തൃശൂര്‍: തൃശൂര്‍ കൂട്ടാലയില്‍ മകന്‍ അച്ഛനെ കൊലപ്പെടുത്തിയ ശേഷം ചാക്കിലാക്കി. വീടിനടുത്തുള്ള പറമ്പില്‍ നിന്നാണ് അച്ഛന്റെ മൃതദേഹം കണ്ടെത്തിയത്. കൂട്ടാല സ്വദേശി സുന്ദരനാണ് കൊല്ലപ്പെട്ടത്. സുന്ദരന്റെ മൂത്ത മകന്‍ സുമേഷിനെ പൊലിസ് കസ്റ്റഡിയില്‍ എടുത്തു. സാമ്പത്തിക തര്‍ക്കമാണ് സുന്ദരന്റെ കൊലപാതകത്തിലേക്ക് നയിച്ചതെന്നാണ് സൂചന.

ALSO READ: തിരുവനന്തപുരത്ത് ആംബുലൻസ് ഇടിച്ച് കാൽനട യാത്രക്കാരൻ മരിച്ചു

പുത്തൂര്‍ എന്ന സ്ഥലത്താണ് സുമേഷ് താമസിച്ചിരുന്നത്. രാവിലെ സുന്ദരന്റെ രണ്ടാമത്തെ മകനും കുടുംബവും വീട്ടില്‍ നിന്ന് പുറത്തുപോയിരുന്നു. സുന്ദരന്റെ മകളുടെ മക്കളും ഇതേ വീട്ടിലായിരുന്നു താമസിച്ചിരുന്നത്. ഇവര്‍ ഉച്ചയ്ക്ക് തിരികെ വന്നപ്പോള്‍ സുന്ദരനെ കാണാത്തതിനെ തുടര്‍ന്ന് നടത്തിയ അന്വേഷണത്തിലാണ് മൃതദേഹം കണ്ടെത്തിയത്.

ALSO READ: 15-കാരിയെ വീട്ടിൽ അതിക്രമിച്ച് കയറി ദിവസങ്ങളോളം പീഡിപ്പിച്ചു; 25-കാരന് 50 വർഷം കഠിന തടവ്

വീട്ടില്‍ രക്തക്കറ കണ്ടെങ്കിലും ഇത് ചായ വീണതാകുമെന്നാണ് ഇവര്‍ കരുതിയത്. തുടര്‍ന്ന് വൈകീട്ട് അഞ്ചോടെ തിരച്ചില്‍ തുടങ്ങി. തുടര്‍ന്നാണ് തൊട്ടടുത്തുള്ള കാടുപിടിച്ച പറമ്പില്‍ നിന്ന് മൃതദേഹം കണ്ടെത്തിയത്. മണ്ണുത്തി പൊലിസ് സ്ഥലത്തെത്തി ഇന്‍ക്വസ്റ്റ് നടപടികള്‍ ആരംഭിച്ചു. സുന്ദരന്റെ കൈവശമുണ്ടായിരുന്ന ആഭരണങ്ങള്‍ നഷ്ടമായതായി സൂചനയുണ്ട്. കൊല ചെയ്യുന്ന സമയത്ത് സുമേഷ് മദ്യലഹരിയിലായിരുന്നെന്ന് പൊലിസ് പറഞ്ഞു.