കെ. ഷിന്റുലാൽ 

കോഴിക്കോട്: ക്രമസമാധാനപാലനത്തിനിറങ്ങുന്ന പൊലിസുകാർ സ്വയംസുരക്ഷ ഉറപ്പാക്കണമെന്ന് ഡി.ജി.പിയുടെ നിർദേശത്തിന് പിന്നാലെ സ്റ്റേഷനുകളിൽ സുരക്ഷാ ഉപകരണങ്ങൾ ആയ ഹെൽമറ്റ് അടക്കമുള്ളവ സംഘടിപ്പിക്കാനുള്ള നെട്ടോട്ടത്തിലാണ് എസ്.എച്ച്.ഒമാർ.  
പ്രതിഷേധ സമരങ്ങളിലും മറ്റും അക്രമാസക്തരായ ജനക്കൂട്ടത്തെ നിയന്ത്രിക്കുമ്പോൾ പൊലിസുകാർ നിർബന്ധമായും 'പ്രൊട്ടക്ടീവ് ഗിയേഴ്സ്' (സുരക്ഷാ ഉപകരണങ്ങൾ) ഉപയോഗിക്കണണെന്നാണ് ഡി.ജി.പി റവാഡ ചന്ദ്രശേഖരൻ എല്ലാ ജില്ലാ പൊലിസ് മേധാവിമാർക്കും നൽകിയ നിർദേശം. എന്നാൽ പല ജില്ലകളിലും പൊലിസിന് സമരമുഖത്തും മറ്റും അക്രമാസക്തരായ ജനക്കൂട്ടത്തെ നിയന്ത്രിക്കുന്നതിന് ആവശ്യത്തിന് ഹെൽമറ്റ് പൊലുമില്ലാത്ത സ്ഥിതിയാണ്.

സ്‌പോൺസർമാരെ കണ്ടെത്തിയാണ് സ്‌റ്റേഷനുകളിലേക്കാവശ്യമായ ഹെൽമറ്റുകൾ പൊലിസുകാർ സംഘടിപ്പിക്കുന്നത്. സ്‌പോൺസറെ കിട്ടിയില്ലെങ്കിൽ ഇരുചക്രവാഹനങ്ങളിൽ ഉപയോഗിക്കുന്ന ഹെൽമറ്റുമായാണ് പൊലിസുകാർ ജനക്കൂട്ടത്തിന് മുന്നിൽ എത്തുന്നത്. സ്‌റ്റേഷനുകളിൽ നിലവിലുള്ള ഹെൽമെറ്റുകളിൽ പലതും ഉപയോഗിക്കാൻ പറ്റാത്ത വിധത്തിലുള്ളവയാണ്.  നെറ്റ് അടർന്ന് തൂങ്ങിയതും സ്‌പോഞ്ചില്ലാത്തതും ചിൻസ്ട്രാപ്പ് പൊട്ടിപ്പോയതുമായ ഹെൽമെറ്റുകളാണ് സമരമുഖങ്ങളിലും മറ്റും പൊലിസിന് ഉപയോഗിക്കേണ്ടി വരുന്നത്.  ജില്ലാ പോലിസ് ആസ്ഥാനത്തും (ഡി.എച്ച്.ക്യു) സമാനഅവസ്ഥയാണ്. ഇത്തരം  അടിസ്ഥാന സൗകര്യങ്ങളുമായി ബന്ധപ്പെട്ട് പൊലിസ് സംഘടനകൾ വരെ ഇക്കാര്യം ശ്രദ്ധയിൽപെടുത്തിയെങ്കിലും സർക്കാർ അനുകൂല നിലപാട് സ്വീകരിച്ചിട്ടില്ല. 

ALSO READ: ഇടവേളക്ക് ശേഷം വീണ്ടും മഴ; ഇന്ന് നാല് ജില്ലകളില്‍ യെല്ലോ അലര്‍ട്ട് 

തിരുവനന്തപുരം ചീഫ് സ്‌റ്റോറിൽ നിന്നാണ് ഹെൽമറ്റുൾപ്പെടെയുള്ള വസ്തുക്കൾ വാങ്ങുന്നത്. സംസ്ഥാനത്തെ എല്ലാ പൊലിസ് സ്‌റ്റേഷനുകളിലേക്കും ജില്ലാ ഹെഡ്ക്വാർട്ടേഴ്‌സുകളിലേക്കും വിതരണം ചെയ്യുന്നതും ചീഫ് സ്‌റ്റോറിൽ നിന്നാണ്. നിലവിൽ ഹെൽമറ്റുൾപ്പെടെയുള്ളവ നിർബന്ധമാക്കണമെന്ന നിർദേശത്തിന് പിന്നാലെ സ്‌റ്റേഷനിലുള്ള പൊലിസുകാർ നെട്ടോട്ടത്തിലാണ്. ഡി.ജി.പിയുടെ സർക്കുലർ ഉണ്ടായിട്ടും  ഹെൽമറ്റ് ധരിക്കാതെ സമരമുഖത്തേക്ക് പോയി പരുക്ക് പറ്റിയാൽ പുലിവാലാകുമോയെന്ന ഭയവും ഉണ്ട്.  ഇതോടെ പരമാവധി ഹെൽമറ്റുകളെങ്കിലും ഒരുക്കി വയ്ക്കാനാണ് എസ്.എച്ച്.ഒമാർ തീരുമാനിച്ചത്. 

അതേസമയം പുതിയ വൈസറോട് കൂടിയ ഹെൽമറ്റ് വാങ്ങാൻ കഴിഞ്ഞ വർഷം ഫെബ്രുവരിയിൽ സർക്കാർ തുക അനുവദിച്ചിരുന്നു. മഹാരാഷ്ട്രയിലെ താനെയിലെ കമ്പനിയിൽ നിന്ന് 1562 ഹെൽമറ്റുകൾ വാങ്ങുന്നതിനായി 24,21,100 രൂപയായിരുന്നു അനുവദിച്ചത്. എന്നാൽ പല സ്‌റ്റേഷനുകളിലും പുതിയ ഹെൽമറ്റുകൾ ലഭിച്ചിട്ടില്ല.

lack of security equipment in police stations