തിരുവനന്തപുരം: കൊടുംകുറ്റവാളിയായ ഗോവിന്ദച്ചാമിയുടെ ജയില്‍ചാട്ടത്തിനു പിന്നാലെ ജയില്‍ വകുപ്പില്‍ വന്‍ അഴിച്ചുപണി. കണ്ണൂര്‍ സെന്‍ട്രല്‍ ജയില്‍ ജോയിന്റ് സൂപ്രണ്ടിനെ അടക്കം വിവിധ ജയിലുകളിലെ എട്ട് ഉദ്യോഗസ്ഥരെയാണ് സ്ഥലം മാറ്റിയത്. കണ്ണൂര്‍ സെന്‍ട്രല്‍ ജയിലിലെ ജോയിന്റ് സൂപ്രണ്ട് ഗിരീഷ് കുമാറിനെ കാസര്‍കോട് ജില്ലാ ജയില്‍ സൂപ്രണ്ടായി മാറ്റി നിയമിക്കുകയും ചെയ്തു.

കണ്ണൂര്‍ ജില്ലാ ജയില്‍ സൂപ്രണ്ട് കെ.കെ റിനിലിനെ കണ്ണൂര്‍ സെന്‍ട്രല്‍ ജയിലിലേക്കും സ്ഥലം മാറ്റി. പൂജപ്പുര സെന്‍ട്രല്‍ ജയില്‍ ജോയിന്റ് സൂപ്രണ്ട് എ അല്‍ഷാനെ തിരുവനന്തപുരം ജില്ലാ ജയില്‍ സൂപ്രണ്ടാക്കി നിയമിച്ചു. വിയ്യൂര്‍ സെന്‍ട്രല്‍ ജയില്‍ ജോയിന്റ് സൂപ്രണ്ടായിരുന്ന അഖില്‍ രാജിനെ കോഴിക്കോട് ജില്ലാ ജയില്‍ സൂപ്രണ്ടായും നിയമിച്ചു. കണ്ണൂര്‍ സ്‌പെഷ്യല്‍ സബ് ജയില്‍ സൂപ്രണ്ട് ഇവി ജിജേഷിന് സ്ഥാനക്കയറ്റം നല്‍കി തവനൂര്‍ സെന്‍ട്രല്‍ ജയിലില്‍ നിയമിച്ചു.

പാലക്കാട് ജില്ലാ ജയില്‍ ഡെപ്യൂട്ടി സൂപ്രണ്ട് സിഎസ് അനീഷിന് സ്ഥാനക്കയറ്റം നല്‍കി കോട്ടയം ജില്ലാ ജയില്‍ സൂപ്രണ്ടാക്കി. തവനൂര്‍ സെന്‍ട്രല്‍ ജയില്‍ ജോയിന്റ് സൂപ്രണ്ട് അന്‍ജുന്‍ അരവിന്ദിനെ വിയ്യൂര്‍ സെന്‍ട്രല്‍ ജയിലിലും നിയമിച്ചു. കോട്ടയം ജില്ലാ ജയില്‍ സൂപ്രണ്ട് വിആര്‍ ശരതിനെ കൊല്ലം ജില്ലാ ജയില്‍ സൂപ്രണ്ടാക്കിയും കൊല്ലം ജയില്‍ സൂപ്രണ്ട് വിഎസ് ഉണ്ണികൃഷ്ണനെ തിരുവനന്തപുരം നെട്ടുകാല്‍ത്തേരി തുറന്ന ജയിലിലും നിയമിച്ചു.

ഒഴിഞ്ഞുകിടക്കുന്ന തസ്തികകളില്‍ നിയമനങ്ങള്‍ നടത്തുകയും ചെയ്തു. തിരുവനന്തപുരം, കോഴിക്കോട് ജില്ലാ ജയിലുകളില്‍ സൂപ്രണ്ടുമാരെ നിയമിച്ചു. തിരുവനന്തപുരം സെന്‍ട്രല്‍ ജയില്‍ ജോയിന്റ് സൂപ്രണ്ട് എ.അല്‍ഷാന്‍ ആണ് തിരുവനന്തപുരം ജില്ലാ ജയിലിന്റെ പുതിയ സൂപ്രണ്ട്. ഈ രണ്ട് തസ്തികകളും ആഴ്ചകളായി ഒഴിഞ്ഞുകിടക്കുകയുമായിരുന്നു.