ന്യൂഡല്‍ഹി: വൈകല്യമുള്ളവരെ കളിയാക്കുന്ന തരത്തിലുള്ള വിഡിയോ ചെയ്യുന്ന ഇൻഫ്ലുവൻസർമാര്‍ക്ക് താക്കീതുമായി സുപ്രിംകോടതി. വൈകല്യമുള്ള ആളുകളെ പരിഹസിച്ചതിന് 'ഇന്ത്യാസ് ഗോട്ട് ലാറ്റന്റ്' അവതാരകനായ സമയ് റെയ്‌ന ഉള്‍പ്പെടെ അഞ്ച് സോഷ്യല്‍ മീഡിയ ഇന്‍ഫ്‌ലുവന്‍സര്‍മാരോടായിരുന്നു സുപ്രിംകോടതിയുടെ പ്രതികരണം.

ഇത്തരം രീതിയിലുള്ള പരാമര്‍ശം നടത്തിയ യൂട്യൂബര്‍മാരും ഇൻഫ്ലുവൻസർമാരും ഖേദപ്രകടനം നടത്തണമെന്ന് പറഞ്ഞ കോടതി വൈകല്യമുള്ള ആളുകളുടെ അവകാശങ്ങള്‍ സംബന്ധിച്ച് ബോധവല്‍ക്കരണം നടത്താന്‍ എന്ത് ചെയ്തുവെന്ന് വിശദീകരിക്കാന്‍ ഇൻഫ്ലുവൻസർമാരോട് ആവശ്യപ്പെട്ടു. 

അതേസമയം സോഷ്യല്‍ മീഡിയയിലെ ഭാഷയ്ക്ക് മാര്‍ഗനിര്‍ദേശം കൊണ്ടുവരണമെന്ന് സുപ്രിംകോടതി വാര്‍ത്താ വിതരണ പ്രക്ഷേപണ മന്ത്രാലയത്തോട് നിര്‍ദേശിച്ചു. അതില്‍ സമൂഹത്തിലെ ജനങ്ങളുടെ വികാരത്തെ വ്രണപ്പെടുത്തുന്നില്ലെന്ന് ഉറപ്പാക്കാനുള്ള നിര്‍ദേശങ്ങള്‍ ഉള്‍ക്കൊള്ളിക്കണമെന്നും കോടതി സൂചിപ്പിച്ചു.

കൊമേഡിയന്‍ സമയ് റെയ്‌നയുടെ 'ഇന്ത്യാസ് ഗോട്ട് ലാറ്റന്റ്' എന്ന പരിപാടിയിലായിരുന്നു രണ്‍വീര്‍ അലഹബാദിയ നടത്തിയ പരാമര്‍ശം വിവാദമായത്. പരിപാടിക്കിടെ ഒരു മത്സരാര്‍ഥിയോട് രണ്‍വീര്‍ ചോദിച്ച ചോദ്യം വിവാദമായതോടെ പൊലിസ് കേസെടുക്കുകയായിരുന്നു.