ന്യൂഡല്‍ഹി: വോട്ട് ക്രമക്കേടിനെതിരായ പോരാട്ടത്തില്‍ പ്രചാരണ വിഡിയോയുമായി കോണ്‍ഗ്രസ്. എത്ര കൂസലില്ലാതെയാണ് ഒരു ജനാധിപത്യ രാജ്യത്തെ പൗരന്റെ ഏറ്റവും പ്രധാനമായ മൗലികാവകാശത്തെ കവര്‍ന്നെടുത്തതെന്ന് കാണിക്കുന്നതാണ് വീഡിയോ. അധികാരികളുടെ ഒത്താശയോടെ എങ്ങനെയാണ് പൗരന്റെ അവകാശങ്ങള്‍ കവര്‍ന്നെടുക്കുന്നതെന്ന് കൃത്യമായി ഈ കുഞ്ഞു വീഡിയോയില്‍ കാണിക്കുന്നു. ലോക്‌സഭ പ്രതിപക്ഷ നേതാവ് രാഹുല്‍ ഗാന്ധി എക്‌സില്‍ പോസ്റ്റ് ചെയ്തതാണ് വീഡിയോ. 

 വോട്ട് ക്രമക്കേട് ചൂണ്ടിക്കാട്ടാനും ഈ വിഷയത്തില്‍ പൊതുജനങ്ങള്‍ക്ക് തങ്ങളുടെ പിന്തുണ അറിയിക്കാനും വോട്ട് ചോരി എന്ന വെബ്സൈറ്റ് തയാറാക്കിയതിന് പിന്നാലെയാണ് വീഡിയോയും പുറത്തിറക്കിയിരിക്കുന്നത്. വോട്ടര്‍മാര്‍ തങ്ങളുടെ വോട്ട് ചെയ്യാനെത്തുമ്പോള്‍ മറ്റുചിലര്‍ വോട്ട് ചെയ്ത് മടങ്ങുന്നതാണ് വീഡിയോയില്‍ ചിത്രീകരിച്ചിരിക്കുന്നത്.

आपके वोट की चोरी…
आपके अधिकार की चोरी, आपके पहचान की चोरी है!#VoteChori pic.twitter.com/zfqsISGrym

— Rahul Gandhi (@RahulGandhi) August 13, 2025

പ്രായമായവരുടെയും സ്ത്രീകളുടെയും വോട്ട് പോലും ബി.ജെ.പി പ്രവര്‍ത്തകര്‍ പോള്‍ ചെയ്യുകയാണെന്ന് വീഡിയോയില്‍ ചൂണ്ടിക്കാട്ടുന്നു. അധികാരികളുടെ ഒത്താശയോടെ തെരഞ്ഞെടുപ്പ് അട്ടിമറിക്കുകയാണെന്നും വീഡിയോ ചൂണ്ടിക്കാട്ടുന്നു.  വോട്ട് ക്രമക്കേട് ചൂണ്ടിക്കാട്ടാനായി കോണ്‍ഗ്രസ് അടക്കമുള്ള പ്രതിപക്ഷ കക്ഷകള്‍ നടത്തുന്ന പ്രചാരണപരിപാടികളുടെ ഭാഗമാണ് വീഡിയോ. 'നിങ്ങളുടെ വോട്ട് മോഷ്ടിക്കുന്നത്, നിങ്ങളുടെ അവകാശങ്ങള്‍ മോഷ്ടിക്കുന്നത് ..നിങ്ങളുടെ വ്യക്തിത്വം മോഷ്ടിക്കുന്നതിന് തുല്യമാണ്' എന്ന  ഓര്‍മപ്പെടുത്തലോടെയാണ് രാഹുല്‍ ഗാന്ധി വിഡിയോ പങ്കുവെച്ചത്.

വോട്ട് ചെയ്യാനായി രണ്ടുപേര്‍ പോളിങ് ബൂത്തിലെത്തുന്നതാണ് വിഡിയോയുടെ തുടക്കം. ആ സമയം പോളിങ് ബൂത്തില്‍നിന്ന് രണ്ട് യുവാക്കള്‍ പുറത്തേക്ക് വരുന്നു. അവര്‍ വോട്ട് ചെയ്യാനെത്തിയവരോട് നിങ്ങളുടെ പേരെന്താണെന്ന് ചോദിക്കുന്നു. പേരുപറയുമ്പോള്‍ അത് ഞാനല്ലേ എന്ന് പൊട്ടിച്ചിരിച്ചുകൊണ്ട് യുവാക്കള്‍ തിരിച്ചുചോദിക്കുക്കുകയും വോട്ട് ചെയ്യാനെത്തിയവരോട് വീട്ടിലേക്ക് മടങ്ങാന്‍ ആവശ്യപ്പെടുകയും ചെയ്യുന്നു. പോളിങ് ബൂത്തിന്റെ ചുമതലയുള്ള ഉദ്യോഗസ്ഥന്‍ നിങ്ങള്‍ ചെയ്തോളൂ, ഞാന്‍ നോക്കിക്കോളാമെന്ന് യുവാക്കളോട് പറഞ്ഞ് കണ്ണടക്കുന്നു- ഇതാണ്  വിഡിയോ.

ALSO READ: വോട്ട് കൊള്ള: ബി.ജെ.പി തൃശൂര്‍ ജില്ലാ വൈസ് പ്രസിഡന്റിന്റെ മേല്‍വിലാസത്തില്‍ ജില്ലക്ക് പുറത്തുള്ള അഞ്ച് പേര്‍ക്ക്; ലിസ്റ്റില്‍ പാര്‍ട്ടി സംസ്ഥാന വൈസ് പ്രസിഡന്റും 

ലോക്സഭാ തെരഞ്ഞെടുപ്പില്‍ കര്‍ണാടകയിലും മഹാരാഷ്ട്രയിലെ നിയമസഭാ തെരഞ്ഞെടുപ്പിലും വ്യാപക ക്രമക്കേട് നടന്നെന്ന് ആരോപിച്ച് കഴിഞ്ഞ ദിവസമാണ് രാഹുല്‍ ഗാന്ധി രംഗത്തെത്തിയത്. തെളിവുകള്‍ സഹിതം അദ്ദേഹം പത്രസമ്മേളനത്തില്‍ കാര്യങ്ങള്‍ വിശദീകരിച്ചു. എന്നാല്‍, ആരോപണത്തിന് തെളിവ് നല്‍കണമെന്നാണ് തെരഞ്ഞെടുപ്പ് കമാമിഷന്‍ പ്രതികരിച്ചത്.  

പിന്നാലെ രാഹുല്‍ ഗാന്ധിക്കും തെരഞ്ഞെടുപ്പ് കമ്മീഷനും ഇടയില്‍ നേര്‍ക്കു നേര്‍ പോര് മുറുകുകയാണ്. ശകുന്‍ റാണി എന്ന സ്ത്രീ രണ്ടു തവണ വോട്ടു ചെയ്തതിന് തെളിവ് എവിടെ എന്ന് ചോദിച്ച് കര്‍ണാടകയിലെ മുഖ്യ തെരഞ്ഞെടുപ്പ് ഓഫിസര്‍ രാഹുല്‍ ഗാന്ധിക്ക് നോട്ടിസ് അയക്കുക വെര ചെയ്തു. തെളിവുണ്ടെങ്കില്‍ സത്യപ്രസ്താവനയിലൂടെ നല്‍കാനാണ് കമീഷന്‍ നിര്‍ദേശം. മഹാരാഷ്ട്ര, ഹരിയാന സി.ഇ.ഒമാരും ഇക്കാര്യത്തില്‍ രാഹുലിന് കത്ത് നല്‍കിയിട്ടുണ്ട്.  ഇതിന് തയാറല്ലെങ്കില്‍ രാഹുല്‍ ഗാന്ധി രാജ്യത്തോട് മാപ്പു പറയണമെന്നും കമ്മിഷന്‍ ആവശ്യപ്പെട്ടു.