തിരുവനന്തപുരം: കന്യാസ്ത്രീകള്‍ക്ക് ജാമ്യം ലഭിച്ചതിനെ സ്വാഗതം ചെയ്ത് കെ.സി.ബി.സി അധ്യക്ഷന്‍ കര്‍ദിനാള്‍ ബസേലിയോസ് ക്ലീമിസ് ബാവ. ജാമ്യം ലഭിച്ചുവെന്നത് സന്തോഷകരമായ വാര്‍ത്തയാണെന്നും ജാമ്യത്തിന് വേണ്ടി സഹായിച്ച എല്ലാവരോടും നന്ദിയുണ്ടെന്നും ക്ലീമിസ് ബാവ പറഞ്ഞു.

സഭക്ക് തിരിച്ചറിവ് ലഭിച്ചു എന്ന കാര്യം മറച്ചു വെക്കുന്നില്ല എന്ന് അദ്ദേഹം പറഞ്ഞു. ബി.ജെ.പിയോടുള്ള സമീപനത്തില്‍ ഇത് മാനദണ്ഡമായിരിക്കുമെന്നും അദ്ദേഹം വ്യക്തമാക്കി. കന്യാസ്ത്രീകള്‍ക്ക് പരോളഅ# പോലെ ലഭിച്ച ഒരു ആനുകൂല്യത്തില്‍ സഭ എല്ലാം അവസാനിപ്പിക്കുന്നില്ല. നീതി തേടിയുള്ള പ്രക്രിയകള്‍ മുന്നോട്ട് പോകട്ടെ. അത് നമ്മുടെ ബന്ധങ്ങള്‍ കുറച്ചു കൂടി ശക്തമാക്കുമെന്നും അദ്ദേഹം കൂട്ടിച്ചേര്‍ത്തു. 

ALSO READ: ഒൻപത് ദിവസത്തെ ജയിൽവാസം ഒടുവിൽ ആശ്വാസവിധി; ഛത്തീസ്ഗഢിൽ അറസ്റ്റിലായ മലയാളി കന്യാസ്ത്രീകൾക്ക് ജാമ്യം

കന്യാസ്ത്രീകള്‍ക്ക് ലഭിച്ചത് താത്കാലികമായ ആശ്വാസമാണ്. വിഷയം പരിഹരിക്കപ്പെടുന്നില്ല. മനസ്സ് തുറന്ന് മുന്‍വിധിയില്ലാതെ കോടതി ഈ വിഷയം പഠിക്കട്ടെ. രാജ്യത്തെ കോടതിയില്‍ നമുക്ക് എല്ലാവര്‍ക്കും വലിയ വിശ്വാസമുണ്ടെന്നും അദ്ദേഹം വ്യക്തമാക്കി. ഗാന്ധി മാര്‍ഗവും സുവിശേഷവും വിട്ടുള്ള പ്രക്ഷോഭങ്ങള്‍  സഭക്കില്ലെന്നും അദ്ദേഹം പറഞ്ഞു. സഭക്ക് തിരിച്ചറിവ് ലഭിച്ചു. അക്കാര്യം താന്‍ മറച്ചുവെക്കുന്നില്ല. നീതിയുടെ ഒടുവിലത്തെ അടയാളം കന്യാസ്ത്രീകള്‍ നിരപരാധികളെന്ന് പൊതുസമൂഹത്തെ അറിയിച്ച് അവസാനിപ്പിക്കണമെന്നും ക്ലീമിസ് ബാവ പറഞ്ഞു.

രാജ്യത്തെ സ്‌നേഹിക്കുന്ന ദേശീയതയെ മാനിക്കുന്ന എല്ലാ ജനത്തേയും കരുതുകയും സ്‌നേഹിക്കുകയും ഏറ്റവും ദുര്‍ബലരെ ചേര്‍ത്തു പിടിക്കുകയും ചെയ്യുന്ന ഭരണകൂടം വരണമെന്നും അദ്ദേഹം പറഞ്ഞു. 

കന്യാസ്ത്രീകളെ തടഞ്ഞുവെക്കുകയും പരസ്യവിചാരണ നടത്തി ആക്രമിക്കുകയും ചെയ്ത തീവ്രമതവാദികള്‍ക്കെതിരെ കേസെടുക്കാന്‍ ഛത്തീസ്ഗഡ് സര്‍ക്കാര്‍ തയാറാകണമെന്നാണ് മലങ്കര ഓര്‍ത്തഡോക്‌സ് സഭാധ്യക്ഷന്‍ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ പ്രതികരിച്ചത്.  അവനെ ക്രൂശിക്ക.. ക്രൂശിക്ക' എന്ന് ആര്‍ത്ത് അട്ടഹസിച്ച കൂട്ടര്‍ക്ക് സമരായവര്‍ ഇപ്പോഴും സ്വതന്ത്രരായി പുറത്ത് നില്‍ക്കുകയാണ്. കന്യാസ്ത്രീകളെ തടഞ്ഞുവെക്കുകയും പരസ്യവിചാരണ നടത്തി ആക്രമിക്കുകയും ചെയ്ത തീവ്രമതവാദികള്‍ക്കെതിരെ കേസെടുക്കാന്‍ ഛത്തീസ്ഗഡ് സര്‍ക്കാര്‍ തയാറാകണം- അദ്ദേഹം ഫേസ്ബുക്കില്‍ കുറിച്ചു. 

ALSO READ: ഞെട്ടിച്ച് പൊന്ന്, ഇന്ന് വന്‍ കുതിപ്പ്; കൂടാനുള്ള കാരണമിതാണ്

ബിലാസ്പൂര്‍ എന്‍.ഐ.എ കോടതിയാണ് കന്യാസ്ത്രീകള്‍ക്ക് ജാമ്യം അനുവദിച്ചത്. 50,000 രൂപ കെട്ടിവയ്ക്കണം, രണ്ട് ആള്‍ ജാമ്യം എന്നീ ഉപാധികളോടെയാണ് ജാമ്യം. പാസ്പോര്‍ട്ട് കോടതിയില്‍ കെട്ടിവെക്കണം, രാജ്യം വിട്ടു പോകരുത് എന്നീ ഉപാധികളും ഉണ്ട്. അറസ്റ്റിലായി ഒന്‍പതാം ദിവസമാണ് മോചനം.