കഠിനംകുളം: നിരവധി ക്രിമിനല്‍കേസുകളിലെ പ്രതിയെ വെട്ടിക്കൊലപ്പെടുത്താന്‍ ശ്രമിച്ച ഗുണ്ടാസംഘത്തിലെ മൂന്നു പേര്‍ കഴക്കൂട്ടം പൊലിസിന്റെ പിടിയിലായി.
കഴക്കൂട്ടം നെട്ടയക്കോണം പുതുവല്‍ പുത്തന്‍വീട്ടില്‍ കുടുക്ക രതീഷ് എന്ന് വിളിക്കുന്ന രതീഷ് (34), കഴക്കൂട്ടം പോങ്ങറ കോളനിയില്‍ ബിജു ഭവനില്‍ ബിജു (28) , കഴക്കൂട്ടം കുമിഴിക്കരയില്‍ സ്വദേശി ഉണ്ണി എന്ന് അറിയുന്ന മിഥുന്‍ (24) എന്നിവരാണ് അറസ്റ്റിലായത്.കഴിഞ്ഞ മൂന്നിന് രാത്രി 11.30 ഓടെയായിരുന്നു സംഭവം. പൊങ്ങറ പുതുവല്‍പുത്തന്‍ വീട്ടില്‍ അരുണ്‍ദാസ് (30) നെയാണ് സംഘം കുമിഴിക്കരയില്‍ വെച്ച് ബൈക്ക് തടഞ്ഞു നിര്‍ത്തിയ ശേഷം വെട്ടിക്കൊലപ്പെടുത്താന്‍ ശ്രമിച്ചത്. കഴുത്തിനും തലക്കും ആഴത്തില്‍ മുറിവേറ്റ അരുണ്‍ദാസ് ഇപ്പോഴും മെഡിക്കള്‍ കോളജ് ആശുപത്രിയില്‍ ചികിത്സയിലാണ്.
ഇയാള്‍ നിരവധി ക്രിമിനള്‍കേസുകളിലെ പ്രതിയാണെന്നും കാപ്പ പ്രകാരം ജയിലായിരുന്ന ഇയ്യാള്‍ അടുത്ത സമയത്താണ് പുറത്തിറങ്ങിയതെന്നും പൊലിസ് പറഞ്ഞു.
ഗുണ്ടാ കുടി പകയുടെ ഭാഗമായാണ് കൊലപാതക ശ്രമമെന്നും പൊലിസ് പറഞ്ഞു. കഴക്കൂട്ടം സൈബര്‍ സിറ്റി ഡിവിഷന്‍ അസിസ്റ്റന്റ് കമ്മീഷണര്‍ പ്രമോദ് കുമാറിന്റെ നിര്‍ദ്ദേശാനുസരണം സി.ഐ.അജയകുമാര്‍, എസ്.ഐ.വി.വി.ദിപിന്‍, ഗ്രേഡ് എസ്.ഐമാരായ സീതാറാം, ജയകുമാര്‍, സി.പി.ഒമാരായ സുലൈമാന്‍, പ്രതീപ്, ഷഫി, സതി രാജകുമാര്‍, പ്രസാദ് സിറ്റി ഷാഡോ പോലീസ് അടങ്ങുന്ന സംഘമാണ് പ്രതികളെ പിടികൂടിയത്.