കൊണ്ടോട്ടി: ഇന്നു നടത്താനിരുന്ന സംസ്ഥാന ഹജ്ജ് കമ്മിറ്റി മുഖേനയുള്ള 2026 വർഷത്തെ ഹജ്ജ് നറുക്കെടുപ്പ് നാളേക്ക് മാറ്റി. ബുധനാഴ്ച മുംബൈ കേന്ദ്ര ഹജ്ജ് കമ്മിറ്റി ഓഫിസിലാണ് നറുക്കെടുപ്പ്. ഇന്ത്യയുടെ ഹജ്ജ് ക്വാട്ട 1,75,000 ആണ്. ഇതിൽ 30 ശതമാനം സ്വകാര്യ ഹജ്ജ് ഗ്രൂപ്പുകൾക്കും 70 ശതമാനം സംസ്ഥാനങ്ങൾക്കും വീതിച്ചുനൽകും. മുസ്‌ലിം ജനസംഖ്യാനുപാതത്തിലാണ് ഹജ്ജ് ക്വാട്ട സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും നൽകുക. ഹജ്ജ് ക്വാട്ടക്ക് അനുസരിച്ച് നറുക്കെടുപ്പ് വഴി തീർഥാടകരെ കണ്ടെത്തും.

   65 വയസിന് മുകളിലുള്ള വിഭാഗത്തിലും ലേഡീസ് വിത്തൗട്ട് മെഹ്‌റം (പുരുഷ മെഹ്‌റം ഇല്ലാത്ത 45 കഴിഞ്ഞ സ്ത്രീകൾ) വിഭാഗത്തിലും കഴിഞ്ഞ വർഷം അവസരം ലഭിക്കാത്തവരിൽ ഇത്തവണ അപേക്ഷിച്ച ജനറൽ ബി കാറ്റഗറി വിഭാഗത്തിലുള്ളവർക്കും നറുക്കെടുപ്പില്ലാതെ അവസരം ലഭിച്ചേക്കുമെന്നാണ് സൂചന. എന്നാൽ, ഹജ്ജ് ക്വാട്ട കുറവുള്ള സംസ്ഥനങ്ങളിൽ ഇവരിലും നറുക്കെടുപ്പുണ്ടാകും.

 കേരളത്തിൽ 27,186 അപേക്ഷകരാണുള്ളത്. ഇതിൽ 5,238 പേർ 65 വയസിന് മുകളിൽ പ്രായമുള്ള വിഭാഗത്തിലും 3624 പേർ ലേഡീസ് വിത്തൗട്ട് മെഹ്‌റം വിഭാഗത്തിലും 917പേർ ജനറൽ ബി വിഭാഗത്തിലുമാണ്. 17,407 പേരാണ് ജനറൽ വിഭാഗത്തിലുള്ളത്.

ALSO READ: ഇടവേളക്ക് ശേഷം വീണ്ടും മഴ; ഇന്ന് നാല് ജില്ലകളില്‍ യെല്ലോ അലര്‍ട്ട്