അബൂദബി: ഇന്‍ഡിഗോ യാത്രക്കാര്‍ക്കായി അബൂദബിയിലും അല്‍ ഐനിലും സിറ്റി ചെക്ക് ഇന്‍ സൗകര്യം ആരംഭിക്കുന്നതായി മുറാഫിഖ് ഏവിയേഷന്‍ സര്‍വിസസ് അറിയിച്ചു. അബുദാബിയില്‍ ഇന്ന് മുതലാണ് സിറ്റി ചെക്ക് ഇന്‍ ആരംഭിക്കുക. ആദ്യ ദിവസം ചെക്ക് ഇന്‍ നടപടികള്‍ പൂര്‍ത്തീകരിക്കുന്നവര്‍ക്ക് സൗജന്യമായി ഈ സൗകര്യം ഉപയോഗപ്പെടുത്താമെന്ന് മുറാഫിഖ് അറിയിച്ചിട്ടുണ്ട്. ഇന്ത്യയിലെ 16 വിമാനത്താവളങ്ങളിലേക്ക് ഇന്‍ഡിഗോ വിമാനത്തില്‍ യാത്ര ചെയ്യുന്നവര്‍ക്ക് ഇനി മുതല്‍ യാത്രയുടെ 24 മുതല്‍ 4 മണിക്കൂര്‍ മുന്‍പ് വരെ ചെക്ക് ഇന്‍ നടപടികള്‍ പൂര്‍ത്തീകരിക്കാനുള്ള സൗകര്യമാണ് സിറ്റി ചെക്ക് ഇന്‍ കേന്ദ്രത്തില്‍ ഒരുക്കിയിരിക്കുന്നത്. 

ബാഗേജുകള്‍ ഇവിടെ നല്‍കി ബോര്‍ഡിങ് പാസ് എടുക്കുന്നവര്‍ക്ക് വിമാനത്താവളത്തിലെ നീണ്ട ക്യൂവില്‍ നില്‍ക്കാതെ, നേരെ എമിഗ്രേഷന്‍ വിഭാഗത്തിലേക്ക് പോകാനാകും എന്നതാണ് സിറ്റി ചെക്ക് ഇന്‍ സൗകര്യത്തെ ജനപ്രിയമാക്കുന്നത്. അബൂദബിയില്‍ മീന ക്രൂസ് ടെര്‍മിനലില്‍ 24 മണിക്കൂറുമുള്ള സിറ്റി ചെക്ക് ഇന്‍ സൗകര്യം ഒരുക്കിയിട്ടുണ്ട്. മുസഫ ഷാബിയ 11, യാസ് മാളിലെ ഫെരാരി വേള്‍ഡ് എന്‍ട്രന്‍സ്, അല്‍ ഐനിലെ കുവൈത്താത് ലുലു മാള്‍ എന്നിവിടങ്ങളില്‍ രാവിലെ 10 മുതല്‍ രാത്രി 10 മണി വരെയാണ് സിറ്റി ചെക്ക് ഇന്‍ സൗകര്യം നിലവിലുള്ളത്.

അല്‍ ഐനില്‍ സെപ്റ്റംബര്‍ ഒന്ന് മുതലാണ് ഇന്‍ഡിഗോ യാത്രക്കാര്‍ക്ക് സിറ്റി ചെക് ഇന്‍ സൗകര്യം ആരംഭിക്കുക. അല്‍ ഐന്‍ കേന്ദ്രത്തില്‍ സിറ്റി ചെക്ക് ഇന്‍ ചെയ്യുന്നതിനുള്ള കുറഞ്ഞ സമയം ഏഴ് മണിക്കൂറാണ്. നിലവില്‍ ഇത്തിഹാദ് എയര്‍വെയ്‌സ്, എയര്‍ അറേബ്യ, ഈജിപ്ത് എയര്‍ എന്നീ വിമാനങ്ങളില്‍ യാത്ര ചെയ്യുന്നവര്‍ക്ക് സിറ്റി ചെക്ക് ഇന്‍ സൗകര്യം ഒരുക്കിയിട്ടുണ്ട്. യാത്രക്കാരുടെ വീടുകളില്‍ എത്തി, ചെക്ക് ഇന്‍ നടപടികള്‍ പൂര്‍ത്തിയാക്കി ബാഗേജുകള്‍ സ്വീകരിക്കുന്ന ഹോം ചെക്ക് ഇന്‍, അബൂദബി വിമാനത്താവളത്തിലേക്ക് എത്തുന്ന യാത്രക്കാരുടെ ബാഗേജുകള്‍ വിമാനത്താവളത്തില്‍ നിന്നും വീടുകളിലേക്കോ, ഹോട്ടലുകളിലേക്കോ എത്തിക്കുന്ന ലാന്‍ഡ് ആന്‍ഡ് ലീവ് സൗകര്യം എന്നിവയും ഏര്‍പ്പെടുത്തിയിട്ടുണ്ട്. 

ALSO READ: മാധ്യമപ്രവര്‍ത്തകനടക്കം 5 അല്‍ജസീറ ജീവനക്കാരെ ഇസ്‌റാഈല്‍ കൊലപ്പെടുത്തി; ഗസ്സയുടെ മുഖമായ അനസും കൊല്ലപ്പെട്ടു, ഗസ്സയില്‍ ഇതുവരെ കൊല്ലപ്പെട്ടത് 186 മാധ്യമപ്രവര്‍ത്തകര്‍ കൂടുതല്‍ വിവരങ്ങള്‍ക്ക് 800 6672347 എന്ന നമ്പറില്‍ ബന്ധപ്പെടാവുന്നതാണ്.

Passengers flying on IndiGo through Zayed International Airport in Abu Dhabi can avail themselves of the City Check-in service from Monday, August 11, Morafiq Aviation Services announced on Saturday.