തിരുവനന്തപുരം: മെഡിക്കൽ കോളജിലെ യൂറോളജി വിഭാഗത്തിൽനിന്ന് ഉപകരണം കാണാതായെന്ന ആരോപണത്തിൽ മെഡിക്കൽ വിദ്യാഭ്യാസ വകുപ്പ് ഡയരക്ടർ ഇന്നുമുതൽ മൊഴിയെടുക്കും. വകുപ്പ് മേധാവിയായ ഡോ. ഹാരിസ് ചിറയ്ക്കൽ ശനി, ഞായർ ദിവസങ്ങളിൽ അവധിയായിരുന്നു. ഇന്ന് അദ്ദേഹം ഓഫിസിലെത്തി മൊഴിനൽകും. വകുപ്പുതല അന്വേഷണത്തിൽ കാര്യമായ പുരോഗതി ഉണ്ടായില്ലെങ്കിൽ കേസ് പൊലിസിന് കൈമാറാനാണ് ധാരണ. 

ഉപകരണം നഷ്ടമായിട്ടില്ലെന്നും ആശുപത്രിയിൽ തന്നെ ഉണ്ടെന്നും ഡോക്ടർ ഹാരിസ് ചിറയ്ക്കൽ നേരത്തെ മാധ്യമങ്ങളോട് വെളിപ്പെടുത്തിയിരുന്നു. ഉപയോഗിച്ച് പരിചയമുള്ള ഡോക്ടർമാർ ഇല്ലാത്തതു കൊണ്ടാണ് ഓസിലോസ്‌കോപ്പ് നിലവിൽ ഉപയോഗിക്കാത്തതെന്നും നേരത്തെ ഈ ഉപകരണം ഉപയോഗിച്ചതിൽ ചില പരാതികൾ ഉയർന്നതിനു പിന്നാലെയാണ് ഉപയോഗിക്കാതെ വന്നതെന്നുമാണ് ഹാരിസ് ചിറയ്ക്കൽ വ്യക്തമാക്കുന്നത്. ഉപകരണത്തിന്റെ ഫോട്ടോ പലവട്ടം കലക്ടറേറ്റിലേക്ക് അയച്ചിട്ടുണ്ട്. ഒരു ഉപകരണവും അസ്വാഭാവികമായി കേടായിട്ടില്ലെന്നും അദ്ദേഹം വ്യക്തമാക്കിയിരുന്നു. സ്വാഭാവിക പ്രക്രിയയുടെ ഭാഗമായി ഹാരിസിൽനിന്ന് മറുപടി കിട്ടിയശേഷം ഫയൽ മടക്കുകയാണെങ്കിൽ അച്ചടക്ക നടപടി ഉണ്ടാകില്ല.