തിരുവനന്തപുരം: എ.ഡി.ജി.പി എം.ആർ അജിത് കുമാറിനെതിരായ അനധികൃത സ്വത്തുസമ്പാദന കേസിൽ വിജിലൻസ് നൽകിയ ക്ലിൻചിറ്റ് തള്ളണമെന്ന ഹരജിയിൽ തിരുവനന്തപുരം വിജിലൻസ് കോടതി  14ന് വിധിപറയും. 

അജിത് കുമാറിനെതിരായ ഹരജി തള്ളണമെന്ന നിലപാടാണ് സർക്കാർ കോടതിയിലെടുത്തത്. തുടർന്ന് വസ്തുവകകൾ വാങ്ങൽ, വിൽക്കലുകൾ എന്നിവയ്ക്കുള്ള അനുമതിപത്രം എവിടെയെന്ന് വിജിലൻസ് പ്രത്യേക കോടതി ജഡ്ജി എ. മനോജ് സർക്കാരിനോട് ചോദിച്ചു. സർക്കാരിനെ അറിയിച്ചതായി അജിത് കുമാറിന്റെ മൊഴിയിലുണ്ടെന്ന് സർക്കാർ ബോധിപ്പിച്ചു. ഇതിന്റെ രേഖകൾ എവിടെയെന്ന കോടതിയുടെ ചോദ്യത്തിന് സർക്കാർ മൗനംപാലിച്ചു. പ്രാമാണിക തെളിവുകൾ ഹാജരാക്കാതെ കുറ്റാരോപിതന്റെ മൊഴി എങ്ങനെ വിശ്വസത്തിലെടുക്കുമെന്ന് കോടതി ചോദിച്ചു. എന്നാൽ, ഹരജി തള്ളണമെന്ന  വാദത്തിൽ  സർക്കാർ  കോടതിയിൽ ഉറച്ചുനിന്നു. 

പി. ശശിക്കെതിരെ ഗൂഢാലോചന മാത്രമാണ് ആരോപിക്കുന്നതെന്നും അദ്ദേഹത്തെ ഒഴിവാക്കണമെന്നും സർക്കാർ കോടതിയിൽ ആവശ്യപ്പെട്ടു. വിജിലൻസ് അന്വേഷണ റിപ്പോർട്ട് തള്ളി അജിത് കുമാറിനെതിരേ കേസെടുക്കണമെന്ന് ആവശ്യപ്പെട്ട് അഡ്വ. നെയ്യാറ്റിൻകര പി. നാഗരാജാണ് കോടതിയെ സമീപിച്ചത്. 

ALSO READ: 'ഇതാണ് എന്റെ വസിയ്യത്ത്, എന്റെ കുടുംബത്തെയും ഗസ്സയെയും നിങ്ങളെ ഏല്‍പ്പിക്കുന്നു, അല്ലാഹുവേ എന്റെ രക്തസാക്ഷിത്വം സ്വീകരിക്കേണമേ...'; നോവായി അനസിന്റെ അവസാന സന്ദേശം 

സർക്കാർ അനുമതിവാങ്ങാതെ കവഡിയാർ കൊട്ടാരത്തിന് സമീപം നിർമിക്കുന്ന ആഡംബര വീട്, 2016ൽ 33 ലക്ഷം രൂപക്ക് ഫ്‌ളാറ്റ് വാങ്ങി ഇരുപത്തിരണ്ടാം നാൾ  65 ലക്ഷം രൂപക്ക്  മറിച്ചുവിറ്റ് കള്ളപ്പണം വെളിപ്പിക്കൽ, സ്വർണക്കടത്ത് മാഫിയാ ബന്ധം, പ്രോസിക്യൂഷൻ നടപടികൾ ഒഴിവാക്കാൻ പ്രതികളിൽ നിന്ന് കോഴ കൈപ്പറ്റൽ, അനധികൃത സ്വത്തുസമ്പാദനം, ഇന്റലിജൻസ് റിപ്പോർട്ട് പൂഴ്ത്തൽ, സോളാർ കേസ് അട്ടിമറിക്കൽ തുടങ്ങിയ കുറ്റകൃത്യങ്ങളിലൂടെ അഴിമതി നടത്തി വരവിൽകവിഞ്ഞ സ്വത്തുസമ്പാദനം നടത്തിയെന്നാണ് ഹരജിയിലെ ആരോപണം.