ദോഹ: വെടി നിർത്തൽ ചർച്ചയിൽ പങ്കെടുക്കുന്നതിനു ദോഹയിലെത്തിയ ഹമാസ് നേതാക്കളെ ലക്ഷ്യം വെച്ച് കൊണ്ട് ചൊവ്വാഴ്ച ദോഹയിലെ ഹമാസ് ആസ്ഥാനത്തിനു നേരെ ഇസ്‌റാഈല്‍ നടത്തിയ ഭീകര ആക്രമണതിന്റെ പശ്ചാത്തലത്തിൽ ഖത്തർ അമീർ ഷെയ്ഖ് തമീം ബിൻ ഹമദ് അൽതാനിയെ നേരിട്ട് ഫോണിൽ വിളിച്ചു ഐക്യദാർഢ്യം അറിയിച്ചു ഇന്ത്യൻ പ്രധാനമന്ത്രി നരേന്ദ്ര മോദി.

ALSO READ: ഷാർക്ക് ഇന്റർസെക്ഷനിൽ നാല് ദിവസത്തെ താൽക്കാലിക ഗതാഗത നിയന്ത്രണം; അഷ്​ഗൽ

ഖത്തറിനോട് ഇന്ത്യക്കുള്ള ഐക്യദാർഢ്യം അറിയിക്കുന്നതിനൊപ്പം ഹമാസ് നേതാക്കളുടെ റെസിഡൻഷ്യൽ ആസ്ഥാനം ലക്ഷ്യമിട്ട് നടത്തിയ ഭീരുത്വം നിറഞ്ഞ ഇസ്‌റാഈല്‍ ആക്രമണത്തെ ഇന്ത്യ ശക്തമായി അപലപിക്കുകയും ചെയ്തു. ഖത്തറിന്റെയും അവിടുത്തെ ജനങ്ങളുടെയും സുരക്ഷയ്ക്കു ഭീഷണിയുയർത്തുന്നതും മേഖലയുടെ സുരക്ഷയും സ്ഥിരതയും തകർക്കുന്നതുമായ ഏതൊരു ആക്രമണത്തെയും നിരാകരിക്കുമെന്ന് ഇന്ത്യൻ  പ്രധാനമന്ത്രി പറഞ്ഞു.

അന്താരാഷ്ട്ര നിയമങ്ങളുടെ നഗ്നമായ ലംഘനമായ ഇസ്‌റാഈല്‍ ആക്രമണത്തിന് മറുപടിയായി ഖത്തറിന്റെ സുരക്ഷ വർധപ്പിക്കുന്നതിനും പരമാധികാരം സംരക്ഷിക്കുന്നതിനും ആവശ്യമായ എല്ലാ നടപടികളും സ്വീകരിക്കുമെന്ന് അമീർ മറുപടി നൽകി.

ഇന്ത്യൻ  പ്രധാനമന്ത്രിയുടെ ഐക്യദാർഢ്യത്തിനും  ഖത്തറിനോടും അവിടുത്തെ ജനങ്ങളോടുമുള്ള ഇന്ത്യയുടെ ആത്മാർത്ഥമായ സ്നേഹത്തിനും അമീർ നന്ദി പറഞ്ഞു.