ന്യൂഡൽഹി: ഇന്ത്യാ സഖ്യത്തിന്റെ ഉപരാഷ്ട്രപതി സ്ഥാനാർഥിയെ തീരുമാനിക്കുന്നതിനുള്ള നിർണായക യോഗം ഇന്ന് പൂർത്തിയായി. കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിൽ നടന്ന യോഗത്തിൽ സ്ഥാനാർഥി നിർണയവുമായി ബന്ധപ്പെട്ട പ്രാഥമിക ചർച്ചകൾ നടന്നു. നാല് പേരുകളാണ് ചർച്ചയിൽ ഉയർന്നുവന്നത്. തമിഴ്നാട്ടിൽ നിന്നുള്ള ഒരു നേതാവിനെ സ്ഥാനാർഥിയാക്കാൻ സാധ്യതയേറെയാണ്.

ഇസ്റോയിലെ മുൻ ശാസ്ത്രജ്ഞനായ എം. അണ്ണാദുരൈയുടെ പേര് ചർച്ചയിൽ മുഖ്യമായും ഉയർന്നു വന്നു. ഭൂരിപക്ഷം നേതാക്കളും അണ്ണാദുരൈയുടെ പേര് പിന്തുണച്ചതായാണ് സൂചന. യോഗത്തിൽ പങ്കെടുക്കാത്ത മുന്നണിയിലെ മറ്റ് പാർട്ടി നേതാക്കളുമായി ഖാർഗെ ഫോണിൽ ചർച്ച നടത്തി അവരുടെ അഭിപ്രായങ്ങൾ സ്വീകരിച്ച ശേഷം നാളെ ഉച്ചയോടെ സ്ഥാനാർഥിയെ ഔദ്യോഗികമായി പ്രഖ്യാപിക്കും.

ALSO READ: ഗസ്സയിൽ വെടിനിർത്തൽ: കരാർ ഹമാസ് അംഗീകരിച്ചതായി റിപ്പോർട്ട്

എൻഡിഎ സ്ഥാനാർഥിയെ പ്രഖ്യാപിച്ച സാഹചര്യത്തിൽ, ഇന്ത്യാ സഖ്യത്തിന്റെ സ്ഥാനാർഥി ആരാകുമെന്നാണ് രാഷ്ട്രീയ ലോകം ഉറ്റുനോക്കുന്നത്. നാളെ രാവിലെ അവസാനഘട്ട ചർച്ചകൾ പൂർത്തിയാക്കി സ്ഥാനാർഥി പ്രഖ്യാപനത്തിലേക്ക് മുന്നണി കടക്കും.

അതേസമയം എൻഡിഎയുടെ ഉപരാഷ്ട്രപതി സ്ഥാനാർഥിയായി സി.പി. രാധാകൃഷ്ണനെ പ്രഖ്യാപിച്ചിട്ടുണ്ട്. ബുധനാഴ്ച അദ്ദേഹം നാമനിർദേശ പത്രിക സമർപ്പിക്കും. ഒബിസി വിഭാഗത്തിൽ നിന്നുള്ള നേതാവിനെ മുന്നോട്ടുവെച്ചുകൊണ്ട് സാമൂഹ്യ-രാഷ്ട്രീയ സന്തുലനം ഉറപ്പാക്കാനാണ് ബിജെപി നീക്കം. ആർഎസ്എസിന്റെ താത്പര്യങ്ങളും എൻഡിഎയുടെ സ്ഥാനാർഥി നിർണയത്തിൽ പരിഗണിക്കപ്പെട്ടതായാണ് വിവരം.