മസ്‌കത്ത്: ഒമാനിലേ ലോകോസ്റ്റ് എയര്‍ലൈന്‍ സലാംഎയര്‍ വിവിധ രാജ്യങ്ങളിലേക്കുള്ള ചില വിമാന സര്‍വീസുകള്‍ താല്‍ക്കാലികമായി നിര്‍ത്തിവെച്ചതായി അറിയിച്ചു. മിഡില്‍ ഈസ്റ്റില്‍ തുടരുന്ന സംഘര്‍ഷാവസ്ഥയും ചില രാജ്യങ്ങളുടെ വ്യോമപാത നിയന്ത്രണങ്ങളും പശ്ചാത്തലമായാണ് ഈ തീരുമാനം. യാത്രക്കാരുടെയും ജീവനക്കാരുടെയും സുരക്ഷ മുന്‍നിര്‍ത്തിയാണ് നടപടി സ്വീകരിച്ചതെന്ന് കമ്പനി വ്യക്തമാക്കുന്നു.

വ്യോമപാതങ്ങളില്‍ ഏര്‍പ്പെടുത്തിയ നിയന്ത്രണങ്ങള്‍ കാരണം ചില പ്രധാന റൂട്ടുകളില്‍ സര്‍വീസുകള്‍ സാധാരണ രീതിയില്‍ നടത്തുന്നത് പ്രായോഗികമല്ലാത്ത സാഹചര്യമാണ് നിലനില്‍ക്കുന്നത്. ഇതിന്റെ ഭാഗമായി ഇറാന്‍ ഉള്‍പ്പെടെയുള്ള ചില രാജ്യങ്ങളിലേക്കുള്ള സര്‍വീസുകള്‍ ദീര്‍ഘകാലത്തേക്ക് നിര്‍ത്തിവെച്ചിട്ടുണ്ട്. കൂടാതെ ഇറാക്ക്, ലെബനന്‍, കുവൈത്ത്, ഖത്തര്‍, ഷാര്‍ജ എന്നിവിടങ്ങളിലേക്കുള്ള സര്‍വീസുകളും താല്‍ക്കാലികമായി നിര്‍ത്തിയതായി അറിയിച്ചിട്ടുണ്ട്. മുന്‍പ് കുറച്ച് ദിവസങ്ങള്‍ക്കായി മാത്രം നിര്‍ത്തിയ സര്‍വീസുകള്‍ പിന്നീട് നീട്ടിയതാണ് ശ്രദ്ധേയമായത്.

സര്‍വീസ് റദ്ദാക്കലിനെ തുടര്‍ന്ന് യാത്രക്കാരില്‍ ആശങ്ക ഉയര്‍ന്നിട്ടുണ്ട്. ഇതിനിടെ ബുക്കിംഗ് ചെയ്തിരിക്കുന്ന യാത്രക്കാര്‍ യാത്രയ്ക്ക് മുന്‍പ് അവരുടെ ടിക്കറ്റ് സ്റ്റാറ്റസ് നിര്‍ബന്ധമായും പരിശോധിക്കണമെന്ന് സലാംഎയര്‍ നിര്‍ദ്ദേശിച്ചു. റദ്ദാക്കിയ സര്‍വീസുകള്‍ക്കായി പുനര്‍ക്രമീകരണം, റിഫണ്ട്, അല്ലെങ്കില്‍ മറ്റു മാര്‍ഗങ്ങളിലൂടെ യാത്ര സൗകര്യം ഒരുക്കുമെന്ന് അധികൃതര്‍ അറിയിച്ചു.

സ്ഥിതിഗതികള്‍ അടുത്തുനിന്ന് നിരീക്ഷിച്ചുകൊണ്ടിരിക്കുകയാണെന്നും സുരക്ഷാ സാഹചര്യത്തില്‍ പുരോഗതി ഉണ്ടായാല്‍ സര്‍വീസുകള്‍ പുനരാരംഭിക്കുന്നതിനെക്കുറിച്ച് തീരുമാനം കൈക്കൊള്ളുമെന്നും കമ്പനി വ്യക്തമാക്കി. യാത്രക്കാര്‍ക്ക് സമയബന്ധിതമായി വിവരങ്ങള്‍ ലഭ്യമാക്കുന്നതിനായി ഔദ്യോഗിക വെബ്‌സൈറ്റ്, സോഷ്യല്‍ മീഡിയ പ്ലാറ്റ്‌ഫോമുകള്‍ എന്നിവ വഴി അപ്‌ഡേറ്റുകള്‍ നല്‍കുന്നതായും അറിയിച്ചു.

മിഡില്‍ ഈസ്റ്റിലെ നിലവിലെ സാഹചര്യങ്ങള്‍ വ്യോമഗതാഗത മേഖലയില്‍ വലിയ ബാധ്യത സൃഷ്ടിക്കുന്ന സാഹചര്യത്തില്‍, പല അന്താരാഷ്ട്ര എയര്‍ലൈന്‍സുകളും സമാനമായ നിയന്ത്രണങ്ങള്‍ ഏര്‍പ്പെടുത്തുന്നുണ്ടെന്നതും ശ്രദ്ധേയമാണ്.

SalamAir suspends multiple flights across the Middle East due to airspace restrictions and rising regional tensions. Passengers advised to check booking status.