സമ്പൂര്‍ണ അധിനിവേശം നടത്താനുള്ള പദ്ധതിക്കിടെ ഗസ്സ സിറ്റിയില്‍ ഇസ്‌റാഈല്‍ ആയിരത്തിലേറെ കെട്ടിടങ്ങള്‍ തകര്‍ത്തതായി റിപ്പോര്‍ട്ട്. നൂറു കണക്കിനാളുകള്‍ ഈ കെട്ടിടാവശിഷ്ടങ്ങള്‍ക്കിടയില്‍ കുടുങ്ങിയിട്ടുണ്ടെന്നും ഫലസ്തീന്‍ സിവില്‍ ഡിഫന്‍സ് റിപ്പോര്‍ട്ട് ചെയ്യുന്നു. ആഗസ്റ്റ് ആറിനാണ് ഇസ്‌റാഈല്‍ ഗസ്സ സമ്പൂര്‍ണ അധിവേശം ആരംഭിച്ചത്. സൈത്തൂന്‍, സെബ്ര തുടങ്ങിയ ഗസ്സ സിറ്റിയോട് അടുത്ത് കിടക്കുന്ന പ്രദേശങ്ങള്‍ പൂര്‍ണമായും തകര്‍ത്തായി റിപ്പോര്‍ട്ടുകള്‍ സൂചിപ്പിക്കുന്നു. 

തുടര്‍ച്ചയായ ഷെല്ലാക്രമണവും തടസ്സപ്പെട്ട പ്രവേശന വഴികളും പ്രദേശത്തെ നിരവധി രക്ഷാപ്രവര്‍ത്തനങ്ങളെയും സഹായ പ്രവര്‍ത്തനങ്ങളെയും തടസ്സപ്പെടുത്തുന്നുണ്ടെന്നും ഏജന്‍സി ഞായറാഴ്ച പ്രസ്താവനയില്‍ പറഞ്ഞു.

കാണാതായവരെക്കുറിച്ചുള്ള നിരവധി റിപ്പോര്‍ട്ടുകള്‍ രക്ഷാപ്രവര്‍ത്തകര്‍ക്ക് നിരന്തരമായി ലഭിക്കുന്നുണ്ട്. എന്നാല്‍ അവര്‍ക്ക് അതിനോട് പ്രതികരിക്കാന്‍ പോലും കഴിയുന്നില്ല. അക്രമണങ്ങളില്‍ പരുക്കേറ്റവരുടേയും മറ്റും ആധിക്യം മൂലം ആശുപത്രികളും വലയുകയാണ്- റിപ്പോര്‍ട്ട് ചൂണ്ടിക്കാട്ടുന്നു. 

ALSO READ: ഒരേ സമയം അനുരഞ്ജന ചർച്ചയ്ക്ക് ഉത്തരവിട്ടും കൂട്ടകുരുതി തുടർന്നും നെതന്യാഹു

''ഇസ്‌റാഈല്‍ സൈന്യം ഗസ്സ നഗരത്തിലേക്ക് തുടര്‍ച്ചയായി കടന്നുകയറ്റം നടത്തുന്നത് ഗുരുതരമായ ആശങ്കകള്‍ ഉയര്‍ത്തുന്നു'  സിവില്‍ ഡിഫന്‍സ് പറഞ്ഞു.

''വടക്കും തെക്കും ഗസ്സ മുനമ്പില്‍ സുരക്ഷിതമായ ഒരു പ്രദേശവുമില്ല.  അവിടെയുള്ള സാധാരണക്കാരെ ലക്ഷ്യമിട്ട് അവരുടെ വീടുകളിലും ഷെല്‍ട്ടറുകളിലും എന്തിനേറെ അവര്‍ അഭയം തേടിയ ക്യാംപുകളില്‍ പോലും ആക്രമണം നടത്തുകയാണ് ഇസ്‌റാഈല്‍'- റിപ്പോര്‍ട്ട് സൂചിപ്പിക്കുന്നു. ഇസ്‌റാഈല്‍ ടാങ്കുകള്‍ സിറ്റിമുഴുവന്‍ നിറഞ്ഞിരിക്കുന്നു. ഏകദേശം പത്തു ലക്ഷം ഫലസ്തീനികളാണ് ഈ സമ്പൂര്‍ണ അധിനിവേശത്തിന്റെ പേരില്‍ കുടിയൊഴിപ്പിക്കപ്പെട്ടത്. 

റഫയില്‍ ചെയ്തതു പോലെ ഗസ്സ നഗരം പൂര്‍ണമായും തകര്‍ക്കാനാണ് ഇസ്‌റാഈല്‍ നീക്കം. അല്‍ജലാ തെരുവിലെ ഒരു കെട്ടിടത്തിന് നേരെയുണ്ടായ ആക്രമണത്തില്‍ കുട്ടിയുള്‍പെടെ മൂുന്നു പേരെങ്കിലും കൊല്ലപ്പെട്ടിട്ടുണ്ടെന്ന് റിപ്പോര്‍ട്ടുകള്‍ വ്യക്തമാക്കുന്നു.

ALSO READ: നിബന്ധനകള്‍ ഹമാസ് അംഗീകരിച്ചിട്ടും ഇസ്‌റാഈല്‍ വഴങ്ങിയില്ല, ഗസ്സയില്‍ ഏഴ് വെടിനിര്‍ത്തല്‍ കരാറുകള്‍ നെതന്യാഹു അട്ടിമറിച്ചതായി റിപ്പോര്‍ട്ട്   

അതിനിടെ യു.എസ് പ്രത്യേക പ്രതിനിധി ടോം ബരാക് കഴിഞ്ഞ ദിവസം ഇസ്റാഈല്‍ സന്ദര്‍ശിച്ചിരുന്നു. ഞായറാഴ്ചയാണ് ടോം ഇസ്റാഈലിലെത്തിയത്.  പ്രധാനമന്ത്രി ബെന്യാമിന്‍ നെതന്യാഹുവുമായി ചര്‍ച്ച നടത്തി. സിറിയ, ലബനാന്‍ വിഷയങ്ങളാണ് ചര്‍ച്ചയില്‍ വിഷയമായതെന്ന് ഇസ്റാഈല്‍ മുതിര്‍ന്ന ഉദ്യോഗസ്ഥര്‍ പറഞ്ഞു.

ഇസ്റാഈലിന്റെ സ്ട്രാറ്റജികാര്യ മന്ത്രി റോണ്‍ ഡെര്‍മര്‍, പ്രതിരോധ മന്ത്രി ഇസ്റായേല്‍ കട്സ് എന്നിവരുമായും അദ്ദേഹം കൂടിക്കാഴ്ച നടത്തി. നെരത്തെ ഡെര്‍മര്‍ സിറിയന്‍ വിദേശകാര്യ മന്ത്രി അസദ് അല്‍ ഷിബാനിയുമായും പാരിസില്‍ ചര്‍ച്ച നടത്തിയിരുന്നു. തെക്കന്‍ സിറിയയിലെ സുരക്ഷാ കാര്യങ്ങളാണ് ചര്‍ച്ചയില്‍ വിഷയമായത്.

israel's full-scale invasion of gaza city has destroyed more than 1000 buildings, with hundreds feared trapped under the rubble. palestinian civil defense reports heavy bombardment and blocked access hindering rescue efforts.