കണ്ണൂർ: ടി.പി ചന്ദ്രശേഖരൻ വധക്കേസ് പ്രതി കൊടി സുനിയുടെ പരോൾ റദ്ദ് ചെയ്തു. മീനങ്ങാടി സ്റ്റേഷനിൽ റിപ്പോർട്ട് ചെയ്യണമെന്ന വ്യവസ്ഥ ലംഘിച്ചതിനാണ് നടപടി. കൊടി സുനിക്ക് മദ്യപിക്കാൻ അവസരമൊരുക്കിയ സംഭവത്തിൽ മൂന്ന് പൊലിസുകാരെ സസ്‌പെൻഡ് ചെയ്ത സംഭവത്തിന് പിന്നാലെയാണ് കൊടി സുനിയുടെ പരോൾ റദ്ദാക്കലും ഉണ്ടായത്. സ്റ്റേഷനിൽ റിപ്പോർട്ട് ചെയ്യാത്തത് ചൂണ്ടിക്കാട്ടിയുള്ള മീനങ്ങാടി സിഐയുടെ റിപ്പോർട്ടിന്റെ അടിസ്ഥാനത്തിലാണ് പരോൾ റദ്ദാക്കിയത്.

ഈ ജൂലൈ 21-നാണ് കൊടി സുനിക്ക് 15 ദിവസത്തെ അടിയന്തര പരോൾ അനുവദിച്ചത്. മീനങ്ങാടി സ്റ്റേഷനിൽ റിപ്പോർട്ട് ചെയ്യണമെന്ന വ്യവസ്ഥയോടെയായിരുന്നു പരോൾ നൽകിയത്. എന്നാൽ സുനി സ്റ്റേഷനിൽ റിപ്പോർട്ട് ചെയ്യാതെ നടക്കുകയായിരുന്നു.  പരോൾ അവസാനിക്കാൻ നാല് ദിവസം മാത്രം ബാക്കി നിൽക്കെയാണ് പരോൾ റദ്ദാക്കിയത്. ഇതോടെ ഇന്നലെ രാത്രി സുനിയെ വീണ്ടും കണ്ണൂർ സെൻട്രൽ ജയിലിൽ എത്തിച്ചു.

ALSO READ: ടി.പി വധക്കേസിലെ പ്രതി കൊടി സുനിക്ക് മദ്യം വാങ്ങി നൽകി: കണ്ണൂരിൽ പൊലിസുകാർക്ക് സസ്പെൻഷൻ

ഇതിനിടെ, കൊടി സുനിക്ക് മദ്യപിക്കാൻ അവസരമൊരുക്കിയ സംഭവത്തിൽ കണ്ണൂർ ജില്ലാ പൊലിസ് ആസ്ഥാനത്തെ മൂന്ന് സിവിൽ പൊലിസ് ഉദ്യോഗസ്ഥരെ സസ്‌പെൻഡ് ചെയ്തു. കഴിഞ്ഞ ജൂൺ 17ന് തലശ്ശേരി അഡീഷണൽ ജില്ലാ കോടതിയിൽ ഹാജരാക്കാനായി കണ്ണൂർ സെൻട്രൽ ജയിലിൽ നിന്ന് കൊണ്ടുപോയ വഴിയാണ് പ്രതികൾ മദ്യം കഴിച്ചത്. 

സംഭവത്തിൽ അന്വേഷണത്തിൽ ഉദ്യോഗസ്ഥർക്ക് ഗുരുതര വീഴ്ച സംഭവിച്ചതായി കണ്ടെത്തിയതിനെ തുടർന്നാണ് നടപടി. കോടതിയിൽ ഹാജരാക്കിയ ശേഷം ഉച്ചഭക്ഷണത്തിനായി പ്രതിയെ തലശ്ശേരിയിലെ വിക്ടോറിയ ഹോട്ടലിൽ എത്തിച്ചിരുന്നു. ഈ സമയം പ്രതികളുടെ സുഹൃത്തുക്കൾ ഹോട്ടലിലെത്തുകയും പൊലിസ് ഉദ്യോഗസ്ഥരുടെ മുന്നിൽവച്ച് പ്രതികൾ മദ്യം കഴിക്കുകയും ചെയ്തുവെന്നാണ് പരാതി. നേരത്തെ, കൊടി സുനി ജയിലിൽവച്ച് മൊബൈൽ ഫോൺ ഉപയോഗിച്ചതടക്കമുള്ള വിവാദങ്ങളും പുറത്തുവന്നിരുന്നു. 
 

Kodi Suni, the convict in the T.P. Chandrasekharan murder case, has had his parole cancelled for violating conditions that required him to report at the Meenangadi police station. The action follows the recent suspension of three police officers who allegedly facilitated Kodi Suni's access to alcohol during parole. The parole cancellation was based on a report submitted by the Meenangadi Circle Inspector, citing his failure to report at the station.