നീലേശ്വരം (കാസർകോട്): കൊച്ചിയിൽ നിന്നും കാസർകോട്ടേക്ക് രേഖകൾ പ്രകാരം  കരിഓയിൽ കൊണ്ടുപോകുമ്പോൾ ഭീഷണിപ്പെടുത്തി 2, 65,000 രൂപ കൈക്കൂലി വാങ്ങുകയും പിന്നീട് 13 ലക്ഷം രൂപ പിഴയീടാക്കുകയും ചെയ്തുവെന്ന പരാതിയിൽ അന്വേഷണം തുടങ്ങി. കാസർകോട് മടിക്കൈ പഞ്ചായത്തിലെ പെട്രോ ലൈവ് പെട്രോളിയംസ് എന്ന കമ്പനി മുഖ്യമന്ത്രിക്കും ധനമന്ത്രിക്കും നൽകിയ പരാതിയിൽ അന്വേഷണം നടത്താൻ മുഖ്യമന്ത്രിയുടെ ഓഫിസ് അഡീഷണൽ ചീഫ് സെക്രട്ടറിക്ക് നിർദേശം നൽകുകയായിരുന്നു. 

കഴിഞ്ഞ നവംബറിൽ കൊച്ചി കപ്പൽശാലയിൽ നിന്നും നേവൽ ബേസിൽ നിന്നും വാങ്ങിയ ഉപയോഗശൂന്യമായ കരിഓയിൽ രണ്ട് ലോറികളിലായി കാസർകോട്ടേക്ക് കൊണ്ടുപോകുമ്പോഴാണ് ജി.എസ്.ടി ഉദ്യോഗസ്ഥർ പിടികൂടിയത്. രണ്ടു ലോറികൾക്കുമായി 13 ലക്ഷം രൂപയാണ് ജി.എസ്.ടി വകുപ്പ് പിഴയടക്കാൻ ആവശ്യപ്പെട്ടത്. 

കപ്പലിൽ ഉപയോഗിച്ച് ഉപയോഗശൂന്യമായ കരിഓയിലായതിനാൽ മൂല്യമില്ലാത്തതുകൊണ്ട് ജി.എസ്.ടിയുടെ പരിധിയിൽ വരുന്നില്ലെന്ന് വാദിച്ച് പെട്രോളിയം കമ്പനി പിഴ അടക്കാൻ തയാറായില്ല. ഇതിനു പിന്നാലെയാണ്  ഇടനിലക്കാരനായി പ്രാദേശിക രാഷ്ട്രീയ നേതാവ് രംഗത്തുവന്നത്. 

ALSO READ: പാക് ചാരനായ സിആര്‍പിഎഫ് ഉദ്യോഗസ്ഥന് കൂടുതല്‍ സൈനികരുമായി ബന്ധം; ചോര്‍ന്ന വിവരങ്ങളുടെ ആഴം അറിയാതെ ഐ.ബി

ജി.എസ്.ടി ഉദ്യോഗസ്ഥരെ പിണക്കിയാൽ ബുദ്ധിമുട്ടാകുമെന്നും 5 ലക്ഷം രൂപ നൽകിയാൽ ലോറികൾ വിട്ടുനിൽക്കുമെന്നും ഇയാൾ പറഞ്ഞതിന്റെ അടിസ്ഥാനത്തിൽ ഗത്യന്തരമില്ലാതെയാണ് പണം നൽകിയതെന്നും കമ്പനി പരാതിയിൽ പറയുന്നു. എന്നാൽ 2, 65,000 രൂപ കൈക്കൂലി നൽകിയിട്ടും 13 ലക്ഷം രൂപ പിഴ വിധിച്ചതോടെയാണ് കമ്പനി എം.ഡി മൈക്കിൾ ഡോറസ്  പരാതിയുമായി വന്നത്. 

മുഖ്യമന്ത്രിക്കും ധനകാര്യ മന്ത്രിക്കും പുറമേ വ്യവസായ വകുപ്പ് മന്ത്രി, പ്രതിപക്ഷ നേതാവ്, വിജിലൻസ് ഡയറക്ടർ എന്നിവർക്കും പരാതി നൽകി. പരാതിയിൽ 5 ജി.എസ്.ടി ഉദ്യോഗസ്ഥരുടെയും ഇടനിലക്കാരന്റെയും പേരുകളും പണം കൈമാറിയതിന്റെ ബാങ്ക് രേഖകളും തെളിവുകളും ഹാജരാക്കി. പരാതിയുടെ അടിസ്ഥാനത്തിൽ പ്രാഥമിക അന്വേഷണം ആരംഭിച്ച വിജിലൻസ് കമ്പനി ഡയരക്ടർമാരിൽ നിന്നും തെളിവുകൾ ശേഖരിച്ചു.

Complaint registered and investigation began on GST officials bribe 2.65 lakh as bribe and later imposed fine 13 lakh to the transportation of kerosene from Kochi to Kasargod with proper documents.