരുത്തൽ. 

Prison security; A study to correct the government; A pro-government organization is preparing a report.