തിരുവനന്തപുരം: ഹയർ സെക്കൻഡറിയിൽ ഇത്തവണയും പൊതുചോദ്യപേപ്പർ നൽകാതെ ഓണപ്പരീക്ഷ നടത്താനുള്ള വിദ്യാഭ്യാസ വകുപ്പിന്റെ നീക്കം വിവാദമാവുന്നു. പത്താം ക്ലാസ് വരെ വിദ്യാഭ്യാസ വകുപ്പ് തയാറാക്കിയ ചോദ്യപേപ്പർ ഉപയോഗിച്ചു പരീക്ഷ നടത്തുമ്പോൾ ഹയർ സെക്കൻഡറി ഓണപ്പരീക്ഷയ്ക്കുള്ള ചോദ്യപേപ്പർ സ്‌കൂളിൽ തന്നെ തയാറാക്കണമെന്ന വകുപ്പിന്റെ തീരുമാനമാണ് അധ്യാപകരുടെ പ്രതിഷേധത്തിനിടയാക്കിയിരിക്കുന്നത്. 

ഹയർ സെക്കൻഡറി പരീക്ഷകൾക്കുള്ള ചോദ്യപേപ്പറുകൾ പുറമെയുള്ള ഏജൻസികൾ തയാറാക്കി പണപ്പിരിവു നടത്തുന്നു എന്ന ആക്ഷേപത്തെ തുടർന്നാണ്  ടേം പരീക്ഷകൾക്കും മാതൃകാ പരീക്ഷകൾക്കും പൊതുചോദ്യപേപ്പറുകൾ നൽകാൻ കഴിഞ്ഞ വർഷം തീരുമാനമായത്. എന്നാൽ കഴിഞ്ഞ ഒാണപ്പരീക്ഷയ്ക്ക്  ചോദ്യപേപ്പർ സ്‌കൂളിൽ തന്നെ തയാറാക്കണമെന്ന നിർദേശം നൽകുകയായിരുന്നു. പ്രതിപക്ഷ അധ്യാപക സംഘടനകളുടെ പ്രതിഷേധത്തെ തുടർന്ന് ഈ വർഷം ഏകീകൃത ചോദ്യപേപ്പർ പ്രിന്റ് ചെയ്ത് നൽകുമെന്ന് വകുപ്പ് ഉറപ്പു നൽകിയിരുന്നു.  

എന്നാൽ ഇത്തവണയും ചോദ്യപേപ്പർ നൽകാതെ ടൈം ടേബിൾ മാത്രം നൽകുന്ന രീതിയാണ് പ്രതിഷേധത്തിന് കാരണമായത്.  സ്‌കൂൾ തലത്തിൽ ചോദ്യപേപ്പർ തയാറാക്കി പരീക്ഷ നടത്തുമ്പോൾ ഏകീകൃത  ടൈം ടേബിൾ ആവശ്യമില്ലെന്നിരിക്കെ വിദ്യാഭ്യാസ വകുപ്പ്  പൊതുടൈം ടേബിൾ നൽകുന്നത് ചോദ്യപേപ്പർ തയാറാക്കി പണം പിരിക്കുന്ന മാഫിയകളെ സഹായിക്കാനാണെന്ന് കഴിഞ്ഞ വർഷം തന്നെ ആക്ഷേപം ഉയർന്നിരുന്നു. 

കഴിഞ്ഞ വർഷത്തെ പൊതുപരീക്ഷയിൽ പരിചിതമല്ലാത്ത  പുതിയ ചോദ്യരീതി കൊണ്ടുവന്നത് വിദ്യാർഥികളെ ഏറെ ബുദ്ധിമുട്ടിച്ചിരുന്നു. പല വിഷയങ്ങളിലും കൂട്ടത്തോൽവിയാണ് സംഭവിച്ചത്. ടേം പരീക്ഷകളിൽ തന്നെ പൊതുപരീക്ഷയുടെ ചോദ്യരീതി പരിചയപ്പെടുത്തുന്നതിന് ഏകീകൃത ചോദ്യപ്പേപ്പർ വേണമെന്നിരിക്കെ ഹയർ സെക്കൻഡറി മേഖലയിൽ അത് നിഷേധിക്കുന്ന നിലപാട് അംഗീകരിക്കാനാവില്ലെന്നും അധ്യാപകർ പറയുന്നു. 

കീം പോലുള്ള പ്രവേശന പരീക്ഷകളിൽ കേരളാ സിലബസിലെ കുട്ടികൾ പിന്തള്ളപ്പെടുന്ന സാഹചര്യം നിലനിൽക്കുമ്പോൾ, ചോദ്യപേപ്പറുകൾ നൽകാതെ പരീക്ഷകളെ പ്രഹസനമാക്കുന്ന രീതി പൊതുവിദ്യാഭ്യാസ മേഖലയിലെ ഹയർ സെക്കൻഡറി സംവിധാനത്തെ കുട്ടികൾ ഉപേക്ഷിക്കുന്ന സാഹചര്യം ഉണ്ടാക്കാനിടിയാക്കുമെന്ന ആശങ്കയും അധ്യാപകർ പങ്കുവയ്ക്കുന്നുണ്ട്. കൂടാതെ ആറു വിഷയങ്ങൾ പഠിക്കുന്ന ഹയർ സെക്കൻഡറി രണ്ടാം വർഷ പരീക്ഷയ്ക്ക് ആറു ദിവസം മാത്രം ആവശ്യമെന്നിരിക്കെ ഒാഗസ്റ്റ് 18 മുതൽ 29 വരെ നീണ്ട കാലയളവ് വേണ്ടെന്നും ചൂണ്ടിക്കാണിക്കപ്പെടുന്നു. പരീക്ഷാ ചോദ്യപേപ്പർ തയ്യാറാക്കുന്നതിനുള്ള ചെലവുകൾ പി.ഡി അക്കൗണ്ടിൽ ബാക്കി നിൽക്കുന്ന തുകയിൽ നിന്നും എടുക്കാമെന്ന് പൊതു വിദ്യാഭ്യാസ ഡയരക്ടറുടെ സർക്കുലറിൽ പറയുന്നെങ്കിലും അതിന് വ്യക്തത വരുത്തി സർക്കാർ ഉത്തരവായി പുറത്തിറക്കാത്തതും സ്‌കൂൾ അധികൃതർക്ക് തലവേദനയാവുകയാണ്.

The Education Department's decision to conduct the Onam examination for Higher Secondary students without providing a common question paper this time as well has sparked controversy. While exams up to Class 10 are conducted using question papers prepared by the department, the directive that schools themselves should prepare question papers for the Higher Secondary Onam exam has led to protests from teachers.