ചെന്നൈ: വല്ലാത്ത കുതിപ്പിലാണ് ഇപ്പോള്‍ സ്വര്‍ണം. സാധാരണക്കാരന് തീര്‍ത്തും അപ്രാപ്യമായ കുതിപ്പ്. അമേരിക്കയുടെ നയങ്ങളാണ് പലപ്പോഴും സ്വര്‍ണ വില നിര്‍ണയിക്കുന്നത്. ലോകത്തിന്റെ ഏത് വിപണിയിലും അതങ്ങിനെ തന്നെ. അതേ സമയം, സ്വര്‍ണ ഉപഭോക്താക്കള്‍ക്ക് പ്രതീക്ഷ നല്‍കുന്ന ചില നയമാറ്റങ്ങള്‍ക്കുള്ള ഒരുക്കത്തിലാണ് അമേരിക്കയാണെന്നാണ് വരുന്ന റിപ്പോര്‍ട്ടുകള്‍. അങ്ങിനെയെങ്കില്‍ സ്വര്‍ണ വില കുറയാനും സാധ്യതയുണ്ടെന്ന് നിരീക്ഷകര്‍ ചൂണ്ടിക്കാട്ടുന്നു. 

സ്വര്‍ണ്ണക്കട്ടികള്‍ക്ക് ഏര്‍പ്പെടുത്തിയ ഇറക്കുമതി തീരുവക്ക് ഇളവ് പ്രഖ്യാപിക്കാനാണ് അമേരിക്കയുടെ നീക്കം. ഇത് സംബന്ധിച്ച എക്‌സിക്യൂട്ടീവ് ഉത്തരവ് ഉടന്‍ പുറപ്പെടുവിക്കുമെന്ന് അന്തര്‍ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. അമേരിക്കയുടെ ഈ പുതിയ നയം ആഗോള സ്വര്‍ണ്ണ വിപണിയില്‍ വലിയ സ്വാധീനം ചെലുത്തിയേക്കാമെന്ന് വിപണി വിദഗ്ധര്‍ പ്രതീക്ഷ പ്രകടിപ്പിക്കുന്നു. 

ALSO READ: വോട്ട് മോഷണത്തിനെതിരായ പോരാട്ടത്തില്‍ നിങ്ങള്‍ക്കും പങ്കാളികളാകാം; 'വോട്ട് ചോരി' ക്യാംപയ്‌നുമായി കോണ്‍ഗ്രസ്, വെബ്‌സൈറ്റില്‍ രജിസ്റ്റര്‍ ചെയ്യാം, മിസ് കാള്‍ ഇട്ടും പിന്തുണക്കാം

ഇറക്കുമതി തീരുവക്ക് ഇളവ് അനുവദിക്കുന്നത് വിപണിയിലെ അനിശ്ചിതത്വം ലഘൂകരിക്കാനും സഹായിക്കുമെന്നാണ് വിദഗ്ധര്‍ പറയുന്നത്. 

ജൂലൈ 31-നാണ് യു എസ്. കസ്റ്റംസ് ആന്‍ഡ് ബോര്‍ഡര്‍ പ്രൊട്ടക്ഷന്‍ (സി.ബി.പി.) ഒരു കിലോഗ്രാം, 100 ഔണ്‍സ് സ്വര്‍ണ്ണക്കട്ടികളെ തീരുവ ബാധകമായ വിഭാഗത്തില്‍ ഉള്‍പ്പെടുത്തി, 39 ശതമാനം പകരം തീരുവ ഏര്‍പ്പെടുത്തിയത്. ഇതുവരെ തീരുവയില്‍ നിന്ന് ഒഴിവാക്കപ്പെട്ടിരുന്ന സ്വര്‍ണ്ണക്കട്ടികള്‍ക്ക് ഈ തീരുമാനം അപ്രതീക്ഷിതമായ മാറ്റമുണ്ടാക്കിയിരിക്കുകയാണ്.

അമേരിക്കയുടെ തീരുവ നയം ആഗോള സ്വര്‍ണ്ണ വിതരണ ശൃംഖലയില്‍ വലിയ തടസ്സങ്ങള്‍ സൃഷ്ടിക്കുകയും അമേരിക്കയിലേക്ക് പ്രധാനമായും സ്വര്‍ണ്ണക്കട്ടികള്‍ വിതരണം ചെയ്യുന്ന സ്വിസ് റിഫൈനറികള്‍ ഷിപ്പ്മെന്റുകള്‍ താല്‍ക്കാലികമായി നിര്‍ത്തിവെച്ചു. ഇതോടെ അന്താരാഷ്ട്ര വിപണിയില്‍ സ്വര്‍ണ്ണ വില ഔണ്‍സിന് 3534 ഡോളര്‍ എന്ന റെക്കോര്‍ഡ് ഉയരത്തിലെത്തുകയും ചെയ്തു. വര്‍ധനവ് പിന്നീട് നിയന്ത്രണ വിധേയമായി തുടരുകയായിരുന്നു. 

യു.എസിന്റെ നിര്‍ണായക തീരുമാനം വന്നാല്‍ വില കുറയുമെന്ന പ്രതീക്ഷയിലാണ് ഉപഭോക്താക്കള്‍. സ്വര്‍ണ്ണക്കട്ടികളുടെ ഇറക്കുമതി തീരുവയില്‍ നിന്ന് ഒഴിവാക്കപ്പെടുന്നതായിരിക്കും വരാനിരിക്കുന്ന തീരുമാനമെന്ന് മുതിര്‍ന്ന ഉദ്യോഗസ്ഥര്‍ വ്യക്തമാക്കുന്നു. ഈ ഇളവ് ഉടനടി ആശ്വാസം നല്‍കുമെങ്കിലും, ഉത്തരവില്‍ വൈകലോ അവ്യക്തതയോ ഉണ്ടായാല്‍ വിപണിയില്‍ ചാഞ്ചാട്ടം തുടരാമെന്നും വിശകലന വിദഗ്ധര്‍ പറയുന്നു.

സ്വിസ് റിഫൈനറികള്‍ ഷിപ്പ്മെന്റുകള്‍ പുനരാരംഭിക്കുന്നതോടെ, അമേരിക്കയിലേക്കുള്ള സ്വര്‍ണ്ണ വിതരണം സാധാരണ നിലയിലാവും. ഇത് ആശങ്കകള്‍ ലഘൂകരിക്കുകയും, വില വര്‍ധനവിനുള്ള സമ്മര്‍ദ്ദം കുറയ്ക്കുകയും ചെയ്യും. തീരുവ ഇളവ് വിപണിയില്‍ ആത്മവിശ്വാസം വീണ്ടെടുക്കും, ഇത് സുരക്ഷിത നിക്ഷേപ മാര്‍ഗമായി സ്വര്‍ണ്ണത്തോടുള്ള ഡിമാന്‍ഡ് നിലനിര്‍ത്താന്‍ സഹായിക്കും. എന്നാല്‍, ഉത്തരവില്‍ വൈകലോ അവ്യക്തതയോ ഉണ്ടായാല്‍, ഹ്രസ്വകാലത്തേക്ക് ഏറ്റക്കുറച്ചിലുണ്ടാകാമെന്നും നിരീക്ഷകര്‍ ചൂണ്ടിക്കാട്ടുന്നു.

സംസ്ഥാനത്ത് ഇന്നത്തെ വില നോക്കാം
24 കാരറ്റ് ഗ്രാമിന് 10,304 രൂപയാണ് ഇന്നത്തെ വില. പവന് 82,432 രൂപയും. 22 കാരറ്റ് സ്വര്‍ണത്തിനാകട്ടെ ഗ്രാമിന് 9,445 രൂപയും പവന് 75,560 രൂപയുമാണ്. 18 കാരറ്റിന് ഗ്രാം സ്വര്‍ണം വാങ്ങാന്‍ ഇന്ന് നല്‍കേണ്ടത് 7,728 രൂപ നല്‍കണം. പവന് 61,824 രൂപയാണ് 18 കാരറ്റ് പവന് വിപണിയിലെ ഇന്നത്തെ വില.