കഴിഞ്ഞ ദിവസം ഇന്ത്യൻ വാഹന പ്രേമികൾക്കും ഡിസി ആരാധകർക്കും ആവേശകരമായ വാർത്തയുമായാണ് മഹീന്ദ്ര വന്നത്. വാർണർ ബ്രദേഴ്‌സ് ഡിസ്‌കവറി ഗ്ലോബൽ കൺസ്യൂമർ പ്രോഡക്‌ട്‌സുമായി ചേർന്ന് മഹീന്ദ്ര BE 6 -ന്റെ ബാറ്റ്മാൻ എഡിഷൻ പുറത്തിറക്കി. ക്രിസ്റ്റഫർ നോളന്റെ ഐതിഹാസികമായ ദി ഡാർക്ക് നൈറ്റ് ട്രൈലോജിയിൽ നിന്ന് പ്രചോദനം ഉൾക്കൊണ്ട ഈ ലിമിറ്റഡ് എഡിഷൻ ഇലക്ട്രിക് എസ്‌യുവി ഇന്ത്യയിൽ 300 യൂണിറ്റുകൾ മാത്രമായി ലഭ്യമാകും. 27.79 ലക്ഷം രൂപ എക്‌സ്-ഷോറൂം വിലയിൽ എത്തുന്ന ഈ മോഡൽ, 79 kWh പാക്ക് ത്രീ വേരിയന്റിനെ അടിസ്ഥാനമാക്കിയാണ് നിർമ്മിച്ചിരിക്കുന്നത്.

 

 

ഡിസൈനിൽ ബാറ്റ്മാൻ മുദ്ര

BE 6 ബാറ്റ്മാൻ എഡിഷൻ സാറ്റിൻ ബ്ലാക്ക് പെയിന്റ് സ്കീമിൽ അവതരിപ്പിച്ചിരിക്കുന്നു. വാഹനത്തിന്റെ ഡോറുകളിൽ കസ്റ്റം ബാറ്റ്മാൻ ഡീക്കലുകൾ, 20 ഇഞ്ച് അലോയ് വീലുകൾ, ആൽക്കെമി ഗോൾഡ് നിറത്തിൽ പെയിന്റ് ചെയ്ത സസ്‌പെൻഷൻ ഘടകങ്ങൾ, ബ്രേക്ക് കാലിപ്പറുകൾ എന്നിവ ഈ എഡിഷനെ വേറിട്ടതാക്കുന്നു. പിൻവശത്ത് BE 6 × ദി ഡാർക്ക് നൈറ്റ് എന്ന ഇൻസ്ക്രിപ്ഷനോടുകൂടിയ ബാഡ്ജിങ് ശ്രദ്ധേയമാണ്. ബാറ്റ് എംബ്ലം ഹബ് ക്യാപ്‌സ്, ക്വാർട്ടർ പാനലുകൾ, റിയർ ബമ്പർ, വിൻഡോകൾ, റിയർ വിൻഡ്‌സ്‌ക്രീൻ, ഇൻഫിനിറ്റി റൂഫ് എന്നിവയിലും ദൃശ്യമാണ്. കൂടാതെ, ബാറ്റ് എംബ്ലം പ്രൊജക്ട് ചെയ്യുന്ന കാർപെറ്റ് ലാമ്പുകളും പിൻ ഡോർ ക്ലാഡിംഗിൽ ബാറ്റ്മാൻ എഡിഷൻ സിഗ്നേച്ചർ സ്റ്റിക്കറും ഈ വാഹനത്തിന്റെ പ്രത്യേകതകളാണ്.

ആഡംബര ഇന്റീരിയർ

വാഹനത്തിന്റെ ക്യാബിനിൽ ബാറ്റ്മാൻ എഡിഷന്റെ ആഡംബരം പ്രകടമാണ്. ബ്രഷ്ഡ് ആൽക്കെമി ഗോൾഡിൽ നമ്പർ പതിപ്പിച്ച ബാറ്റ്മാൻ എഡിഷൻ പ്ലാക്ക്, ചാർക്കോൾ ലെതർ ഇൻസ്ട്രുമെന്റ് പാനൽ, ഗോൾഡ് സെപിയ സ്റ്റിച്ചിങ് ഉള്ള സ്യൂഡ് ലെതർ അപ്ഹോൾസ്റ്ററി എന്നിവ ക്യാബിനെ മനോഹരമാക്കുന്നു. സ്റ്റിയറിങ് വീൽ, ഇൻ-ടച്ച് കൺട്രോളർ, ഇലക്ട്രോണിക് പാർക്കിംഗ് ബ്രേക്ക് എന്നിവയിൽ ഗോൾഡ് ആക്സന്റുകൾ കാണാം. ബൂസ്റ്റ് ബട്ടൺ, സീറ്റുകൾ, മറ്റ് ഇന്റീരിയർ ഘടകങ്ങൾ എന്നിവയിൽ ബാറ്റ് എംബ്ലം എംബോസ് ചെയ്തിട്ടുണ്ട്. ഡാഷ്‌ബോർഡിൽ എംബ്ലത്തോടുകൂടിയ പിൻസ്ട്രൈപ്പ് ഗ്രാഫിക്സും ഇൻഫോടെയിൻമെന്റ് ഡിസ്‌പ്ലേയിൽ ബാറ്റ്മാൻ എഡിഷൻ വെൽക്കം ആനിമേഷനും ഈ വാഹനത്തിന്റെ ആകർഷണം വർധിപ്പിക്കുന്നു.

 

 

ബുക്കിങും ഡെലിവറിയും

BE 6 ബാറ്റ്മാൻ എഡിഷന്റെ ബുക്കിങ് ഓഗസ്റ്റ് 23 മുതൽ ആരംഭിക്കും. അന്താരാഷ്ട്ര ബാറ്റ്മാൻ ദിനത്തോടനുബന്ധിച്ച് സെപ്റ്റംബർ 20 മുതൽ ഡെലിവറികളും തുടങ്ങും. ഈ ലിമിറ്റഡ് എഡിഷൻ വാഹനം ഇന്ത്യൻ വിപണിയിൽ ഇലക്ട്രിക് എസ്‌യുവി വിഭാഗത്തിൽ പുത്തൻ തരംഗം സൃഷ്ടിക്കുമെന്നാണ് മഹീന്ദ്രയുടെ പ്രതീക്ഷ.

The Mahindra BE 6 Batman Edition is a special variant of the electric SUV, featuring unique Batman-inspired design elements and styling. Bookings for this exclusive edition open on August 23, 2025