ആലപ്പുഴ: തോട്ടപ്പള്ളിക്ക് സമീപം ഒറ്റപ്പനയിൽ 57 വയസ്സുള്ള റംലത്തിനെ വീട്ടിൽ മരിച്ച നിലയിൽ കണ്ടെത്തിയ സംഭവം കൊലപാതകമെന്നാണ് പൊലീസിന്റെ പ്രാഥമിക നിഗമനം. ഒറ്റയ്ക്ക് താമസിച്ചിരുന്ന ചെമ്പകപ്പള്ളി റംലത്തിനെ ഇന്നലെ വൈകിട്ടാണ് വീട്ടിൽ മരിച്ച നിലയിൽ കണ്ടെത്തിയത്. റംലത്തിനെ ദിവസങ്ങളായി പുറത്ത് കാണാത്തതിനെ തുടർന്ന് അയൽവാസികളും ബന്ധുക്കളും വീട് പരിശോധിച്ചപ്പോഴാണ് മൃതദേഹം കണ്ടെത്തിയത്.

വീടിന്റെ അടുക്കള വാതിൽ തുറന്ന നിലയിലായിരുന്നു. റംലത്തിന്റെ മൃതദേഹം കാൽ നിലത്തും ശരീരം കട്ടിലിലുമായാണ് കണ്ടെത്തിയത്. കഴുത്തിൽ ഷാൾ കുരുക്കിയ നിലയിലായിരുന്നു മൃതദേഹം. വീടിനുള്ളിൽ മുളകുപൊടി വിതറിയ നിലയിലും വൈദ്യുതി ബന്ധം വിച്ഛേദിച്ച നിലയിലും കണ്ടെത്തി.

സംഭവം അറിഞ്ഞതിനെ തുടർന്ന് അമ്പലപ്പുഴ പൊലിസും ഫോറൻസിക്, വിരലടയാള വിദഗ്ധരും സ്ഥലത്തെത്തി വിശദമായ പരിശോധന നടത്തി. വീടുമായി ബന്ധപ്പെട്ടവരോ പരിചയക്കാരോ ആയിരിക്കാം റംലത്തിനെ അപായപ്പെടുത്തിയതെന്നാണ് പൊലിസിന്റെ സംശയം. ഇന്ന് വണ്ടാനം മെഡിക്കൽ കോളേജ് ആശുപത്രിയിൽ റംലത്തിന്റെ പോസ്റ്റ്‌മോർട്ടം നടക്കും. പോസ്റ്റ്‌മോർട്ടം റിപ്പോർട്ടിന് ശേഷം മാത്രമേ മരണത്തിന്റെ കൃത്യമായ കാരണം വ്യക്തമാകൂ.

പ്രദേശത്തെ സിസിടിവി ദൃശ്യങ്ങൾ ശേഖരിച്ച് പൊലിസ് അന്വേഷണം തുടങ്ങിയിട്ടുണ്ട്. റംലത്തിന്റെ ആഭരണങ്ങളോ പണമോ നഷ്ടപ്പെട്ടിട്ടുണ്ടോ എന്നും പരിശോധിച്ചുവരികയാണ്. വർഷങ്ങളായി റംലത്ത് ഈ വീട്ടിൽ ഒറ്റയ്ക്കാണ് താമസിച്ചിരുന്നത്. സമീപ പ്രദേശങ്ങളിൽ ബന്ധുക്കൾ താമസിക്കുന്നുണ്ട്. അവരിൽ നിന്നടക്കം പൊലിസ് വിവരങ്ങൾ ശേഖരിക്കുന്നുണ്ട്.

The death of 57-year-old Ramlath in Ottappana is suspected to be a murder, police say. Found dead in her home with a shawl around her neck, her body was partially on the bed with feet touching the floor. Chilli powder was sprinkled inside the house, and the electricity was disconnected. Ambalappuzha police and forensic experts are investigating. Awaiting post-mortem results to confirm the cause of death. CCTV footage and information from relatives are being collected.