തിരുവനന്തപുരം: പാലക്കാട് ആര്‍എസ്എസ് നിയന്ത്രണത്തിലുള്ള സ്‌കൂളില്‍ സ്‌ഫോടക വസ്തു പൊട്ടിത്തെറിച്ചതില്‍ കര്‍ശന നടപടി എടുക്കുമെന്ന് വിദ്യാഭ്യാസ മന്ത്രി വി ശിവന്‍കുട്ടി. വിശദമായ അന്വേഷണം നടത്തി റിപ്പോര്‍ട്ട് നല്‍കാന്‍ പൊതുവിദ്യാഭ്യാസ ഡയറക്ടര്‍ക്ക് നിര്‍ദേശം നല്‍കിയതായും മന്ത്രി ഫേസ്ബുക്കില്‍ കുറിച്ചു. 

ഇന്നലെയാണ് പാലക്കാട് വ്യാസാ വിദ്യാപീഠം പ്രീപ്രൈമറി സിബിഎസ്ഇ സ്‌കൂളില്‍ സ്‌ഫോടക വസ്തു പൊട്ടിത്തെറിച്ചത്. അപകടത്തില്‍ പത്ത് വയസുകാരന് പരിക്കേറ്റിരുന്നു. സ്‌കൂള്‍ കോമ്പൗണ്ടിനകത്ത് സ്‌ഫോടക വസ്തുക്കള്‍ എങ്ങനെ എത്തിയെന്നതടക്കം ദുരൂഹത നിലനില്‍ക്കുന്നുണ്ട്. ഇതിനിടയിലാണ് നടപടിയുമായി വിദ്യാഭ്യാസ വകുപ്പ് മുന്നിട്ടിറങ്ങിയത്. 

സ്‌കൂള്‍ പരിസരത്ത് നിന്ന് 4 സ്‌ഫോടക വസ്തുക്കളാണ് കണ്ടെത്തിയത്. ഇന്നലെ രാവിലെ സ്‌കൂളില്‍ ആര്‍എസ്എസ് ശാഖ നടന്നിരുന്നെന്നാണ് ആരോപണം. സംഘപരിവാര്‍ സംഘടനകളുടെ ശക്തി കേന്ദ്രമായ സ്‌കൂളില്‍ സ്‌ഫോടക വസ്തുക്കള്‍ കണ്ടെത്തിയത് അന്വേഷിക്കണമെന്ന് ആവശ്യപ്പെട്ട് ഡിവൈഎഫ്‌ഐയും രംഗത്തെത്തിയിരുന്നു.

ഫേസ്ബുക്ക് പോസ്റ്റിന്റെ പൂര്‍ണരൂപം 

കഴിഞ്ഞ ദിവസം പാലക്കാട് ജില്ലയിൽ വ്യാസാ വിദ്യാപീഠം പ്രീപ്രൈമറി സി.ബി.എസ്.ഇ. സ്‌കൂളിന്റെ സമീപത്തു നിന്നും സ്‌ഫോടക വസ്തുക്കൾ കണ്ടെടുത്തതും ഇതിലൊന്ന് പൊട്ടിത്തെറിച്ച് ഒരു വിദ്യാർത്ഥിക്കും ഒരു വനിതയ്ക്കും പരിക്കേറ്റതുമായ സംഭവം ഉണ്ടായി. ഇതുമായി ബന്ധപ്പെട്ട് പാലക്കാട് ഠൗൺ നോർത്ത് പോലീസ് സ്റ്റേഷൻ എക്‌സ്‌പ്ലോസീവ് സബ്സ്റ്റാൻസസ് ആക്ട്, ജുവനൈൽ ജസ്റ്റിസ് ആക്ട്, എന്നിവ പ്രകാരം കേസ് എടുത്തിട്ടുണ്ട്.

സംഭവത്തെ വളരെ ഗൗരവമായാണ് സംസ്ഥാന സർക്കാർ കാണുന്നത്. നിയമപരമായി കർശന നടപടികൾ ഉണ്ടാകും. ഒപ്പം തന്നെ ഇക്കാര്യം അന്വേഷിച്ച് റിപ്പോർട്ട് നൽകാൻ പൊതുവിദ്യാഭ്യാസ ഡയറക്ടർക്ക് നിർദ്ദേശം നൽകിയിട്ടുണ്ട്.

Education Minister has stated that strict action will be taken in connection with the explosion at a school in Palakkad.