കൊല്ലം: അടഞ്ഞുകിടക്കുന്ന സ്വകാര്യ കശുവണ്ടി ഫാക്ടറികളിലെ അരലക്ഷത്തിലധികം വരുന്ന തൊഴിലാളികളെ ഓണക്കാലയളവില്‍ പട്ടിണിക്കിടരുതെന്ന് എന്‍.കെ. പ്രേമചന്ദ്രന്‍ എം.പി. സര്‍ക്കാരിനോട് അഭ്യര്‍ഥിച്ചു.
തൊഴില്‍ വകുപ്പിന്റെ കണക്കനുസരിച്ച് മുന്നൂറിലധികം സ്വകാര്യ ഫാക്ടറികള്‍ അടഞ്ഞു കിടക്കുകയാണ്. കശുവണ്ടി വ്യവസായത്തില്‍ കഴിഞ്ഞ ദിവസം ഉണ്ടാക്കിയ ബോണസ് സെറ്റില്‍മെന്റ് അനുസരിച്ച് അമ്പത്തിയേഴായിരത്തിലധികം തൊഴിലാളികള്‍ക്ക് ഈ ഓണക്കാലയളവില്‍ ബോണസ് ഉള്‍പ്പെടെയുളള സാമ്പത്തിക ആനുകൂല്യവും ലഭിക്കില്ല. തൊഴിലാളികളുടേതല്ലാത്ത കാരണത്താല്‍ ഫാക്ടറികള്‍ അടഞ്ഞു കിടക്കുന്നതിനാല്‍ തൊഴിലാളികള്‍ക്ക് മതിയായ ധനസഹായം നല്‍കാനുളള ബാധ്യത മാനേജ്‌മെന്റുകള്‍ക്കുണ്ട്. കശുവണ്ടി വ്യവസായത്തില്‍ നിലനില്‍ക്കുന്ന പ്രത്യേക സാഹചര്യം പരിഗണിച്ച് ഈ തൊഴിലാളികള്‍ക്ക് മതിയായ ധനസഹായം നല്‍കാന്‍ സര്‍ക്കാരും ഫാക്ടറി മാനേജ്‌മെന്റുകളും തയ്യാറാകണമെന്ന് എം.പി. ആവശ്യപ്പെട്ടു.