ദോഹ/ഗസ്സ: പട്ടിണി ആയുധമാക്കി ഗസ്സയിലെ ജനങ്ങളെ ഹീനമായി വേട്ടയാടുന്ന ഇസ്‌റാഈല്‍ നടപടിക്കിടെ ഗസ്സയ്ക്ക് കൂടുതല്‍ സഹായവുമായി ഖത്തര്‍. അവശ്യവസ്തുക്കളും മറ്റും അടങ്ങിയ 49 ട്രക്കുകളാകും ഗസ്സയില്‍ എത്തുക. മുപ്പതിനായിരത്തോളം പേര്‍ക്ക് പ്രയോജനം ലഭിക്കുന്ന ഭക്ഷണസാധനങ്ങള്‍, നാല്‍പ്പതിനായിരത്തിലധികം പേര്‍ക്ക് പ്രയോജനം ലഭിക്കുന്ന 174 ടണ്‍ ധാന്യപ്പൊടികള്‍, 5,000 യൂണിറ്റ് ബേബി ഫുഡ് എന്നിവയാണ് ഖത്തര്‍ ഗസ്സയിലേക്ക് അയക്കുന്നത്. ഈജിപ്തിലും ജപ്പാനിലുമാണ് നിലവില്‍ ഈ ട്രക്കുകള്‍ ഉള്ളത്. റാഫ, കെറം ഷാലോം എന്നീ അതിര്‍ത്തികള്‍ വഴി ഇവ വൈകാതെ ഗസ്സയിലെത്തും.

മാസങ്ങളോളം നീണ്ട ഉപരോധത്തിന് ശേഷം ഗസ്സയിലേക്ക് മാനുഷിക ഇടനാഴി തുറക്കാൻ ഇസ്റാഈൽ സമ്മതിച്ചിരുന്നു. ഖത്തർ ഫണ്ട് ഫോർ ഡവലപ്മെന്റ് (QFFD), ഖത്തർ ചാരിറ്റി, ഖത്തർ റെഡ് ക്രസന്റ് എന്നിവയുമായി സഹകരിച്ചാണ് ഖത്തർ ഗസ്സയിലേക്ക് അവശ്യസഹായങ്ങൾ എത്തിക്കുന്നത്. ഭക്ഷ്യവസ്തുക്കൾ, മരുന്നുകൾ, ആശുപത്രി സാമഗ്രികൾ, ശുചിത്വ കിറ്റുകൾ എന്നിവ ഉൾപ്പെടുന്ന 49 ട്രക്കുകളാണ് ക്രോസിംഗുകൾ വഴി ഗസ്സയിലേക്ക് അയക്കുക.

ഇതിനിടെ, ഗസ്സയിലെ മാനുഷിക പ്രതിസന്ധിയിൽ ഇസ്റാഈൽ നിലപാടിനെ യുഎൻ രക്ഷാസമിതിയിൽ ഖത്തർ രൂക്ഷമായി വിമർശിച്ചു. ഫലസ്തീനികൾക്കെതിരെ ഇസ്റാഈൽ ഭക്ഷണവും പട്ടിണിയും യുദ്ധായുധമായി ഉപയോഗിക്കുന്നുവെന്ന് ഖത്തറിന്റെ സ്ഥിരം പ്രതിനിധി ആരോപിച്ചു. "ഗസ്സയിലെ ജനങ്ങൾ അനുഭവിക്കുന്ന ദുരിതം അവസാനിപ്പിക്കാൻ അന്താരാഷ്ട്ര സമൂഹം അടിയന്തരമായി ഇടപെടണം," ഖത്തർ പ്രതിനിധി യുഎൻ രക്ഷാസമിതിയിൽ ആവശ്യപ്പെട്ടു. 2023 ഒക്ടോബർ മുതൽ 52,000-ലധികം മരണങ്ങളും 118,000-ലധികം പരുക്കുകളും ഗസ്സയിൽ റിപ്പോർട്ട് ചെയ്യപ്പെട്ടിട്ടുണ്ടെന്ന് റെഡ് ക്രസന്റ് റിപ്പോർട്ടുകൾ ചൂണ്ടിക്കാട്ടുന്നു.

ഖത്തർ ഫണ്ട് ഫോർ ഡവലപ്മെന്റിന്റെ (QFFD) 4.5 മില്യൺ ഡോളർ സഹായത്തോടെ, യുഎൻആർഡബ്ല്യുഎയും (UNRWA) ഖത്തർ റെഡ് ക്രസന്റും ചേർന്ന് 4,400-ലധികം ഫലസ്തീനി തൊഴിലാളികൾക്കും രോഗികൾക്കും പണമായി സഹായം നൽകുന്നുണ്ട്.

Qatar has dispatched 49 trucks loaded with humanitarian aid to Gaza, aiming to support more than 100,000 people affected by the ongoing crisis. The initiative reflects Qatar’s continued commitment to supporting Palestinians in need.