തിരുനാവായ (മലപ്പുറം): ബൂത്ത് ലെവൽ ഓഫിസർ (ബി.എൽ.ഒ) മാരായി ഇനി ക്ലറിക്കൽ തസ്തികയിലുള്ളവർ മാത്രം. ഇതിൻ്റെ ഭാഗമായി അധ്യാപകരെയും അങ്കണവാടി ജീവനക്കാരെയും ഒഴിവാക്കുന്ന നടപടി തെരഞ്ഞെടുപ്പ് കമ്മിഷൻ ആരംഭിച്ചു. 
ക്ലറിക്കൽ കേഡറിന് മുകളിലുള്ള ഉദ്യോഗസ്ഥരെയും ബി.എൽ.ഒമാരായി നിയമിക്കും. അധ്യാപകരെയും അങ്കണവാടി ജീവനക്കാരെയും ഒഴിവാക്കി ക്ലറിക്കൽ തസ്തികയിലുള്ളവരെ അടിയന്തരമായി നിയമിക്കണമെന്ന് തെരഞ്ഞെടുപ്പ് കമ്മിഷൻ ചീഫ് ഇലക്ടറൽ ഓഫിസർമാർക്ക് നിർദേശം നൽകിയിരുന്നു.

ഏതെങ്കിലും ബൂത്തിൽ നിശ്ചിത യോഗ്യതയുള്ള ഉദ്യോഗസ്ഥർ ലഭ്യമല്ലെങ്കിൽ നിലവിൽ ബി.എൽ.ഒമാരായി പ്രവർത്തിക്കുന്ന അധ്യാപകർക്കും അങ്കണവാടി ജീവനക്കാർക്കും തൽസ്ഥാനത്ത് തുടരാവുന്നതാണ്. ഇത്തരം ബൂത്തുകളിൽ യോഗ്യരായവർ ലഭ്യമല്ല എന്ന സർട്ടിഫിക്കറ്റ് അസിസ്റ്റന്റ്  ഇലക്ടറൽ  രജിസ്ട്രേഷൻ ഓഫിസർ (തഹസിൽദാർ) ഇലക്ടറൽ രജിസ്ട്രേഷൻ ഓഫിസറെ ഡെപ്യൂട്ടി കലക്ടറെ ഏൽപ്പിക്കണമെന്നാണ് നിർദേശം.