2025 ലീഗ്‌സ് കപ്പിലെ ആദ്യ മത്സരത്തിൽ ഇന്റർ മയാമിക്ക് തകർപ്പൻ വിജയം. അറ്റ്ലസിനെ ഒന്നിനെതിരെ രണ്ട് ഗോളുകൾക്കാണ് ഇന്റർ മയാമി പരാജയപ്പെടുത്തിയത്.  മത്സരത്തിൽ ഇന്റർ മയാമി നേടിയ രണ്ട് ഗോളുകൾക്ക് വഴിയൊരുക്കിയത് ലയണൽ മെസിയാണ്. ഇതോടെ തന്റെ ഫുട്ബോൾ കരിയറിലെ അസിസ്റ്റുകളുടെ എണ്ണം 386 ആക്കി ഉയർത്താനും മെസിക്ക് സാധിച്ചു. 400 അധിസ്റ്റുകൾ എന്ന പുതിയ നാഴികകല്ലിലേക്ക് എത്താൻ മെസിക്ക് ഇനി വെറും 14 അസിസ്റ്റുകളുടെ ദൂരം മാത്രമാണുള്ളത്. 

ഇന്റർ മയാമിയുടെ തട്ടകമായ ചെസ് സ്റ്റേഡിയത്തിൽ നടന്ന മത്സരത്തിൽ ആദ്യ പകുതിയിൽ ഇരു ടീമുകൾക്കും ഗോളുകൾ നേടാൻ സാധിച്ചിരുന്നില്ല. രണ്ടാം പകുതിയിൽ 57ാം മിനിറ്റിൽ ടെലാസ്കോ സെഗോവിയയിലൂടെ ഇന്റർ മയാമിയാണ് ആദ്യം ലീഡ് നേടിയത്.

എന്നാൽ മത്സരം അവസാനിക്കാൻ 10 മിനിറ്റുകൾ ബാക്കിനിൽക്കെ റിവാൾഡോ ലൊസാനോയിലൂടെ അറ്റ്ലസ് സമനില ഗോൾ നേടുകയായിരുന്നു.  ഒടുവിൽ മത്സരം സമനിലയിലേക്ക് നീങ്ങുമെന്ന് തോന്നിച്ച നിമിഷമായിരുന്നു മെസിയുടെ അസിസ്റ്റിൽ വെയ്ഗാന്റ് ഇന്റർ മയാമിയുടെ വിജയഗോൾ നേടിയത്. മത്സരം അവസാനിക്കാൻ നിമിഷങ്ങൾ മാത്രം ബാക്കി നിൽക്കെ ഇഞ്ചുറി ടൈമിൽ ആയിരുന്നു താരത്തിന്റെ ഗോൾ പിറന്നത്. 

മത്സരത്തിൽ സർവ്വാധിപത്യവും ലയണൽ മെസിയുടെയും സംഘത്തിന്റെയും കൈവശമായിരുന്നു. 55 ശതമാനം ബോൾ പൊസഷൻ സ്വന്തമാക്കിയ ഇന്റർ മയാമി 19 ഷോട്ടുകളാണ് എതിർ ടീമിന്റെ പോസ്റ്റിലേക്ക് ഉതിർത്തത് ഇതിൽ അഞ്ചു ഷോട്ടുകളും ഓൺ ടാർഗറ്റിലേക്ക് എത്തിക്കാൻ ഇന്റർ മയാമിക്ക് സാധിച്ചു. മറുഭാഗത്ത് 15 ഷോട്ടുകൾ നിന്നും 7 ഷോട്ടുകൾ ആണ് ഇന്റർ മയാമിയുടെ പോസ്റ്റിലേക്ക് അറ്റ്ലസ് എത്തിച്ചത്. 

നിലവിൽ ടൂർണമെന്റിലെ പോയിന്റ് പട്ടികയിൽ രണ്ടാം സ്ഥാനത്താണ് ഇന്റർ മയാമി. മൂന്ന് പോയിന്റാണ് മയാമിക്കുള്ളത്. ടൂർണമെന്റിലെ രണ്ടാം മത്സരത്തിൽ ഓഗസ്റ്റ് മൂന്നിന് നേക്കാകസ്‌ക്കെതിരെയാണ് ഇന്റർ മയാമിയുടെ അടുത്ത മത്സരം. അതേസമയം നിലവിൽ മേജർ ലീഗ് സോക്കറിൽ അഞ്ചാം സ്ഥാനത്താണ് ഇന്റർ മയാമി. 22 മത്സരങ്ങളിൽ നിന്നും 12 വിജയവും 6 സമനിലയും 4 തോൽവിയും അടക്കം 42 ആണ് ഇന്റർ മയാമിയുടെ കൈവശമുള്ളത്.

Inter Miami won the first match of the 2025 Leagues Cup Inter Miami defeated Atlas by 2 goals to 1 Lionel Messi provided the two goals for Inter Miami in the match