പാലക്കാട്: തനിക്കെതിരെ ഉയര്‍ന്ന ലൈംഗിക പീഡന പരാതി തള്ളി ബി.ജെ.പി സംസ്ഥാന വൈസ് പ്രസിഡന്റ് സി.കൃഷ്ണകുമാര്‍. സ്വത്തു തര്‍ക്കവുമായി ബന്ധപ്പെട്ട പരാതിയാണ് പുറത്തുവന്നതെന്നാണ് കൃഷ്ണകുമാറിന്റെ വിശദീകരണം. ഇതുമായി ബന്ധപ്പെട്ട് നല്‍കിയ പരാതിയില്‍ യുവതി പീഡനാരോപണം ഉന്നയിച്ചിരുന്നു. പരാതി നേരത്തെ പൊലിസ് അന്വേഷിച്ച് തള്ളിയതാണെന്നും പാര്‍ട്ടി നേതൃത്വം തന്നോട് ഇക്കാര്യത്തില്‍ വിശദീകരണമൊന്നും തേടിയിട്ടില്ലെന്നും കൃഷ്ണകുമാര്‍ വ്യക്തമാക്കി. 

കഴമ്പുണ്ടെന്ന് തോന്നിയ പരാതിയില്‍ പാര്‍ട്ടി നടപടിയെടുത്തിട്ടുണ്ട്. അത്തരത്തിലൊരു പരാതിയിലാണ് സന്ദീപ് വാര്യരെ മാറ്റി നിര്‍ത്തിയത്-കൃഷ്ണകുമാര്‍ വാര്‍ത്ത സമ്മേളനത്തില്‍ പറഞ്ഞു.

ALSO READ: ബിജെപി സംസ്ഥാന വൈസ് പ്രസിഡന്റ് സി. കൃഷ്ണകുമാറിന് എതിരെ പീഡന പരാതിയുമായി യുവതി; നേതൃത്വത്തിന് നേരത്തെ നൽകിയ പരാതി അവഗണിച്ചെന്നും യുവതി

പാര്‍ട്ടി നേതൃത്വം വിശദീകരണെം തേടിയാല്‍ നേതൃത്വത്തെ ബോധ്യപ്പെടുത്താന്‍ സാധിക്കും. നേരത്തെ ഉണ്ടായിരുന്ന നേതൃത്വത്തിന് സത്യമറിയാം. കാര്യങ്ങള്‍ പാര്‍ട്ടിയെ ബോധ്യപ്പെടുത്തിയിരുന്നു. ഞങ്ങളുടെ ഇടയിലുണ്ടായിരുന്ന അസുരവിത്ത് പുറത്ത് പോയി. അയാളാണ് ഇതിന് പിന്നിലെന്നും കൃഷ്ണകുമാര്‍ ആരോപിച്ചു. 

പാലക്കാട് സ്വദേശിനിയായ യുവതിയാണ് ബി.ജെ.പി സംസ്ഥാന വൈസ് പ്രസിഡന്റ് സി. കൃഷ്ണകുമാറിന് എതിരെ പരാതി നല്‍കിയത്. ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖറിനാണ് യുവതി പരാതി നല്‍കിയത്. കൃഷ്ണകുമാറിനെ പാര്‍ട്ടിയില്‍ നിന്ന് പുറത്താക്കണെമെന്ന് ഉള്‍പ്പെടെയുള്ള ആവശ്യങ്ങള്‍ ഉന്നയിച്ചാണ് പരാതി. കൃഷ്ണകുമാര്‍ ലൈംഗികമായി പീഡിപ്പിച്ചെന്നാണ് യുവതി പരാതിയില്‍ പറയുന്നത്.

രണ്ട് ദിവസം മുന്‍പാണ് യുവതി സംസ്ഥാന പ്രസിഡന്റിന് പരാതി നല്‍കിയത്. രാജീവ് ചന്ദ്രശേഖറിന് ഇ-മെയില്‍ വഴി യുവതി നേരിട്ട് പരാതി നല്‍കുകയായിരുന്നു. പരാതി കിട്ടിയിട്ടുണ്ടെന്ന കാര്യം രാജീവ് ചന്ദ്രശേഖര്‍ യുവതിയെ അറിയിച്ചിട്ടുണ്ട്. വൈകാതെ പരാതി പരിശോധിക്കാമെന്നാണ് ചന്ദ്രശേഖറിന്റെ ഓഫീസ് മറുപടി നല്‍കിയത്.

എന്നാല്‍, യുവതി മുന്‍പും നേതൃത്വത്തിന് പരാതി നല്‍കിയെന്നും യുവതിയുടെ പരാതിയില്‍ പറയുന്നു. ബിജെപി - ആര്‍എസ്എസ് നേതാക്കള്‍ക്ക് പരാതി നല്‍കിയെങ്കിലും അവഗണിച്ചെന്നും യുവതി ആരോപിച്ചു. വി. മുരളീധരന്‍, എം.ടി രമേശ് എന്നിവര്‍ക്ക് നല്‍കിയ പരാതിയില്‍ ഒരു നടപടിയും ഉണ്ടായില്ല. നടപടി എടുക്കാമെന്ന് പറഞ്ഞെങ്കിലും പിന്നീട് ഒന്നും ഉണ്ടായില്ല

bjp state vice president c krishnakumar denies sexual harassment charges, claims the case is related to a property dispute and was earlier dismissed by police.