കുവൈത്ത് സിറ്റി: വിഷമദ്യ ദുരന്തത്തെ തുടർന്ന് കുവൈത്തിൽ ആഭ്യന്തര മന്ത്രാലയം നടത്തിയ വ്യാപക പരിശോധനയിൽ 10 അനധികൃത മെഥനോൾ ഫാക്ടറികൾ അടച്ചുപൂട്ടി. ഇതിന്റെ ഭാ​ഗമായി 67 പേരെ അറസ്റ്റ് ചെയ്തതായി മന്ത്രാലയം അറിയിച്ചു. വിഷാംശമുള്ള മെഥനോൾ ഉൽപ്പാദിപ്പിച്ച് വിതരണം ചെയ്ത ക്രിമിനൽ ശൃംഖലയാണ് ഇതോടെ പിടിക്കപ്പെട്ടത്. ദുരന്തത്തിൽ 23 പേർ മരിച്ചിരുന്നു. വിഷമദ്യ ദുരന്തത്തിൽ ഉൾപ്പെട്ട 160-ലധികം പേർ ആശുപത്രിയിൽ ചികിത്സയിലാണ്. ദുരന്ത ബാധിതരിൽ ഭൂരിഭാഗവും ഏഷ്യൻ തൊഴിലാളികളാണെന്ന് കുവൈത്ത് വാർത്താ ഏജൻസി ‘കുന’ റിപ്പോർട്ട് ചെയ്തു.

ALSO READ: കുവൈത്ത് വിഷമദ്യ ദുരന്തത്തില്‍ അകപ്പെട്ടവരില്‍ സ്ത്രീകളും?, മരണസംഖ്യ ഉയരാന്‍ സാധ്യത 

സാൽമിയയിൽ നിന്ന് വൻതോതിൽ മെഥനോൾ കൈവശം വച്ചിരുന്ന ഒരു ഏഷ്യൻ പൗരനെ പൊലിസ് അറസ്റ്റ് ചെയ്തു. മെഥനോൾ നിർമ്മാണവും വിതരണവുമായി ബന്ധപ്പെട്ട് രണ്ട് ഏഷ്യൻ പൗരന്മാരെ കൂടി കസ്റ്റഡിയിലെടുത്തിരുന്നു. ശൃംഖലയുടെ മുഖ്യസൂത്രധാരനും ഏഷ്യൻ പൗരനാണെന്ന് ആരോപിക്കപ്പെടുന്നു. ശക്തമായ റെയ്ഡുകളിൽ 10 അനധികൃത ഫാക്ടറികൾ കണ്ടെത്തിയതിന് പുറമേ, ഇതുമായി ബന്ധമില്ലാത്ത മറ്റ് കേസുകളിൽ തിര അന്വേഷിച്ചിരുന്ന 34 പേരെയും അറസ്റ്റ് ചെയ്തു.

മെഥനോൾ വിഷബാധയേറ്റ് 160 പേർ ചികിത്സയിലാണ്. ഇതിൽ 31 പേർ വെന്റിലേറ്ററുകളിലും, 51 പേർ അടിയന്തര വൃക്ക ഡയാലിസിസിനും വിധേയരായി ആശുപത്രികളിലാണ്. 21 പേർക്ക് അന്ധതയോ കാഴ്ചക്കുറവോ ഉണ്ടായതായി ആരോഗ്യ മന്ത്രാലയം സ്ഥിരീകരിച്ചു.

ഇന്ത്യൻ എംബസിയുടെ ഇടപെടൽ

ബാധിതരിൽ ഏകദേശം 40 ഇന്ത്യൻ പൗരന്മാർ ആശുപത്രിയിൽ തുടരുകയാണ്. ചിലരുടെ നില ഗുരുതരമാണ്. ഇന്ത്യൻ അംബാസഡർ ആദർശ് സ്വൈക, മുതിർന്ന ഉദ്യോഗസ്ഥർക്കൊപ്പം ആശുപത്രികൾ സന്ദർശിച്ച് രോഗികൾക്ക് എല്ലാ സഹായവും വാഗ്ദാനം ചെയ്തു. വിവരങ്ങൾക്കായി എംബസി ഹോട്ട്‌ലൈൻ (65501587) സജ്ജമാക്കിയിട്ടുണ്ട്.

മെഥനോൾ പൊതുജനാരോഗ്യത്തിന് ഗുരുതര ഭീഷണിയാണെന്നും ഇത് ഉടനടി മരണത്തിന് കാരണമാകുമെന്നും ആഭ്യന്തര മന്ത്രാലയം മുന്നറിയിപ്പ് നൽകി. മദ്യം, മയക്കുമരുന്ന്, മറ്റ് ദോഷകരമായ വസ്തുക്കളുടെ വ്യാപാരം ഇല്ലാതാക്കാൻ ശക്തമായ നടപടികൾ തുടരുമെന്നും മന്ത്രാലയം വ്യക്തമാക്കി.

Following the deadly toxic liquor tragedy, Kuwait authorities have intensified inspections, closing 10 methanol factories and arresting 67 people, including several Malayalis.